पुणे महानगरपालिका निवडणुकीच्या रिंगणात जवळजवळ सर्वच राजकीय पक्षांकडून गुन्हेगारी पार्श्वभूमी असलेल्या व्यक्तींना उमेदवारी देण्यात आली आहे. शहरातील युवा पिढी गुन्हेगारीकडे जाण्यापासून कसे रोखायचे हे एक मोठे सामाजिक आणि प्रशासकीय आव्हान ठरत असताना पुणे शहरातील सर्वच राजकीय पक्षाने भाईगिरी आश्रित उमेदवारी देण्याला प्राधान्य दिल्यामुळे नवे आव्हान निर्माण झाले आहे. पुणे शहरात वाढत्या गुन्हेगारी घटनांमध्ये अल्पवयीन मुलांचा सहभाग वाढताना दिसत आहे, ही अत्यंत गंभीर बाब आहे. गुन्हेगारी पार्श्वभूमी असलेले उमेदवार प्रचारादरम्यान नेमके काय करत आहेत, यावर पुणे पोलिसांची करडी नजर आहे. प्रचारात पैशांचा गैरवापर, अवैध व्यवहार किंवा दहशत निर्माण होत आहे का, याची बारकाईने तपासणी केली जात आहे.
संपूर्ण पुणे शहरात निवडणुकीचा उत्साह शिगेला पोचलला असतानाश हरात कोणतीही बेकायदेशीर किंवा चुकीची घटना घडल्यास संबंधित व्यक्ती उमेदवार असली तरी तिला माफ केले जाणार नाही, असा स्पष्ट इशारा पुणे पोलिसांनी दिला आहे. पुणे पोलिसांच्या वतीने यासाठी एक विशेष कक्षा निर्माण करण्यात आला असून गुन्हेगारी पार्श्वभूमी असलेल्या उमेदवारांच्या सोशल मीडियावरील पोस्ट्स, व्हिडिओ आणि संदेशांवरही पुणे पोलिसांची विशेष नजर ठेवली जात आहे. द्वेषमूलक भाषण, धमकी, कायदा-सुव्यवस्थेला धोका निर्माण करणाऱ्या पोस्ट्सवर तात्काळ कारवाई केली जाणार आहे. या सर्व गंभीर मुद्द्यांवर पुणे पोलीस आयुक्त अमितेश कुमार यांनी माहिती दिली आहे.
पुण्यात पक्षांनी गंभीर गुन्ह्यांतील कोणत्या आरोपींना दिली उमेदवारी
पुण्यातील सर्वात जुनी आणि कुख्यात समजल्या जाणाऱ्या आंदेकर टोळीतील सदस्यांना अजित पवार यांच्या राष्ट्रवादी काँग्रेसने उमेदवारी दिली आहे. सोनाली आंदेकर आणि लक्ष्मी आंदेकर: प्रभाग 23 मधून या दोघी निवडणूक लढवत आहेत. विशेष म्हणजे, आयुष्य कोमकर हत्येचा कट रचल्याच्या आरोपाखाली या दोघी सध्या येरवडा कारागृहात आहेत. बंडू आंदेकर: टोळीचा प्रमुख बंडू आंदेकर हा देखील याच प्रकरणात अटकेत आहे. तो पोलिसांच्या कड्या पहऱ्यात आणि हातात बेड्या असलेल्या स्थितीत उमेदवारी अर्ज भरण्यासाठी आला होता. संपूर्ण आंदेकर कुटुंबावर ‘मोक्का’ अंतर्गत कारवाई करण्यात आली आहे. राष्ट्रवादी काँग्रेसने प्रभाग 39 मधून बापू नायरला उमेदवारी दिली आहे. बापू नायरवर हत्या, अपहरण आणि खंडणी यांसारखे अनेक गंभीर गुन्हे दाखल आहेत.
भाजपकडूनही गुन्हेगारी पार्श्वभूमीच्या नातेवाईकांना संधी देण्यात आली आहे. अनेक गंभीर गुन्ह्यांत अडकलेल्या आरोपींच्या पत्नींना भाजपने उमेदवारी दिली आहे. गजानन मारणेची पत्नी माजी नगरसेविका जयश्री मारणे याही राष्ट्रवादी तर्फे निवडणूक रिंगणात आहेत. या अगोदर महाराष्ट्र नवनिर्माण सेनेच्या वतीने सलग दोन वेळा त्यांना उमेदवारी देण्यात आली होती. अशाप्रकारे सर्वच राजकीय पक्षांच्या माध्यमातून गुन्हेगारी विश्वाचा राजकारणात हस्तक्षेप वाढल्याचा आरोप होत आहे. त्यानंतर रोहिदास चोरघे यांची पत्नी प्रतिभा चोरघे यांना भाजपने संधी दिली आहे. रोहिदास चोरघेवर हत्या, अपहरण, पोलिसांवर हल्ला आणि गोळीबाराचे अनेक गुन्हे नोंद आहेत. संदीप बांदल हत्या प्रकरणातही त्याचे नाव होते. फरारी असतानाही त्याने अनेक ठिकाणी गोळीबार करून दहशत निर्माण केली होती.
पिंपरीत गुन्हेगारी पार्श्वभूमीचे 34 उमेदवार रिंगणात
पिंपरी-चिंचवड महापालिका निवडणुकीत उमेदवारांच्या गुन्हेगारी पार्श्वभूमीवरून राजकीय वाद निर्माण झाला आहे. येत्या १५ जानेवारी रोजी होणाऱ्या मतदानासाठी अनेक पक्षांनी गुन्हेगारी पार्श्वभूमी असलेल्या व्यक्तींना किंवा त्यांच्या नातेवाईकांना उमेदवारी दिली आहे. कागदावर स्वच्छ प्रतिमा असणारे पण पोलिसांच्या रेकॉर्डमध्ये राजकीय गुंड असा उल्लेख असणारे 17 जण सध्या पिंपरी-चिंचवड महापालिकेची निवडणूक लढवत आहेत.
गुन्हेगारी पार्श्वभूमी असणारे 34 उमेदवार निवडणुकीच्या रिंगणात आहेत. यात दोन महिलांचा समावेश आहे. गुन्हेगारी पार्श्वभूमीच्या उमेदवारांमध्ये भाजपचे 17, राष्ट्रवादी काँग्रेसचे 13, शिवसेनेचे 4 जण आहेत. यात दोन महिला उमेदवारही आहेत. पोलिसांच्या दप्तरी राजकीय गुंड म्हणून नोंद असणारे भाजपचे 8, राष्ट्रवादीचे 7 आणि शिवसेनेच्या 2 जणांचा समावेश आहे. तर गुन्हेगारी पार्श्वभूमी असलेल्या 8 पती राजांच्या पत्नी उमेदवार म्हणून रिंगणात आहेत.
