विधान परिषदेच्या स्थानिक प्राधिकारी मतदारसंघाच्या निवडणुकीत उमेदवारी अर्ज मागे घेण्याच्या अखेरच्या दिवशी सहा मतदारसंघांत महायुतीच्या उमेदवारांची बिनविरोध निवड झाली. महाविकास आघाडी किंवा अपक्ष उमेदवारांच्या अर्ज माघारीचा महायुतीला फायदा झाला.कोकण व छत्रपती संभाजीनगर मतदारसंघातील माघार घेतलेल्या उमेदवारांची शिवसेना ठाकरे गटाने पक्षातून हकालपट्टी केली. काँग्रेसच्या उमेदवारांनी काही ठिकाणी माघार घेऊन पक्षाला धक्का दिला.
विधान परिषदेच्या स्थानिक प्राधिकारी मतदारसंघातील १७ जागांसाठी होणार्या निवडणुकीत महायुतीकडे संख्याबळ अधिक असल्याने भाजप, शिवसेना शिंदे व राष्ट्रवादी अजित पवार गटाला यश मिळणार हे निश्चित होते. तरीही महाविकास आघाडीने सर्व १७ जागांवर उमेदवार उभे करून आव्हान देण्याची भाषा केली होती. त्यातच महायुतीत धुसफूस झाली होती. काही मतदारसंघात महायुतीच्या मित्र पक्षांनी परस्परांविरोधात अर्ज दाखल केले होते. महायुतीतील वादाचा फायदा उठविण्याचा महाविकास आघाडीचा प्रयत्न होता. पण आघाडीच्या उमेदवारांनी परस्पर माघार घेतल्याने मविआला मोठा धक्का बसला.
ठाणे, रायगड-रत्नागिरी-सिंधुदुर्ग, यवतमाळ, चंद्रपूर-वर्धा-गडचिरोली, पुणे, अहिल्यानगर या सहा मतदारसंघांतील निवडणूक बिनविरोध झाली. या मतदारसंघांतील महाविकास आघाडीच्या उमेदवारांनी माघार घेतली. परिणामी ११ मतदारसंघांमध्ये १८ जूनला प्रत्यक्ष मतदान होईल.
कोकणात माघार नाट्य
रायगड-रत्नागिरी-सिंधुदुर्ग मतदारसंघात महायुतीतील राष्ट्रवादी व शिवसेनेत उमेदवारीवरून वाद झाला होता. त्यातच शिवसेना आमदार महेंद्र दळवी यांच्या कन्येने अपक्ष अर्ज भरला होता. महाविकास आघाडीत शिवसेनेने ही जागा प्रतिष्ठेची केली होती. पण लढत देण्याऐवजी ठाकरे गटाचे उमेदवार व माजी आमदार बाळ माने यांनी माघार घेतली. माघार घेताना मंत्री नितेश राणे हे माने यांच्याबरोबर असल्याने ठाकरे गटात अस्वस्थता पसरली. लगेचच बाळ माने यांची पक्षातून हकालपट्टी केल्याचे खासदार संजय राऊत यांनी जाहीर केले.
आघाडीत आरोप-प्रत्यारोप
आठ मतदारसंघांमध्ये मविआच्या उमेदवारांनी माघार घेतली. यामुळे महाविकास आघाडीला मोठा धक्का बसला. या माघारनाट्यावरून आघाडीतील घटक पक्षांमध्ये आरोप-प्रत्यारोप सुरू झाले. पुण्यात काँग्रेसने शरद पवार गटावर विश्वासघात केल्याचा आरोप केला.
ठाकरे गटाच्या डोणगावकर यांची हकालपट्टी
छत्रपती संभाजीनगरमध्येही ठाकरे गटाच्या देवयानी डोणगावकर यांनी माघार घेतल्याने त्यांचीही पक्षातून हकालपट्टी करण्यात आली. वर्धा-चंद्रपूरमध्ये अर्ज माघार घेताना काँग्रेस उमेदवाराने पक्षाच्या नेत्यांनाच दोष दिला. नाशिक मतदारसंघात शिवसेना शिंदे गटाचे नरेंद्र दराडे यांच्या विरोधात भाजपच्या बंडखोराने उमेदवारी अर्ज कायम ठेवल्याने तेथे चुरस आहे.
वर्धा-चंद्रपूर-गडचिरोलीतून लखानी बिनविरोध
वर्धा-चंद्रपूर-गडचिरोली मतदारसंघातून भाजपचे अरुण लखानी हे बिनविरोध निवडून आले. त्यांच्या विरोधातील काँग्रेस उमेदवाराने माघार घेतली. लखानी हे राष्ट्रवादीच्या खासदार सुप्रिया सुळे यांचे होणारे व्याही आहेत. पुढील आठवड्यात सुप्रिया यांच्या कन्येचा विवाह होणार आहे. लखानी हे मोठे उद्योगपती असून, भाजपचे पदाधिकारी आहेत.
बिनविरोध मतदारसंघ
- ठाणे- रवींद्र फाटक (शिवसेना शिंदे)
- रायगड-रत्नागिरी-सिंधुदुर्ग : अनिकेत तटकरे (राष्ट्रवादी अजित पवार गट)
- पुणे : विक्रम काकडे ( अजित पवार गट)
- यवतमाळ : दुष्यंत चतुर्वेदी (शिवसेना)
- वर्धा-चंद्रपूर-गडचिरोली : अरुण लखानी (भाजप)
- अहिल्यानगर : प्राजक्त तनपुरे (भाजप)
पक्षीय बलाबल
भाजप -२
शिवसेना शिंदे- २
राष्ट्रवादी अजित पवार- २
राज्यातील मतदारसंघातील प्रमुख लढती-
- सोलापूर : राजेंद्र राऊत (भाजप) विरुद्ध वसंतराव देशमुख (राष्ट्रवादी काँग्रेस शरदचंद्र पवार)
- जळगाव : नंदकिशोर महाजन (भाजप) विरुद्ध शरद तायडे (ठाकरेंची शिवसेना) विरुद्ध रेश्मा काळे (शिंदेंची शिवसेना बंडखोर)
- सांगली-सातारा : धैर्यशील कदम (भाजप) विरुद्ध अभयसिंह जगताप (राष्ट्रवादी काँग्रेस शरदचंद्र पवार ) विरुद्ध किशोर धुमाळ (अपक्ष)
- नांदेड : अमर राजूरकर (भाजप) विरुद्ध रामदास पाटील (काँग्रेस)
- भंडारा-गोंदिया : नरेश ईश्वरकर (काँग्रेस पाठिंबा) विरुद्ध अविनाश ब्राह्मणकर (भाजप)
- नाशिक : गोकुळ गीते (अपक्ष) विरुद्ध नरेंद्र दराडे (शिवसेना)
- अमरावती : हर्षदीप देशमुख (काँग्रेस) विरुद्ध प्रवीण पोटे (भाजप) विरुद्ध निलेश विश्वकर्मा (वंचित )
- धाराशिव-लातूर-बीड : बसवराज पाटील (भाजप) विरुद्ध महेश देशमुख (काँग्रेस)
- परभणी-हिंगोली : सईद खान (शिवसेना) विरुद्ध डॉ. विवेक नावंदर (ठाकरेंची शिवसेना) विरुद्ध सुशील देशमुख (अपक्ष)
- छत्रपती संभाजीनगर-जालना : सुहास शिरसाट (भाजप) विरुद्ध गणेश लोखंडे (ठाकरेंची शिवसेना)
- नागपूर (पोटनिवडणूक) : डॉ. राजीव पोतदार (भाजप) विरुद्ध अतुल लोंढे (काँग्रेस)
उमेदवारी अर्ज मागे घेतलेल्या उमेदवारांची नावे
- कोकण : बाळ माने, ठाकरेंची शिवसेना माघार
- पुणे : सुनील टिंगरे राष्ट्रवादी काँग्रेस माघार
- नाशिक : गणेश गीते अपक्ष- भाजप माघार घेणार
- अहिल्यानगर : करण ससाणे, अपक्ष-काँग्रेस माघार
- ठाणे – अभिजीत पवार, राष्ट्रवादी काँग्रेस माघार
- यवतमाळ : सय्यद फारूक, अपक्ष-मविआ
- नांदेड : प्रवीण पाटील चिखलीकर
- छत्रपती संभाजीनगर : समीर सत्तार
- पुणे – भाजप बंडखोर प्रदीप कंद
- नागपूर- सुरेंद्र लोही, शेकाप
- सांगली सातारा – तानाजीराव पाटील, शिवसेना माघार घेणार
- कोकण :अरविंद म्हात्रे , शेकाप
- मानसी म्हात्रे यांचे नामनिर्देशन पत्र मागे
- सोलापूर – ठाकरे गटचे धनंजय डिकोळे अर्ज माघार, शिंदे गटाचे नेते, अपक्ष उमेदवार महेश साठे अर्ज माघार
- सांगली सातारा – तानाजी पाटील यांचा अपक्ष उमेदवारी अर्ज मागे
- जळगाव – शिवसेना शिंदे गटाच्या रेश्मा काळे
- अहिल्यानगर – कमलेश हस्तमल गांधी यांनी देखील घेतली माघार
- परभणी – भाजपचे बंडखोर विश्वजीत बुधवंत यांचाही अर्ज मागे
