महापालिका प्रशासनाने यंदा पावसाळा लांबल्याने पाणी पुरवठ्यामध्ये २५ टक्के कपात करण्याचा निर्णय घेतला असून सोमवारपासून (१५ जून) शहरात सम-विषम तारखेनुसार एक दिवसाआड पाणीपुरवठा केला जाणार आहे. यासंदर्भात महापालिकेने वेळापत्रक जाहीर केले असून वॉशिंग सेंटरला व जलतरण तलावांच्या पाणीवापरावर निर्बंध घातले आहेत.
खडकवासला धरणसाखळीत सध्या केवळ ५.०३ टीएमसी पाणी शिल्लक असून त्यापैकी सुमारे ३ टीएमसी पाणी पुणे शहरासाठी उपलब्ध आहे. भारतीय हवामान विभागाने यंदा सरासरीपेक्षा कमी पावसाची शक्यता व्यक्त केली आहे. त्याचबरोबर अल्-निनोच्या प्रभावामुळे पर्जन्यमानावर प्रतिकूल परिणाम होण्याची शक्यताही वर्तविली आहे. या पार्श्वभूमीवर महापालिकेने पाणीवापरावर निर्बंध घालून २५ टक्के पाणी बचत करण्याचा निर्णय घेतला आहे.
पाण्यासंदर्भात महापौर मंजूषा नागपुरे, सभागृहनेते गणेश बिडकर, स्थायी समितीचे अध्यक्ष श्रीनाथ भिमाले आणि अतिरिक्त आयुक्त पवनीत कौर आणि पाणीपुरवठा विभागाचे प्रमुख नंदकिशोर जगताप यांनी गुरुवारी पत्रकार परिषदेत माहिती दिली. सध्या महापालिका दररोज सुमारे १६०० एमएलडी पाणी उचलते. या पाणी कपातीनंतर पाणी उचलण्याचे प्रमाण ११०० एमएलडीवर येईल, अशा विश्वास अति. आयुक्त कौर यांनी व्यक्त केला. पाणी कपातकीसंदर्भात प्रशासने सम व विषम तारखेनुसार शहराचे वेळापत्रक जाहीर केले असून, हे वेळापत्रक महापालिकेच्या संकेतस्थळावर उपलब्ध करून देण्यात आले आहे. या वेळापत्रकानुसार पाणीपुरवठा होणार आहे.
वेळापत्रकातून या भागाला वगळले
शहरातील कोथरूड, शिवाजीनगर व मध्य भागात दररोज पाणीपुरवठा होते. मात्र, शहराच्या उपनगरांमध्ये दररोज पाणीपुरवठा होत नाही. अनेक भागांत कमी दाबाने पाणीपुरवठा होतो. त्यामुळे एक दिवसाआड पाणीपुरवठा झाल्यानंतर या भागातील नागरिकांची अडचण होणार आहे. ही बाब लक्षात घेऊन मागील काही दिवसांपासून गढूळ व दूषित पाणीपुरवठा होत असलेल्या शहराच्या पूर्व भागासह फुरसुंगी, मांजरी, वाघोली, नांदोशी, नऱ्हे, आंबेगाव, केशवनगरचा काही भाग, कात्रज आदी भागांना वेळापत्रकातून वगळण्यात आले आहे.
वॉशिंग सेंटरला व जलतरण तलावांवर निर्बंध
महापालिकेने नागरिकांना पाण्याचा काटकसरीने वापर करण्याचे आवाहन करतानाच वॉशिंग सेंटरला व जलतरण तलावांवर निर्बंध घालण्यात आले आहेत. महापालिकेने या अस्थापनांना पाणी वापरण्यास बंदी घातलेली असून कोणी याचा भंग केल्यास त्याच्यावर कडक कारवाई केली जाणार आहे. तसेच सोसायट्यांमध्येही कोणी वाहने धुताना दिसल्यास त्यांच्यावरही कारवाई करण्यात येणार आहे, यासाठी पथके नेमण्यात येणार आहे. उद्यानांसाठी किंवा बांधकामासाठी पिण्याचे पाणी वापरता येणार नाही, असेही अतिरिक्त आयुक्त कौर यांनी स्पष्ट केले.
टँकर व्यावसायिकांनी अडवणूक केल्यास गुन्हे
शहराच्या ज्या भागात पाणीपुरवठा होणार नाही, त्या दिवशी आवश्यकतेनुसार टँकरद्वारे पाणीपुरवठा करण्याची जबाबदारी अभियंत्यांवर दिली आहे. नागरिकांना पाण्याचा तुटवडा जाणवू नये यासाठी प्रशासनाने पर्यायी व्यवस्था तयार ठेवली आहे. मात्र, पाणीटंचाईच्या काळात टँकर व्यावसायिकांकडून नागरिकांची अडवणूक किंवा कृत्रिम टंचाई निर्माण करण्याचा प्रयत्न झाल्यास संबंधितांवर गुन्हे दाखल करण्यात येतील. टँकरचालक किंवा व्यावसायिक कोणत्याही राजकीय पक्षाशी संबंधित असो, सर्वांसाठी नियम समान राहतील. नागरिकांची अडवणूक खपवून घेतली जाणार नाही, असा इशारा यावेळी महापौर नागपुरे व सभागृहनेते बिडकर यांनी दिला.
नवीन वेळापत्रकाच्या अंमलबजावणीच्या पहिल्या आठवड्यात काही अडचणी येऊ शकतात. त्यासाठी उपअभियंते आणि विभागीय अधिकारी फोनवर चोवीस तास उपलब्ध राहतील. सोमवारपासून वॉशिंग सेंटर्स बंद करण्यात येतील. व्यवस्था सुरळीत झाल्यानंतर नियमांचे उल्लंघन करणाऱ्यांवर कठोर कारवाई केली जाईल.
– पवनीत कौर, अतिरिक्त आयुक्त, महापालिका.
पुणे महापालिकेचे आवाहन
- – पाण्याचा काटकसरीने वापर करा.
- – पाण्याच्या टाक्या ओव्हरफ्लो होणार नाहीत याची दक्षता घ्यावी.
- – घरगुती वापरातील ‘ग्रे वॉटर’चा पुनर्वापर करावा.
- – गळती आढळल्यास तत्काळ महापालिकेला कळवावे.
सम तारखेला पाणीपुरवठा होणार विभाग-
– चतुःशृंगी विभाग –
आपटे रोड, भांडारकर रोड, प्रभात रोड, लॉ कॉलेज रोड, डेक्कन जिमखाना, शिवाजीनगर गावठाण, एरंडवणे गावठाण, मॉडेल कॉलनी, हनुमाननगर, वडारवाडी, रेव्हेन्यू कॉलनी, बोपोडी, भोसलेनगर, अशोकनगर, रेंज हिल, खैरेवाडी, बालेवाडी, मोहननगर, धनकुडे वस्ती, बाणेर गावठाण, सुतारवाडी, पाषाण, सुस रोड, पंचवटी, म्हाळुंगे गाव, खडकी कॅन्टोन्मेंट परिसर.
– एसएनडीटी विभाग –
वारजे माळवाडी, कवेनगरचा काही भाग, रामनगर, शिवणे, उत्तमनगर, न्यू कोपरे, कोंढवे धावडे, कोथरूडमधील लक्ष्मीनगर.
– पर्वती विभाग –
बालाजीनगर, पुण्याईनगर, कोंढवा बुद्रुक, साईनगर, गजानन महाराजनगर, शांतीनगर, येवलेवाडी, पिसोळी रोड, कात्रज चौक ते भारती विद्यापीठ परिसर, धनकवडी गावठाण, साईदत्तनगर, रामचंद्रनगर, तळजाई पठार.
– सिंहगड रोड विभाग –
साईनगर, खोराड वस्ती, महादेवनगर, आनंद विहार, विठ्ठलवाडी, हिंगणे खुर्द, रामनगर, निरंजन पार्क, माणिकबाग, सनसिटी रोड, दौलतनगर, एकतानगरी, नांदेड फाटा, पीएमएवाय परिसर.
– स्वारगेट विभाग –
काशेवाडी, लोहियानगर, सहकारनगर, बुधवार पेठ, रविवार पेठ, सोमवार पेठ, गणेश पेठ, शुक्रवार पेठ, कसबा पेठ, रास्ता पेठ, सदाशिव पेठ, नारायण पेठ, शनिवार पेठ, गुरुवार पेठ, महात्मा फुले पेठ, घोरपडे पेठ, मोमीनपुरा, नवी पेठ, दत्तवाडी, पुणे स्टेशन परिसर.
– बंडगार्डन विभाग –
शंकरनगर, चौधरी वस्ती, सताव वस्ती, पंढरीनगर, बोराटे वस्ती, खराडी बायपास परिसर, खुळेवाडी, चंदननगर, येरवडा गावठाण, गांधीनगर, नेताजीनगर, भीमाशंकर वसाहत, हरिगंगा परिसर.
विषम तारखेला पाणीपुरवठा होणार विभाग-
– चतुःशृंगी विभाग –
जनवाडी, वैदूवाडी, गोखलेनगर, श्रमिकनगर, आशानगर, चिंखलवाडी, एनसीएल परिसर, अभिमानश्री सोसायटी, चव्हाणनगर, औंध गाव, इंदिरा वसाहत, कस्तुरबा वसाहत.
– एसएनडीटी विभाग
संपूर्ण कोथरूड (लक्ष्मीनगर वगळून), बावधन खुर्द, बावधन बुद्रुक, एरंडवणे.
– पर्वती विभाग
संतोषनगर, दत्तनगर, आंबेगाव खुर्द, वाघजाईनगर, हनुमाननगर, जांभुळवाडी रोड, टेलको कॉलनी, लेक व्हिस्टा, तुकारामनगर, कात्रज गावठाण, गुजरवाडी फाटा, आनंदनगर, महादेवनगर, सुखसागरनगर, पद्मावती, चैतन्यनगर, आंबेगाव पठार, सहकारनगरचा काही भाग, धायरी, वडगाव, जाधवनगर.
– बिबवेवाडी विभाग
वसंतबाग, हमालनगर, इंदिरानगर, महर्षीनगर, गंगाधाम, बिबवेवाडी गावठाण, लोअर इंदिरानगर, चितामणीनगर, पद्मावती, तळजाई वसाहत, संभाजीनगर, शंकर महाराज वसाहत, प्रसन्न सोसायटी, गंगाधाम परिसर, गणेशनगर, स्वामी समर्थनगर, पवननगर, पर्वती-परिसर, पर्वती गावठाण, लक्ष्मीनगर, शिवदर्शन, आंबेडकर वसाहत, वाळवेकरनगर, मित्रमंडळ कॉलनी, सहकारनगर क्रमांक २
– दत्तवाडी विभाग
जनता वसाहत, दांडेकर पूल, फरशी पूल, दत्तवाडी, पानमळा, राजाराम पूल परिसर, नवशा मारुती, आंबेडकर वसाहत.
– बंडगार्डन विभाग
खराडी, ईऑन आयटी पार्क, चंदननगर, वडगाव शेरी, सोमनाथनगर, सोपाननगर, संगमवाडी, कल्याणीनगर, रामनगर, अशोकनगर, नगर रोड परिसर.
