नागपूरमध्ये एका दारू दुकानातून ४ लाख ८७ हजार रुपयांची चोरी झाल्याची धक्कादायक घटना समोर आली आहे. विशेष म्हणजे, या रकमेमध्ये तब्बल ३.७५ लाख रुपये केवळ नाण्यांच्या स्वरूपात होते. ही संपूर्ण घटना सीसीटीव्ही कॅमेऱ्यात कैद झाली असून, पोलिसांनी एक आरोपी राजा खान याला अटक केली आहे.
सीसीटीव्हीमध्ये दिसते की चोर रात्री ३:४१ ते ४:१० च्या दरम्यान दुकानाच्या शटरखालून आत घुसतो आणि ५, १० आणि २० रुपयांची नाणी वेगवेगळ्या पिशव्यांमध्ये भरतो. त्यानंतर तो नाण्यांनी भरलेल्या पोत्यात घेऊन दुकानाबाहेर जातो. दुकानात दररोज ३०-३५ हजार रुपयांची चिल्लर साठवून ठेवली जात असल्याने मालकाने ती वेगवेगळ्या पॅकेट्समध्ये ठेवली होती.
फुटेजच्या आधारे राजा खान याची ओळख पटवण्यात आली असून, पोलिसांनी त्याला ताब्यात घेतले आहे. त्याच्याकडून चोरीस गेलेल्या मालापैकी काही वस्तू हस्तगत करण्यात आल्या आहेत. आरोपीकडे अधिक चौकशी सुरू आहे.
मागील घटना
- नागपूरमधील दारू दुकानांमध्ये चोरीच्या घटना वाढताना दिसत आहेत:
- ६ जून रोजी एका बिअर शॉपमधून खिडकीतून घुसून २५ हजार रुपये चोरी करण्यात आले होते.
- ह्या दोन्ही घटनांचे सीसीटीव्ही फुटेज पोलिसांकडे आहे.
वाढत्या चोऱ्यांनी व्यापाऱ्यांत भीती
दारू दुकानांवर सातत्याने होणाऱ्या चोऱ्यांमुळे व्यापाऱ्यांमध्ये भीतीचं वातावरण आहे. आता पोलिसांनी या चिल्लर चोराच्या टोळीचा बंदोबस्त करण्यासाठी विशेष पथक नेमले आहे.
एकीकडे नगदी व्यवहार कमी होत चालले असतानाही, नगद चिल्लर चोरी करणारा चोर पुन्हा चर्चेत आला आहे. ‘चिल्लर’ म्हणजे किरकोळ रक्कम नव्हे, तर लाखोंच्या नाण्यांवर डोळा ठेवणारी ‘चिल्लर माफिया’ आता पोलिसांसमोर नवे आव्हान उभे करत आहे.
