पुणे महानगरपालिकेच्या सर्व खात्यातील सफाई कंत्राटी कामगारांचा मेळावा शनिवार दिनांक २५/०४/२०२६ रोजी श्रमिक भवन एकलव्य सभागृहात आयोजित करण्यात आला होता. सदर मेळावा पुणे महानगरपालिका कामगार युनियनच्या जनरल सेक्रेटरी कॉ. मुक्ता मनोहर यांच्या अध्यक्षतेखाली पार पडला. पुणे महानगरपालिकेच्या घनकचरा व्यवस्थापन खात्यातील सार्वजनिक स्वच्छता विभाग, कचरा वहातुक विभागात एकूण ६,९०० स्त्री पुरुष कंत्राटी सफाई कामगार तसेच ३००० हजार सुरक्षा रक्षक तसेच उद्यान विभागात २५०० कंत्राटी सफाई कामगार असे एकूण १२,४०० कंत्राटी कामगार म्हणून सन २००७ पासून कार्यरत आहेत.
पुणे महानगरपालिका ही महाराष्ट्र राज्यातील सर्वात मोठी व श्रीमंत स्थानिक स्वराज्य संस्था मानली जाते. या स्थानिक स्वराज्य संस्थेत कंत्राटी कामगारांना रजा वेतन, घर भाडे भत्ता, सानुग्रह अनुदान वगळून किमान वेतन दिले जात होते. त्या अनुषंगाने पुणे महानगरपालिका कामगार युनियनने किमान वेतनात घरभाडे भत्ता, रजा वेतन, सानुग्रह अनुदानाची रक्कम किमान वेतनात समाविष्ट करावे यासाठी औद्योगिक न्यायालयात दावा दाखल करण्यात आला होता. युनियनच्या माध्यमातून प्रशासना बरोबर सकारात्मक चर्चा केल्यानंतर सदर दाखल केलेला दावा युनियनने माघारी घेतल्यानंतर पुणे महानगरपालिकेने किमान वेतनाची अंमलबजावणी केली.
युनियनच्या जनरल सेक्रेटरी कॉ. मुक्ता मनोहर यांनी मेळाव्यात मार्गदर्शन करताना अशा म्हणाल्या की,” १८ ते २० वर्षापासून कंत्राटी कामगारांना कायमस्वरूपी रोजगारापासून वंचित राहीला आहे. महाराष्ट्रात मुंबई, ठाणे, कल्याण, नागपूर महानगरपालिकेत कंत्राटी कामगारांना कायम करणे संदर्भात सरकारने ठराव करून कायम केले आहेत. त्याच धरतीवर पुणे महानगरपालिकेच्या कंत्राटी कामगारांना कायम करण्याचा ठराव प्रशासनाने व नुतन लोक प्रतिनिधीने दोन्ही सभागृहात कंत्राटी कामगारांना कायम करण्याचा ठराव करावा अशी मागणी करण्यात आली.”
तसेच अध्यक्ष कॉ. उदय भट मेळाव्यात मार्गदर्शन करत असताना असे म्हणाले की,”हातवर पोट भरणाऱ्या कंत्राटी कामगारांना कंत्राटी पद्धती रूपी जात्यात भरडला जातोय, अन्याय, अत्याचार होतोय हे आपण उघड्या डोळ्यांनी पहातोय. डॉ. बाबासाहेब आंबेडकर यांनी संविधानात अन्न, वस्त्र, निवारा, आरोग्य, शिक्षण आणि कायमस्वरूपी रोजगार मिळवून समानतेचा अधिकार हक्क दिले त्यापासून कंत्राटी कामगारांना वंचित ठेवून गुलामगिरीचे जीवन जगत आहेत. या कंत्राटी कामगारांना समान कामाला समान वेतन, सेवेत कायम करण्याचा ठराव महानगरपालिकेच्या दोन्ही सभागृहांनी करावा अन्यथा तिव्र अंदोलन करण्याचा निर्धार व्यक्त केला.
सदर मेळाव्यात सर्वश्रमिक महासंघाचे संघटक कॉ. विजय कुलकर्णी, कॉ. जीवन सुरडे, कार्याध्यक्ष कॉ. मधुकर नरसिंगे, जॉईन्ट सेक्रेटरी कॉ. वैजीनाथ गायकवाड, उपाध्यक्ष कॉ. दिलीप कांबळे, कॉ. करुणा गजधनी यांनी मार्गदर्शन केले. कॉ. सिद्धार्थ प्रभुणे यांनी सुत्रसंचलन व समारोप कॉ. प्रकाश चव्हाण यांनी केले. सदर मेळाव्यास दोन हजार कंत्राटी कामगार आणि युनियनचे सर्व पदाधिकारी, सचिव कार्यकर्ते उपस्थित होते.
