पुणे, ता. १७ : पावसाळ्याच्या पार्श्वभूमीवर पुणे शहरातील आपत्ती व्यवस्थापन अधिक सक्षम करण्यासाठी, नाला सफाई, राडारोडा व्यवस्थापन तसेच संभाव्य पूरस्थिती टाळण्यासाठी करण्यात येणाऱ्या उपाययोजनांचा आढावा घेण्यासाठी नगरविकास राज्यमंत्री माधुरी मिसाळ यांच्या अध्यक्षतेखाली महत्त्वपूर्ण बैठक पार पडली.
बैठकीस विधान परिषदेच्या उपसभापती व आमदार नीलम गोऱ्हे, वडगाव शेरीचे आमदार बापूसाहेब पठारे, हडपसरचे आमदार चेतन तुपे, कसबा मतदारसंघाचे आमदार हेमंत रासने, खडकवासला मतदारसंघाचे आमदार भीमराव तापकीर यांच्यासह महापालिका आणि प्रशासनातील वरिष्ठ अधिकारी उपस्थित होते.
बैठकीमध्ये शहरातील आपत्ती व्यवस्थापन अधिक प्रभावी करण्यासाठी विविध उपाययोजनांवर सविस्तर चर्चा करण्यात आली. नाला सफाईची कामे वेळेत आणि गुणवत्तापूर्ण पद्धतीने पूर्ण करण्याबाबत, राडारोडा व्यवस्थापन अधिक सक्षम करण्याबाबत तसेच मुसळधार पावसामुळे पूरस्थिती निर्माण होऊ नये यासाठी आवश्यक प्रतिबंधात्मक उपाययोजना तातडीने राबविण्याचे निर्देश संबंधित यंत्रणांना देण्यात आले.
यावेळी उपस्थित आमदारांनी आपल्या मतदारसंघातील विकासकामे आणि प्रलंबित प्रकल्पांचा आढावा घेत स्थानिक समस्या मांडल्या. घनकचरा व्यवस्थापनाच्या संदर्भात कचरा डेपो परिसरातील नागरिकांना भेडसावणाऱ्या अडचणींवरही चर्चा झाली. शहरातील कचरा संकलन क्षमता वाढविणे, कचरा व्यवस्थापन अधिक कार्यक्षम करणे आणि नवीन कचरा संकलन डेपोसाठी जागा उपलब्ध करण्याच्या पर्यायांवर विचारविनिमय करण्यात आला.
याशिवाय शहरातील सार्वजनिक स्वच्छतागृहांची दुरुस्ती, देखभाल आणि वाढत्या लोकसंख्येच्या गरजेनुसार नवीन सार्वजनिक स्वच्छतागृहे उभारण्याबाबतही बैठकीत महत्त्वपूर्ण चर्चा करण्यात आली. नागरिकांना पावसाळ्यात कोणतीही गैरसोय होऊ नये आणि शहरातील मूलभूत सुविधा अधिक सक्षम व्हाव्यात, यासाठी विविध विभागांनी समन्वयाने काम करण्याच्या सूचना यावेळी देण्यात आल्या.
