भारताने अलिकडेच १६ वर्षांखालील ज्युनियर डेव्हिस कप टेनिस स्पर्धेत कट्टर प्रतिस्पर्धी पाकिस्तानचा २-० असा पराभव केला. कझाकस्तानमधील श्यामकेंट येथे खेळताना, भारतीय खेळाडू प्रकाश सरन आणि तविश पाहवा यांनी सुपर टाय-ब्रेकमध्ये त्यांचे एकेरी सामने जिंकले आणि अंतिम फेरीत भारताचे स्थान निश्चित केले. पण आता या सामन्याचा एक व्हिडिओ सोशल मीडियावर व्हायरल होत आहे, ज्यामुळे मोठा वाद निर्माण झाला आहे. खरं तर, व्हायरल झालेल्या क्लिपमध्ये, पाकिस्तानी खेळाडू भारताकडून पराभव झाल्यानंतर हस्तांदोलन करताना भारतीय खेळाडूशी गैरवर्तन करताना दिसत आहे.
सामना संपल्यानंतर, भारतीय खेळाडू खिलाडूवृत्ती दाखवत हस्तांदोलन करण्यासाठी गेला. पण पाकिस्तानी खेळाडूने आक्रमक हावभाव केला आणि हस्तांदोलन करुन हात झटकून दिला. नंतर तो परत आला. पण हस्तांदोलन करताना त्याने अचानक अपमानास्पद पद्धतीने भारतीय खेळाडूचा हात झटकला. आता त्याच्या कृत्यावर बरीच टीका होत आहे. दुसरीकडे, चाहत्यांनी भारतीय खेळाडूचे शांत वर्तन, संयम आणि खेळाची प्रतिष्ठा राखल्याबद्दल कौतुक केले.
भारताने पाकिस्तानला हरवले असले, तरी ९-१२ च्या प्लेऑफमध्ये न्यूझीलंडविरुद्ध १-२ असा पराभव पत्करावा लागला, जिथे भारतीय जोडीने दुहेरी सामन्यात सुपर टाय-ब्रेक (९-११) गमावला.
२२ एप्रिल रोजी जम्मू आणि काश्मीरमधील पहलगाम येथे दहशतवादी हल्ला झाला, ज्यामध्ये २६ जणांना आपले प्राण गमवावे लागले. तेव्हापासून भारत आणि पाकिस्तानमध्ये तणाव वाढला आहे. या हल्ल्याला प्रत्युत्तर म्हणून भारताने ७ मे रोजी ऑपरेशन सिंदूर सुरू केले. आणि पाकिस्तानमधील ९ दहशतवादी अड्ड्यांवर हल्ला करण्यात आला, ज्यामुळे दोन्ही देशांमध्ये संघर्ष सुरू झाला. या काळात, दोन्ही देशांच्या क्रिकेटपटू आणि सेलिब्रिटींमध्ये सोशल मीडियावर भांडण सुरू झाले. युद्धबंदी झाली असली तरी, अजूनही तणाव दिसून येतो.
