राष्ट्रवादीच्या विलीनीकरणाच्या चर्चांना अजित पवार यांच्या निधनानंतर वेग आला आहे. शरद पवार यांच्यासह त्यांच्या पक्षाच्या अनेक नेत्यांनी दोन्ही राष्ट्रवादीच्या एकत्रिकरणाबाबत अजित पवार यांच्यासोबत चर्चा झाली होती असा दावा केला आहे. तर राष्ट्रवादीच्या नेत्यांकडून मात्र अशी चर्चा झाली नसल्याचे बोलले जात आहे. त्यामुळे आता दोन्ही राष्ट्रवादीचे विलीनीकरण होणार की नाही असा प्रश्न उपस्थित होत आहे. वरकरणी राष्ट्रवादी पक्षाची विलीनीकरण सहज वाटत असताना अचानक आलेल्या अडथळ्यांमुळे या एकत्रीकरणाच्या चर्चेदरम्यान आता शरद पवार यांच्या पक्षाने मोठा निर्णय घेतला आहे. राज्यातील भारतीय जनता पक्ष वेगळी भूमिका घेत असल्याने राज्यस्तरावर कोणत्याही चर्चा सुरू न ठेवता वरिष्ठ पातळीवरून हे गणिते जुळवण्यासाठी रणनीती आखण्यास सुरुवात झाली आहे. राष्ट्रवादी काँग्रेस पार्टी शरदचंद्र पवार त्याच्या वतने राज्यातील प्रवक्ते व नेते यांना विशेष सूचना देण्यात आल्या आहेत. देशातील शीर्षस्थ नेतृत्व आणि राष्ट्रवादी काँग्रेस पक्षाचे असलेले संबंध या जोरावरच आगामी काळात राष्ट्रवादी काँग्रेस पक्षाचे विलीनीकरण अवलंबून राहणार आहे.
शरद पवार यांच्या पक्षाचा मोठा निर्णय
गेल्या काही काळापासून दोन्ही राष्ट्रवादीच्या विलीनीकरणाची चर्चा सुरु आहे. अनेक नेत्यांनी यावर आपली भूमिका स्पष्ट केली आहे. अशातच आता शरद पवार यांच्या पक्षाने दोन्ही राष्ट्रवादींच्या विलिनीकरणावर न बोलण्याच्या सूचना प्रवक्ते, नेत्यांना दिल्या आहेत. राष्ट्रवादी विलिनीकरणावरुन पवार गटाने ही सावध भूमिका घेतली आहे. आता 9 तारखेला रोहित पवार पत्रकार परिषद घेऊन भूमिका मांडणार असल्याची माहिती समोर येत आहे. या पत्रकार परिषदेत मोठे खुलासे होण्याची शक्यता आहे. त्यामुळे आता या पत्रकार परिषदेकडे संपर्ण राज्याचे लक्ष लागले आहे.
प्रफुल्ल पटेल विलीनीकरणाबाबत काय म्हणाले?
राष्ट्रवादीचे खासदार प्रफुल्ल पटेल यांची आज पत्रकार परिषद पार पडली. यावेळी त्यांना दोन्ही राष्ट्रवादींच्या विलीनीकरणाबाबत प्रश्न विचारण्यात आला होता. यावर बोलताना ते म्हणाले की, ‘मी आमच्या पक्षाबद्दलच बोलणार आहे. मी कोणत्याही काल्पनिक गोष्टीवर बोलणार नाही. माझ्या परीने एवढंच सांगतो की, मी आमच्या पक्षात अजितदादांनंतर पदाच्या हिशोबाने सर्वात ज्येष्ठ सहकारी होतो. माझी भूमिका अजितदादांच्या सुसंगत राहिली. तेव्हाच 2023 रोजी आम्ही निर्णय केला. आम्ही त्यांच्यासोबत राहिलो. सर्व आमदार अजितदादांसोबत राहिले. त्यामुळे अजितदादांच्या नेतृत्वात राष्ट्रवादी चालली. आमच्याकडे निर्णय घेण्याची प्रक्रिया आहे, असे प्रफुल्ल पटेल म्हणाले.
विलीनीकरणावर चर्चा झाली नाही
पुढे बोलताना पटेल म्हणाले की, ‘अजित पवार यांनी याआधी अनेक मुलाखती दिलेल्या आहेत. विलीनीकरणाबाबत त्यांची माझ्यासोबत कोणतीही चर्चा झाली नव्हती. विलीनीकरणावर चर्चा झाली असती तर त्याबाबत आम्हाला माहिती नाही, असं होऊच शकत नाही. मी अजितदादांच्या दोन मुलाखती पाहिल्या आहेत. त्यात त्यांनी स्पष्टपणे सांगितलंय की आमच्यासमोर विलीनीकरणाचा कोणताही प्रस्ताव नाही. फक्त स्थानिक स्वराज्यसाठी शरद पवार यांच्या राष्ट्रवादीसोबत युती होती’ असेही पटेल यांनी स्पष्ट केले आहे.
