सोलापूर विधान परिषदेच्या निवडणुकीसाठी भाजपचे प्रदेशाध्यक्ष रवींद्र चव्हाण यांच्या उपस्थितीत बैठकीला सोलापूर जिल्ह्यातील राष्ट्रवादी कॉंग्रेस ( शरद पवार ) पक्षाचे तीन आमदार उपस्थित होते. विशेष म्हणजे हे तिन्ही आमदार राष्ट्रवादीच्या उमेदवारावर नाराज झाले आहेत. तर, सांगोल्याचे शेकापचे आमदार बाबासाहेब देशमुख हे देखील उपस्थित राहिले त्यामुळे ही निवडणूक आता रंगतदार झाली आहे. आता पाठिंबा दिलेल्यांचे मतामध्ये किती रूपांतर होणार हे पाहणे औत्सुक्याचे आहे. सोलापूर जिल्ह्यातील अनेकांचा पाठिंबा मिळत आहे. स्थानिक स्वराज्य संस्थेची ही निवडणूक आहे. येथील नगरसेवक, सदस्य यांचे प्रश्न सोडविण्यासाठी तसेच सत्ताधारी व विरोधकांना न्याय देणारा भाजपचा उमेदवार आहे. जिल्ह्याने विकासासाठी एकत्र येण्याचा पायंडा चांगला आहे असे भाजपचे प्रदेशाध्यक्ष चव्हाण यांनी केले.
माजी आमदार परिचारक यांची दांडी
माजी आमदार प्रशांत परिचारक हे इच्छुक होते. मात्र त्यांचा ऐनवेळी पत्ता कट केला. त्यामुळे परिचारकसमर्थक नाराज झाले. त्यांची नाराजी दूर करण्यासाठी पालकमंत्री गोरे यांनी भेट घेऊन दूर केली. बुधवारी पंढरपुरात भाजप नगरसेवक, सदस्यांची बैठक घेतली होती. विशेष म्हणजे परिचारक यांची पंढरपूर, मंगळवेढा, मोहोळ, माढा येथे दांडगा जनसंपर्क आहे. असे असताना परिचारक हे या बैठकीला गैरहजर राहिल्याने अनेक तर्क-वितर्क लढविले जात आहे.
पवारांचे ३ आमदार भाजप पक्षात प्रवेश करणार का?
पालकमंत्री जयकुमार गोरे, भाजप आमदार सचिन कल्याणशेट्टी, माजी आमदार राम सातपुते, शिवसेना शिंदे पक्षाचे खासदार ज्योती वाघमारे यांच्यासोबत राष्ट्रवादी शरद पवार पक्षातील तीन आमदार महायुतीच्या बैठकीला आले. राष्ट्रवादी शरद पवार पक्षाचे माढाचे आमदार अभिजीत पाटील, करमाळाचे आमदार नारायण पाटील, माळशिरसचे आमदार उत्तम जानकर या तीन आमदारांची महायुतीच्या बैठकीला उपस्थिती होती. विशेषतः राष्ट्रवादी शरद पवार पक्षाचे आमदार भाजप प्रदेशाध्यक्ष रवींद्र चव्हाण, पालकमंत्री जयकुमार गोरे यांच्यासोबत बैठकीला चालत आले. विधान परिषद निवडणुकी अगोदर राष्ट्रवादी शरद पवार पक्षाचे तीन आमदार भाजप प्रवेश करणार आहेत का? अशा चर्चा राजकीय वर्तुळात वर्तवल्या जात आहेत.
