अवघ्या साडेतीन वर्षांच्या एका चिमुकलीवर ६५ वर्षांच्या सराईताने अत्याचार करून दगडाने ठेचून खून केल्याची अत्यंत घृणास्पद घटना नसरापूर येथे शुक्रवारी उशिराने उघडकीस आली. या घटनेनंतर नसरापूर परिसरात संतापाची लाट उसळली असून, पोलिसांनी अवघ्या दोन तासांत आरोपीला अटक केली आहे. आरोपीला ताब्यात द्या; अन्यथा एन्काउंटर करा, हीच मागणी नसरापूर परिसरातून केली जात आहे. या प्रकरणात राजगड पोलिसांनी तत्काळ कार्यवाही करून आरोपी भीमराव कांबळे (वय ६५, रा. भोर) याला अटक केली असून, आरोपी बिगारी कामगार आहे. त्याला शिवाजीनगर येथील पुणे न्यायालयाने सात मेपर्यंत पोलिस कोठडी सुनावली. या नराधमाने या चिमुकलीचा मृतदेह गुरांच्या गोठ्यात पालापाचोळ्याखाली लपवला होता.
पीडित मुलीच्या मृतदेहाचे शवविच्छेदन शनिवारी सायंकाळी ससून रुग्णालयात करण्यात आले. न्यायवैद्यक विभागात ही प्रक्रिया गोपनीय पद्धतीने पार पडली; तसेच ही संपूर्ण प्रक्रिया ‘इन कॅमेरा’ करण्यात आली. प्राथमिक अहवाल पोलिसांकडे देण्यात आला आहे. मृतदेह शनिवारी रुग्णालयात आणण्यात आला होता. या वेळी रुग्णालय परिसरात पोलिस बंदोबस्त ठेवण्यात आला होता.
पंचनामा झाल्यानंतर सायंकाळी पाचच्या सुमारास शवविच्छेदन करण्यात आले. त्यानंतर मृतदेह नातेवाइकांच्या ताब्यात देण्यात आला. अंतर्गत अवयवांचे नमुने तपासणीसाठी ठेवण्यात आले असून, ते पुढील तपासासाठी प्रयोगशाळेत पाठविण्यात येणार असल्याची माहिती रुग्णालयाचे वैद्यकीय अधीक्षक डॉ. येल्लपा जाधव यांनी सांगितले.
दरम्यान, नराधमाच्या अनन्वित अत्याचारात जीव गमावलेल्या चिमुकलीचे शव सायंकाळी साडेचारच्या सुमारास धायरी परिसरातील तिच्या घरी आणण्यात आले. उन्हाळ्याच्या सुट्ट्यांनिमित्त नसरापूरला आजोळी गेलेल्या तीन महिन्यांच्या चिमुकलीवर नराधमाने अत्याचार करून तिचा खून केला. या अमानवी कृत्याच्या निषेधार्थ परिसरातील रहिवासी मोठ्या संख्येने गोळा झाले. ‘नराधमाला फाशीची शिक्षा झालीच पाहिजे’, ‘न्याय मिळालाच पाहिजे,’ ‘आश्वासन नको, कारवाई हवी,’ ‘प्रशासन जागे व्हा’ अशा घोषणा जमावाने दिल्या. परिसरातील व्यापाऱ्यांनी दुकाने बंद ठेवली होती. आरोपीला आमच्या ताब्यात द्या किंवा त्याला फाशीची शिक्षा द्या, असा पवित्रा आंदोलकांनी घेतला.
सायंकाळी पश्चिम बाह्यवळण मार्गावरही आंदोलकांनी ‘रास्ता रोको’ केले. वीर बाजी पासलकर पूल आणि नवले पुलादरम्यान एका हॉटेलसमोर आंदोलन करण्यात आले. चिमुकलीचा मृतदेह असलेल्या रुग्णवाहिकेसमोरच तिचे आई-वडील व नातेवाइकांच्या उपस्थितीत जमावाने ठिय्या दिला. घोषणांनी परिसर दणाणून गेला. अखेर पोलिसांनी बळाचा वापर करून त्यांना हटवले. त्यानंतर बालिकेचा मृतदेह वैकुंठ स्मशानभूमीकडे नेण्यात आला.
