महाराष्ट्रात नुकत्याच पार पडलेल्या दोन पोटनिवडणुकीच्या निकालाकडे महायुती सध्या राहुरीमध्ये विजयासाठी आणि बारामती विधानसभा मतदारसंघांमध्ये विक्रमासाठी आस लावून बसलेली असताना महायुतीच्या पदरी मात्र धक्कादायक निकालामुळे निराशा येण्याची शक्यता झाली आहे. बारामती विधानसभा मतदारसंघांमध्ये विक्रमी मताधिक्य ही माहितीची अपेक्षापूर्ती घटलेल्या टक्केवारीमुळे संकटात आली आहे तर हमखास विजय साध्य करण्यासाठी प्रचंड खेळी केलेल्या राहुरी विधानसभा मतदारसंघातही ‘विजय’ मिळेल की नाही? ही शंका मतदानाच्या दिवशी झालेल्या घटनाक्रमामुळे निर्माण झाली आहे.
राहुरी विधानसभा मतदारसंघात महायुतीप्रमाणे महाविकास आघाडी यांनी सुद्धा तोडीस तोड राजकीय खेळी केल्यामुळे ‘एकतर्फी’ मतदान अशक्य असल्याची जाणीव सर्वच पदाधिकाऱ्यांना झाली होती. भारतीय जनता पक्ष व राष्ट्रवादी काँग्रेस शरदचंद्र पवार पक्षाच्यावतीने थेट लढत होत असली तरी सुद्धा पडद्यामागील धक्कादायक घडामोडी मुळे या विधानसभा मतदारसंघाच्या निकालाकडे सर्वांचे लक्ष लागले आहे. मुळात सहानुभूतीची लाट ‘ब्रेक’ करण्यामध्ये पारंगत असलेल्या गोविंद मोकाटे यांनी अत्यंत सूक्ष्म नियोजन करून विजयात अडसर ठरणारे ‘तन’पुरे काढल्याने विजयाचे ‘पिकपाणी’ बहरण्याची शक्यता निर्माण झाली आहे.
राहुरी विधानसभा पोटनिवडणुकीसाठी माजी मंत्री प्राजक्त तनपुरे यांनी उमेदवारी नाही करायचा निर्णय घेतल्यानंतर, राष्ट्रवादी काँग्रेस पार्टी शरदचंद्र पवार पक्षाकडून ऐनवेळी गोविंद मोकाटे यांना उमेदवारी दिली. गोविंद मोकाटे यांची उमेदवारी प्रतिस्पर्धी भाजपला निवडणुकीत सोपी वाटली. परंतु त्यांचा पोटनिवडणुकीतील विजयाचा ‘ट्रॅक रेकाॅर्ड भारी’ आहे. तो राहुरी निकालापूर्वी चर्चेत आल्याने सत्ताधारी भाजप गोटात अस्वस्थता निर्माण करत आहे. यातच गोविंद मोकाटे यांच्याकडून वारंवार, विजय आपला होणार असल्याचे विधान होत असल्याने, निकालाची उत्सुकता अधिकच शिगेला पोहोचली आहे.
राहुरी पोटनिवडणुकीत भाजपचे (BJP) उमेदवार अक्षय कर्डिले, शरद पवार राष्ट्रवादीचे गोविंद मोकाटे, वंचितचे संतोष चोळके, शिवसेना ठाकरे सेना पक्षाचे बंडखोर रावसाहेब खेवरे यांच्यासह सात उमेदवार रिंगणात होते. यातच पोटनिवडणुकीत मतदानाचा टक्के खूपच घसरला आहे. तब्बल 55.89 टक्के मतदान झालं आहे.
भाजपने विजयासाठी पहिल्यापासून जोरदार तयारी केली आहे. मुख्यमंत्री देवेंद्र फडणवीस, प्रदेशाध्यक्ष रवींद्र चव्हाण, पालकमंत्री राधाकृष्ण विखे पाटील, मंत्री पंकजा मुंडे, विधान परिषदेचे सभापती प्रा. राम शिंदे यांच्यासह 40 स्टार प्रचारक मैदानात उतरवलं होतं. शरद पवार राष्ट्रवादीकडून खासदार नीलेश लंके मैदानात होते. वंचितकडून प्रकाश आंबेडकर आणि सुजात आंबेडकर मैदानात होते.
या नेत्यांनी राहुरी पोटनिवडणुकीचं वातावरण चांगलच तापवलं. परंतु मतदानाचा टक्का घसरला आहे. विधानसभा निवडणुकीवेळी राहुरीत 74 टक्के मतदान झाले होते. आता पोटनिवडणुकीत 55.89 टक्के मतदान झाले आहे. मतदानाचा घसरलेला आकडा हा चिंताजनक आहे.
राहुरी पोटनिवडणुकीत मतदानाचा टक्का घसरला
राहुरी पोटनिवडणुकीत 3 लाख 33 हजार 545 मतदान होते. त्यापैकी 1 लाख 86 हजार 504 मतदारांनी मतदानाचा हक्क बजावला आहे. महिला मतदारांचे प्रमाण अत्यंत कमी असून ते 84 हजार 414 एवढं आहे.
आता मतदानाची मोजणी चार मे रोजी होणार आहे. तत्पूर्वी गोविंद मोकाटे यांच्याकडून विजयाचे वारंवार उल्लेख होत आहे. हाच उल्लेख सत्ताधारी भाजपला अस्वस्थता करणारा ठरू लागला आहे. कारण गोविंद मोकाटे यांचे पोटनिवडणुकीतील ट्रॅक रेकाॅर्ड भारी आहे.
पोटनिवडणुकीतूनच मोकाटेंची राजकारणात एन्ट्री
गोविंद मोकाटे हे 2013 मध्ये पंचायत समितीच्या पोटनिवडणुकीला समोरे गेले होते. पंचायत समिती सदस्य रामदास आव्हाड यांच्या निधनाने ही पोटनिवडणूक झाली. भाजपने त्यांच्याच पत्नी सुमन यांना उमेदवारी देऊन सहानुभूती मिळवण्याचा प्रयत्न केला, तो यशस्वी झाला नाही. भाजप-सेना युती व राष्ट्रवादीनेही ही पोटनिवडणूक प्रतिष्ठेची केली होती.
मोकाटेंचा पोटनिवडणुकीत 75 मतांनी विजय
भाजपचे दिवंगत आमदार शिवाजी कर्डिले यांच्यासह भाजपचे तत्कालीन जिल्हाध्यक्ष आमदार प्रा. राम शिंदे यांनी प्रचार यंत्रणा राबवली होती. घरोघर जाऊन प्रचार केला होता. पण गोविंद मोकाटे यांनी विजयश्री खेचून आणला होता. या पोटनिवडणुकीत राष्ट्रवादी काँग्रेसकडून गोविंद मोकाटे (5 हजार 434 मते) 75 मते घेऊन विजयी झाले होते. भाजपच्या सुमन रामदास आव्हाड (5 हजार 359 मते मिळाली होती.
तनपुरेंची यंत्रणा मोकाटेंसाठी राबली
भाजपचे दिवंगत आमदार शिवाजी कर्डिले यांना त्यावेळी पराभवाचा जोरदार धक्का बसला होता. कर्डिले यांच्या बालेकिल्ल्यातच राष्ट्रवादीकडून मोकाटे यांनी मुसंडी मारुन त्यांना धोबीपछाड दिला.
काँग्रेसने या निवडणुकीत उमेदवार दिला नव्हता व प्रचारात भाग न घेता तटस्थ भुमिका घेतली होती. राष्ट्रवादीचे पालकमंत्री बबनराव पाचपुते, जिल्हाध्यक्ष घनश्याम शेलार यांनीही प्रचार सभा घेतल्या. राहुरीचे प्राजक्त तनपुरे यांनी देखील इथं प्रचार यंत्रणा राबवली होती.
भाग्यश्री मोकाटेंचा विजय
गोविंद मोकाटे यांची मुलगी भाग्यश्री मोकाटे यांनी देखील 2017 मध्ये जिल्हा परिषदेच्या निवडणुकीत जेऊर गटातून विजय मिळवला होता. ही निवडणूक मोकाटे यांनी शिवसेनेच्या तिकीटावर लढली होती.
इथंही विजय घेताना, भाजपचे दिवंगत आमदार शिवाजी कर्डिले यांच्या बालेकिल्ल्याला मोकाटे यांनी खिंडार पाडले होते. विशेष म्हणजे ही निवडणूक विषारी बनावट दारूकांडमुळे गाजली होती.
पोटनिवडणुकीची चार मे रोजी मतमोजणी
गोविंद मोकाटे आता पुन्हा एकदा राहुरी विधानसभा पोटनिवडणुकीच्या निमित्ताने भाजपचे दिवंगत आमदार शिवाजी कर्डिले यांचे पुत्र अक्षय कर्डिले यांच्यासमोर आव्हान उभं केलं आहे. मतदान झाले आहे. आता चार मे रोजी मतमोजणी होणार आहे. गोविंद मोकाटे यांचा पोटनिवडणुकीतील विजयाचा ट्रॅक रेकाॅर्ड पाहाता, निकालाची उत्सुकता शिगेला पोहोचली आहे.
