मुंबईहून पुण्याकडे जाणाऱ्या वाहनांसाठी ‘कनेक्टिंग लिंक’चे प्रवेशद्वार शनिवारी पहाटे खुले करण्यात आल्यानंतर प्रवाशांना या लिंकची भुरळ पडल्याचे दिसून आले.मे महिन्याच्या उन्हाळी सुट्टीतील पहिल्याच मोठ्या विकेंडच्या शनिवारीच नेहमीच कोंडी होणाऱ्या जलदगती द्रुतगती महामार्गावरील वाहतूक विरळ झाली. यामुळे मिसिंग लिंकचा प्रयोग यशस्वी झाल्याचे दिसून येत आहे.
मुंबई-पुणे द्रुतगती महामार्गावरील खंडाळा (बोर घाट) घाटमाथा परिसरात मुंबईहून पुण्याकडे जातानाचा मार्ग हा चढणीचा व नागमोडी वळणाचा असल्याने चढणीच्या ठिकाणी अवजड वाहनांचा वेग मंदावतो, तसेच अशा वेळी कारसारखी वाहने वाट मिळेल तशी सुसाट सुटताना चढणीच्या ठिकाणी अवजड वाहनांना चुकीच्या पद्धतीने ओव्हरटेक करताना दिसतात. यामुळे अवजड वाहनांची मोशन कमी होऊन ती बंद पडतात व त्यामुळे कोंडीत भरच पडते. यावर उपाय म्हणून, १८३०मध्ये ब्रिटिशांनी उभारलेला अमृतांजन पूल पाडण्याचा निर्णय घेण्यात आला. ५ एप्रिल २०२० रोजी नियंत्रित स्फोटांद्वारे तो पाडण्यात आला. तरीही वाहतूक कोंडीचा प्रश्न सुटला नाही.
अखेर वाढत्या वाहतूककोंडीची गंभीर समस्या आणि अपघातांना आळा घालण्यासाठी सरकारने पर्यायी मार्ग म्हणून घाटमाथा परिसरातून ‘कनेक्टिंग लिंक’ उभारण्याचा निर्णय घेतला. सर्व प्रकारच्या प्रतिक्रिया पार पाडत फेब्रुवारी २०१९मध्ये मिसिंग लिंकच्या कामाला सुरुवात झाली. साडेसहा वर्षांच्या कालावधीनंतर शुक्रवारी एक मे रोजी महाराष्ट्र दिन आणि कामगार दिनाचे औचित्य साधून ‘कनेक्टिंग लिंक’चे लोकार्पण करण्यात आले. एक मेच्या सुट्टीला जोडून शनिवार, रविवार असा मोठा विकेंड आल्याने उन्हाळी पर्यटनासाठी मुंबई-पुणे द्रुतगती महामार्गावरून प्रवासाला निघालेल्या पर्यटकांसह प्रवाशांना वाहतूककोंडीशी सामना करावा लागला.
मात्र, शनिवारी पहाटे मुंबईहून पुण्याकडे जाणाऱ्या वाहनांच्या प्रवासासाठी ‘कनेक्टिंग लिंक’चे प्रवेशद्वार खुले करण्यात आले आणि प्रवाशांचा उत्साह ओसंडून वाहताना दिसला. प्रवाशांना ‘कनेक्टिंग लिंक’ची भुरळ पडल्याचे दिसले. या लिंकचाच वापर झाल्याने नेहमीच वाहतूककोंडी होणाऱ्या जलदगती द्रुतगती महामार्गावरील वाहतूक विरळ झाल्याचे दिसून आले.
सेल्फी पॉइंटची धास्ती
‘कनेक्टिंग लिंक’चे नयनरम्य दृश्य व निसर्गरम्य वातावरणाचा अनुभव घेण्यासाठी हा दरीपूल सेल्फी पॉईंट होण्याची शक्यता वर्तवण्यात येत आहे. या ठिकाणी सेल्फीचा मोह झाल्यास अपघातांना आमंत्रण मिळण्याची भीती व्यक्त होत आहे. यासाठी प्रशासनाने उपाययोजना करण्याची मागणी होत आहे.
जगातील सर्वाधिक रुंदीचा बोगदा
पुणे ते मुंबई दरम्यान नव्याने साकारलेल्या ‘कनेक्टिंग लिंक’वर आशियातील सर्वाधिक २३.५० मीटर रुंदीच्या बोगद्याची ‘गिनेस बुक ऑफ वर्ल्ड रेकॉर्ड’मध्ये नोंद झाली आहे. वर्ल्ड रेकॉर्डच्या प्रतिनिधींनी त्याचे प्रमाणपत्र महाराष्ट्रदिनी मुख्यमंत्री देवेंद्र फडणवीस यांच्याकडे सुपूर्द केले
