भाजपच्या मंजुषा नागपुरे यांची पुण्याच्या महापौर पदी, तर भाजप – रिपब्लिकन पक्षाचे (आठवले गट) परशुराम वाडेकर यांची उपमहापौरपदी बिनबिरोध निवड करून श्री गणेशा करण्यात आला असला तरी सुद्धा सत्ताधारी आणि विरोधक दोन्ही सभासदांनी आपली भूमिका प्रखरपणे मांडल्याने ‘पुणेरी तडका’ घेत सभागृहाच्या कामकाजाला सुरुवात झाली. काँग्रेस व राष्ट्रवादी काँग्रेस पक्षाने महापौर व उपमहापौर पदाच्या निवडणुकीतून माघार घेतल्यानंतर नागपुरे यांच्या महापौर पदाचा तर, वाडेकर यांचा उपमहापौर पदाचा मार्ग मोकळा झाला.
पुणे महानगरपालिकेमध्ये भारतीय जनता पक्षाला बहुमत मिळालं असलं तरीसुद्धा विरोधातील अनुभवी चेहरे आणि खडे वक्ते या सर्वांचा मिलाप आजच्या पहिल्या सर्वसाधारण सभेमध्ये प्रकर्षाने जाणवला असून आगामी काळात भारतीय जनता पक्षाला नियुक्ती करताना प्रखर वक्ते आणि धोरणात्मक चेहरे निवडण्याशिवाय पर्याय राहिला नाही. भारतीय जनता पक्षाच्या वतीने उपमहापौर आणि महापौर यांची नियुक्ती केली असली तरीही सभागृहातील विरोधकांची रणनीती आजच्या तारखेला प्रखर असल्याने आगामी नियुक्त आणि निवडी मध्ये या सर्वाचा विचार करूनच भारतीय जनता पक्षाला ध्येय धोरण आखावी लागणार आहेत. भारतीय जनता पक्षाचे सभागृहात बहुमत असले तरीही पक्षाची भूमिका प्रखरपणे आणि आक्रमकपणे मांडण्यासाठी निवड करण्यात आलेले चेहरे तेवढे सक्षम नसल्याची जाणीव आजच्या सभेमध्ये प्रकर्षाने जाणवत होती. विरोधी बाकावरील सर्वच सदस्य कसलेले असल्याने आगामी सभागृहाच्या बैठकांमध्ये भारतीय जनता पक्षासाठी कसोटीचा काळ असण्याची शक्यता निर्माण झाली आहे. पुणेकर नागरिकांनी भारतीय जनता पक्षाला बहुमत दिले असले तरी सभागृहातील आपले वर्चस्व राखण्यासाठी भारतीय जनता पक्षाला स्वीकृत सदस्याच्या माध्यमातून अनुभवी चेहरे आणण्याशिवाय पर्याय राहिला नाही अन्यथा आगामी काळातील प्रत्येक सभेमध्ये विरोधकांचे वर्चस्व प्रकर्षाने जाणवणार आहे.
महापालिकेत सोमवारी सकाळी सव्वा अकरा वाजता महापौर व उपमहापौर पदाच्या निवडीच्या प्रक्रियेला सुरवात झाली. पीठासन अधिकारी जितेंद्र डूडी यांनी निवडणुकी प्रक्रियेला सुरुवात केली. तत्पूर्वी भाजपचे गटनेते गणेश बिडकर यांनी उपमुख्यमंत्री अजित पवार, ज्येष्ठ सामाजिक कार्यकर्ते डॉ.बाबा आढाव, काँग्रेसचे नेते सुरेश कलमाडी, माजी महापौर शांतीलाल सुरतवाला यांच्या निधनामुळे महापौर व उपमहापौर पदाची निवडणूक बिनविरोध करण्याची विनंती काँग्रेसचे गटनेते चंदुशेठ कदम, राष्ट्रवादी काँग्रेस पक्षाचे गटनेते नीलेश निकम यांना केली.
दरम्यान, प्रारंभी महापौर पदासाठी काँग्रेसच्या अश्विनी लांडगे, राष्ट्रवादी काँग्रेस पक्षाच्या शीतल सावंत व भाजपच्या मंजुषा नागपुरे यांचे अर्ज वैध ठरले. त्यानंतर पीठासन अधिकारी डूडी यांनी अर्ज माघार घेण्यासाठी १५ मिनिटांची वेळ दिली. या वेळेत भाजपच्या नेत्यांनी पुन्हा एकदा काँग्रेस राष्ट्रवादी काँग्रेसच्या नेत्यांशी चर्चा केली. प्रारंभी राष्ट्रवादीची काँग्रेस पक्षाच्या शीतल सावंत यांनी, त्या पाठोपाठ काँग्रेसच्या अश्विनी लांडगे यांनी निवडणुकीतून माघार घेतली. त्यानंतर मंजुषा नागपुरे यांची महापौर पदी बिनविरोध निवड झाल्याचे डूडी यांनी जाहीर केले. त्यानंतर नागपुरे यांची महापौर म्हणून निवड करण्यात आली.
दरम्यान, साडे अकरा वाजण्याच्या सुमारास उमपहौर पदाच्या निवडीसाठीची प्रक्रिया सुरू झाली. काँग्रेसकडून साहिल केदारी, राष्ट्रवादी काँग्रेस पक्षाकडून दत्ता बहिरट, तर भाजपकडून परशुराम वाडेकर यांचे अर्ज वैध ठरले. त्यानंतर बहिरट व केदारी यांनी उपमहापौर पदाच्या निवडणुकीतून माघार घेतली. त्यामुळे उपमहापौर पदी भाजप रिपब्लिकन पक्षाचे (आठवले गट) परशुराम वाडेकर यांची बिनविरोध निवड झाल्याचे पीठासन अधिकारी डूडी यांनी जाहीर केले. त्यानंतर वाडेकर यांची उपमहापौर म्हणून निवड करण्यात आली. त्यानंतर निवडणुकीचे कामकाज संपन्न झाल्याचे डूडी यांनी जाहीर केले. केंद्रीय मंत्री मुरलीधर मोहोळ यांनी नागपुरे व वाडेकर यांची सभागृहात उपस्थित राहून अभिनंदन केले.
