हिंदवी स्वराज्याचे संस्थापक छत्रपती शिवाजी महाराज समस्त कोथरूड गावाचं आराध्य दैवत! पुणे महापालिका प्रशासनाच्या अक्षम्य दुर्लक्षामुळे हेच दैवत शिवजयंतीच्या पूर्वसंध्येला अपुऱ्या विद्युत व्यवस्थेमुळे अंधारात गेले असून २ महिन्यापूर्वी या भागातील दोन्ही ध्वनिक्षेपकाची चोरी झाल्याने उद्या शिवजयंतीची उद्घोषणा आणि शिव गीते भाड्याच्या आधारावरच करण्याची नामुष्की शिवभक्तांवर येणार आहे. पुणे शहरातील ‘सत्ताकेंद्र’ सध्या कोथरूडमध्ये असतानाही शिवप्रेमींच्या नशिबी निराशा येत असून सत्ताधारी लोकप्रतिनिधींच्या विषयी नागरिकांच्या मनामध्ये संतापाची चीड आहे. याबाबत प्रशासनाने त्वरित कारवाई न केल्यास युवराज आंदोलन करण्याचा इशारा कोथरूड मधील शिवप्रेमी नागरिकांनी दिला आहे.
कोथरूडगावाचा पुणे महापालिकेमध्ये समावेश झाल्यानंतर कोथरूड गावालगत असलेल्या मुख्य रस्त्यावर छत्रपती शिवाजी महाराजांच्या स्मारकाची निर्मिती करण्यात आली होती. तत्कालीन राष्ट्रपती ग्यानी झेहलसिंग यांच्या हस्ते हिंदुहृदयसम्राट बाळासाहेब ठाकरे यांच्या उपस्थितीमध्ये छत्रपती शिवाजी महाराजांच्या स्मारकांचे अनावरण झाल्यापासून समस्त कोथरूडकारांसाठी हे स्मारक अभिमान स्वाभिमान आणि सर्वस्व असताना पुणे महापालिका प्रशासनाच्या वतीने मात्र याकडे अक्षम्य दुर्लक्ष केले जात आहे. पुणे महापालिकेच्या वतीने स्मारकाची देखभाल करण्यासाठी विशेष निधीची तरतूद असताना सुद्धा या स्मारकासाठी आवश्यक असलेल्या गोष्टी पूर्तता करण्यात येत नाही; उलट पक्षी अधिकारी नागरिकांना लोक वर्गणी जमा करण्याचा सल्ला देत असल्याने पुणे महापालिका प्रशासनाच्या बाबत शिवप्रेमी मध्ये प्रचंड संताप आहे.
संपूर्ण महाराष्ट्रामध्ये शिवजयंती उत्सवात साजरी केली जात असताना कोथरूड मधील छत्रपतींच्या नशिबी मात्र पुणे महापालिकेच्या दुर्लक्षामुळे अंधार आल्याने भावना शिवप्रेमी मध्ये तप्त आहेत. पुणे महापालिका आयुक्तांच्या वतीने सजग प्रशासनाची ग्वाही दिली जात असताना कोथरूडकारांच्या नशिबी मात्र दप्तर दिरंगाई आली असल्याने यंदाची शिवजयंती तोकड्या विद्युत व्यवस्थेमध्ये करण्याशिवाय शिवप्रेमींकडे पर्याय राहिला नाही.
