पुणे शहरातील विकास आराखड्यातील व अंतर्गत रस्त्यांच्या रुंदीवरून वाद असताना राज्य शासनाने शहरातील रस्त्यांच्या रुंदीबाबत स्पष्ट निर्णय घेतला आहे. या पुढील काळामध्ये विकास आराखडा करताना किमान नऊ मीटर रुंद रस्ता ठेवण्याची तरतूद केली आहे, तर महापालिका आणि ‘पीएमआरडीए’च्या हद्दीत १८ मीटर रुंदीच्या रस्त्यांची तरतूद करण्यात आली आहे. त्यामुळे विकास आराखड्यात दर्शविण्यात आलेली रस्त्यांची रुंदी कमी करण्याचा प्रश्‍न यामुळे मार्गी लागणार आहे.
महाराष्ट्र शासनाच्या पावसाळी अधिवेशनात राज्य सरकारकडून महाराष्ट्र प्रादेशिक नियोजन व नगररचना अधिनियमात (एमआरटीपी ॲक्ट १९६६) बदल करीत नव्याने काही तरतुदींचा समावेश करण्यात आला आहे. महाराष्ट्र राज्यातील कोणत्याही स्थानिक स्वराज्य संस्थांना हद्दीचा विकास आराखडा किंवा नगररचना योजनेचा आराखडा तयार करण्यापूर्वी संरचना आराखडा (स्ट्रक्चर प्लॅन) करण्याचे अधिकार दिले असली तरी सुद्धा नागरीकरणाचा वेग लक्षात घेऊन काही निर्देश पाळण्याचे बंधनकारक केले आहे. पुणे महापालिकेच्या हद्दीत विकास आराखड्यातील रस्ते रुंद करणे, सहा मीटर रुंदीचे रस्ते नऊ मीटर रुंद करणे आदी विषयांवरून नेहमीच वाद होतो. वाढते शहरीकरण आणि रस्त्याची अरुंद रुंदी त्यातून अनेक प्रश्‍न निर्माण होतात आणि स्थानिक नागरिकांना नित्य नियमाने वाहतूक कोंडीचा त्रास नागरिकांना सहन करावा लागतो. राज्य शासनाने घेतलेल्या निर्णयामुळे पुणे शहरातील रस्त्यांच्या रुंदीवरून निर्माण होणारे वाद कमी होण्यास मदत होणार आहे.
समाविष्ट गावांत होणार लागू
राज्य शासनाने घेतलेल्या या निर्णयामुळे ‘पीएमआरडीए’च्या हद्दीच्या हाती घेण्यात येणाऱ्या संरचना आराखड्यात किमान १८ मीटर रुंदीचे रस्ते प्रस्तावित करावे लागणार आहे, तर महापालिकेलादेखील नव्याने समाविष्ट झालेल्या ३२ गावांच्या विकास आराखड्यात रस्त्यांची रुंदी निश्‍चित करताना या बाबींचा विचार करावा लागणार आहे, असे नगर विकास विभागाच्या अधिकाऱ्यांनी माध्यमांशी बोलताना सांगितले.
राज्य शासनाच्या नव्या नियमावलीत अशा आहेत तरतुदी
- नगर पंचायत व बिगर नगरपालिका क्षेत्र विकास आराखडे तयार करताना रस्त्यांची किमान रुंदी ९ मीटर व त्यापेक्षा अधिक ठेवण्याचे बंधन
- ‘ब’ व ‘क’ नगर परिषदांच्या हद्दीत रस्त्यांची रुंदी ही किमान १२ मीटर व त्यापेक्षा अधिक ठेवण्याचे बंधन
- ‘अ’ वर्ग नगर परिषदा आणि ‘ड’ वर्ग महापालिकेच्या हद्दीत किमान १५ मीटर व व त्यापेक्षा अधिक ठेवण्याचे बंधन
- इतर सर्व नव्याने होणाऱ्या प्राधिकरणाच्या हद्दीत किमान १८ मीटर रुंदीचे रस्ते आराखड्यात दर्शविणे आवश्‍यक
पुणे महानगरपालिकेच्या हद्दीतील रस्त्यांची आकडेवारी–
- पुणे शहरात सध्या २१०० किलोमीटर लांबीचे रस्ते उपलब्ध
- पुणे महापालिका कार्यक्षेत्रात १०० किलोमीटरचे रस्ते कच्चे
- पुणे शहरात ४०० किलोमीटर लांब रस्ते सिमेंटकाँक्रीट
- पुणे महापालिका कार्यक्षेत्रात ९०० किलोमीटर रस्ते डांबरी
- समाविष्ट ३२ गावांमध्ये ७०० किलोमीटरचे रस्ते (राज्य शासन पंचायत समिती व ग्रामपंचायत निधी मार्फत काही रस्ते सिमेंटीकरण)
