पुणे स्थानिक स्वराज्य विधान परिषदेच्या निवडणुकीतील राष्ट्रवादी काँग्रेसचे (अजित पवार) उमेदवार आणि माजी खासदार संजय काकडे यांचे चिरंजीव विक्रम काकडे आणि कुटुंबीयांच्या नावावर १५३ कोटींची मालमत्ता असून, त्यांनी दिवंगत उपमुख्यमंत्री अजित पवार यांचे चिरंजीव जय यांना दहा कोटी रुपये उधार दिले आहेत. विक्रम यांनी ही माहिती उमेदवारी अर्ज भरताना दिलेल्या मालमत्तासंदर्भातील प्रतिज्ञापत्रात दिली आहे. विक्रम यांनी जय यांच्यासह रूबी हॉल क्लिनिकचे परवेझ ग्रँट तसेच काही कंपन्यांना एकूण ४० कोटी ९४ लाख रुपयांचे कर्ज स्वरूपात रक्कम दिली आहे.
पुणे स्थानिक स्वराज्य विधान परिषदेच्या निवडणुकीतील राष्ट्रवादी काँग्रेसचे (अजित पवार) उमेदवार, माजी खासदार संजय काकडे यांचे चिरंजीव विक्रम काकडे यांच्याकडे १५३ कोटींची मालमत्ता आहे. त्यांच्याकडे ४० कोटी ९४ लाख रुपयांचे कर्ज असल्याची माहिती काकडे यांनी प्रतिज्ञापत्राद्वारे निवडणूक आयोगाला दिली आहे. दरम्यान, त्यांचे राष्ट्रवादी काँग्रेसचे (शरद पवार) प्रतिस्पर्धी उमेदवार श्रीकांत पाटील यांच्याकडे ३७ कोटींची स्थावर आणि जंगम मालमत्ता असल्याचे त्यांनी नमूद केले आहे.
काकडे यांच्या नावाने १५३ कोटी २ लाख ७५ हजार २५६ रुपयांची स्थावर, जंगम मालमत्ता असून, ४० कोटी ९४ लाख रुपयांचे कर्ज थकीत आहे. शहरातील विविध भागांत त्यांचे बंगले, मोकळे भूखंड असून, दुबई येथे सुमारे साडेसात कोटींपेक्षा अधिक किमतीचा अलिशान बंगला असल्याचेही असल्याचे विवरण त्यांनी दिले आहे. मालमत्तेचे विवरण करताना साडेसात लाख रुपये रोख रक्कम हातात असल्याचे त्यांनी नमूद केले असून, विविध बँकांमधील बचत खाते, बाँड, शेअर्स, पोस्टल खाते, शस्त्र आणि इतर चल मालमत्तेनुसार ७८ कोटी ९५ लाख ६५ हजार ५३१ रुपयांची अधिकृत संपत्ती घोषित केली आहे. त्यापाठोपाठ मावळ तालुक्यात दोन मोकळे भूखंड असून, सध्याच्या बाजारमूल्यानुसार (रेडिरेकनर) ४७ कोटी ७८ लाख २१ हजार रुपयांचा आणि दुसरा भूखंड एक कोटी २९ लाख १६ हजार रुपयांचा असल्याचे म्हटले आहे.
दरम्यान, मुंढवा येथे ८ कोटी १२ लाख ५० हजार रुपयांचां मोकळा भूखंड, पाषाण येथे चार हजार ४४४ चौरस फुटांची सदनिका, दुबई येथे बाजारभावाप्रमाणे सात कोटी ६६ लाख ६६ हजार ७२५ रुपये किमतीचा १५५० चौरस फुटांचा बंगला विक्रम यांच्या नावावर आहे. पाषाण येथे सध्याच्या रेडीरेकनर दरानुसार नऊ कोटी १९ लाख ५६ हजार रुपये किमतीचा बंगला त्यांच्या पत्नीला बक्षीस म्हणून दिल्याचे प्रतिज्ञापत्रात नमूद स्पष्ट केले आहे. विक्रम बारावी उत्तीर्ण असून, ते बांधकाम व्यावसायिक आहेत. त्यांच्या नावावर दोन गुन्हे दाखल आहेत. तर, ४० कोटी ९४ लाख रुपये किमतीचे कर्ज असून, ९९ लाख ८१ हजार ४९८ रुपयांचा प्राप्तिकर देणे असल्याचे जाहीर केले आहे.
पाटील यांच्याकडे ३७ कोटींची संपत्ती
महाविकास आघाडीचे उमेदवार श्रीकांत विश्वनाथ पाटील आणि कुटुंबाकडे ३७ कोटी रुपयांची स्थावर आणि जंगम मालमत्ता आहे. पाटील यांच्या नावावर मद्यविक्री दुकान असून, एकूण संपत्तीपैकी तळेगाव दाभाडे येथे ३४ कोटी रुपयांची १७ एकर वडिलोपार्जित शेती असल्याचे त्यांनी म्हटले आहे.
विधानपरिषदेच्या निवडणुकीचे चित्र आज स्पष्ट
पुणे स्थानिक स्वराज्य संस्था मतदारसंघातील विधान परिषदेच्या निवडणुकीचे चित्र आज, गुरुवारी (४ जून) स्पष्ट होणार आहे. निवडणुकीसाठी अर्ज मागे घेण्याच्या पहिल्या दिवशी, बुधवारी (३ जून) एकाही उमेदवाराने माघार घेतलेली नाही. त्यामुळे अखेरच्या दिवशी कोण माघार घेणार, कोण निवडणूक लढणार, यावरच निवडणुकीचे चित्र अवलंबून असेल. दरम्यान, राष्ट्रवादी काँग्रेसचे (अजित पवार) माजी आमदार, शहराध्यक्ष सुनील टिंगरे उमेदवारी अर्ज मागे घेणार असले तरी, भाजपकडून इच्छुक असलेले जिल्हाध्यक्ष प्रदीप कंद यांची बंडखोरी कायम राहणार, की ते अर्ज माघारी घेणार हे गुरुवारी स्पष्ट होणार आहे.
