Super-8 मधील ७ संघ ठरले, आता एका जागेसाठी कोण शर्यतीत?टी२० वर्ल्ड कप २०२६ स्पर्धेत मोठा उलटफेर झाला आहे. माजी चॅम्पियन आणि आयसीसी स्पर्धांमधील सर्वात यशस्वी संघ ऑस्ट्रेलिया टी२० वर्ल्ड कप २०२६ स्पर्धेतून बाहेर झाला आहे. मंगळवारी झिम्बाब्वे आणि आयर्लंड यांच्यात पाल्लेकेले येथे होणारा सामना पावसामुळे रद्द झाला.
या सामन्यात पावसाच्या व्यत्ययामुळे (Rain) नाणेफेकही होऊ शकली नाही. त्यामुळे दोन्ही संघांना प्रत्येकी १ पाँइंट देण्यात आला. परिणामी झिम्बाब्वेचे ३ सामन्यांतून ५ पाँइंट्स झाले. त्यामुळे बी गटातून श्रीलंकेपाठोपाठ झिम्बाब्वेने सुपर – ८ फेरीतील (Super 8) प्रवेश पक्का केला. झिम्बाब्वेने (Zimbabwe) याआधी ओमान आणि ऑस्ट्रेलियाला पराभूत केले होते.
दरम्यान, बी गटातून श्रीलंका (६ पाँइंट्स) आणि झिम्बाब्वे सुपर -८ साठी पात्र ठरल्याने इतर तीन संघ ऑस्ट्रेलिया, आयर्लंड आणि ओमान यांचे आव्हान संपले आहे. आयर्लंडचे पहिल्या फेरीतील सर्व चार सामने संपले असून त्यांचे आता १ विजय , २ पराभव आणि एका अनिर्णित सामन्यासह ३ पाँइंट्स आहेत.
पहिल्या फेरीत ऑस्ट्रेलियाचा (Australia) ओमानविरुद्धचा एक अखेरचा सामना बाकी आहे. हा सामना २० फेब्रुवारी रोजी होणार आहे. पण या सामन्याच्या निकालाचा कोणताही परिणाम स्पर्धेवर होणार नाही.
ऑस्ट्रेलिया पहिल्या तीन सामन्यांत फक्त १ विजय मिळवला आहे, तर ओमानने पहिले तिन्ही सामने पराभूत झाले आहेत. त्यामुळे ऑस्ट्रेलियाचे सध्या २ गुण आहेत आणि ओमानचे शून्य गुण आहेत. त्यामुळे ऑस्ट्रेलियाने जरी ओमानला हरवलं तरी ते ४ पाँइंट्सपर्यंतच पोहचू शकतात, तर ओमानने विजय मिळवला, तरी ते २ पाँइंट्सच मिळवतील. त्यामुळे या गटातून श्रीलंका आणि झिम्बाब्वे यांचं सुपर ८ चं तिकीट निश्चित झाले.
७ संघ ठरले, आता एका जागेसाठी शर्यत
दरम्यान, टी२० वर्ल्ड कप २०२६ (T20 World Cup 2026) सुपर ८ फेरीत जागा मिळवणारे ७ संघ आता निश्चित झाले आहेत. बी गटातून श्रीलंका आणि झिम्बाब्वे, सी गटातून वेस्ट इंडिज आणि इंग्लंड, डी गटातून दक्षिण आफ्रिका आणि न्यूझीलंड या संघांनी सुपर-८ फेरीत प्रवेश केला आहे. म्हणजे पहिल्या फेरीतील एकूण तीन गटांचे चित्र स्पष्ट झाले आहे.
याशिवाय अ गटातून भारतीय संघाने सुपर – ८ चे तिकीट मिळवले आहे. मात्र अ गटातून सुपर – ८ मध्ये जाणारा दुसरा संघ अद्यापही निश्चित झालेला नाही. या जागेसाठी सध्या अमेरिका, पाकिस्तान आणि नेदरलँड्स यांच्यात शर्यत आहे.
अमेरिकेचे सर्व चार सामने संपले असून त्यांनी ४ पाँइंट्स मिळवून सध्या दुसरा क्रमांक मिळवला आहे. पण पाकिस्तानचेही तीन सामन्यांतील २ विजय आणि एका पराभवासह ४ पाँइंट्स आहेत. पण पाकिस्तानचा नेट रन रेट अमेरिकेपेक्षा कमी आहे. नेदरलँड्सचे तीन सामन्यांतील एक विजय आणि दोन पराभवांसह २ पाँइंट्स आहेत.
मात्र पाकिस्तानसाठी जमेची बाजू अशी की त्यांचा नामिबियाविरुद्धचा सामना बाकी आहे. नामिबियाचे आव्हान यापूर्वीच संपले आहे. जर हा सामना पाकिस्तान जिंकले, तर ते थेट सुपर – ८ मध्ये पोहचतील.
पण जर पाकिस्तानला नामिबियाने पराभूत केले, तर मात्र अमेरिकेला आशा असेल की भारताने नेदरलँड्सला पराभूत करावे, ज्यामुळे नेदरलँड्सचे ४ पाँइंट्स होणारच नाहीत. किंवा नेदरलँड्सने विजय मिळवला, तरी तो मोठ्या फरकाचा असू नये. ज्यामुळे नेदरलँड्स ४ गुणांपर्यंत पोहचले, तरी नेट रन रेटच्या बाबतीत अमेरिका सुपर-८ मध्ये पोहोचेल.
नेदरलँड्सला मात्र सुपर – ८ मध्ये पोहोचायचे असेल, तर भारताला अत्यंत मोठ्या फरकाने पराभूत करावे लागेल आणि नामिबिया पाकिस्तानला हरवेल अशी आशाही करावी लागेल.
