पुणे महापालिकेची सार्वत्रिक निवडणूक जाहीर झाल्यानंतर भारतीय जनता पक्षाने आपली चक्रे वेगाने फिरवण्यास सुरुवात केली असून संभाव्य सगळे विरोधक एकत्र येण्याची शक्यता लक्षात घेऊन प्रत्येक प्रभागांमध्ये तुल्यबळ उमेदवार देण्याच्या उद्देशाने भारतीय जनता पक्ष झपाटलेला आहे. पुणे महापालिकेमध्ये किमान 125 नगरसेवक विजयी करण्याचा संकल्प केलेल्या भारतीय जनता पक्षाने रणनीती मध्ये बदल करत प्रत्येक प्रभागांमध्ये सक्षम आणि तुल्यबळ उमेदवार देण्यासाठी सर्व तरी प्रयत्न करून बाहुबली माजी नगरसेवकांना पक्षांमध्ये घेण्याचा घाट आखला आहे. पुणे आणि पिंपरी-चिंचवडमधील काही भाजप प्रवेश शनिवारी (दि. २०) मुंबईत होण्याची शक्यता आहे. त्यात अनेक दिग्गज माजी नगरसेवकांचा समावेश आहे.
पुणे महापालिकेची निवडणूक जाहीर झाल्यामुळे सर्वच पक्षातील इच्छुकांनी उमेदवारीच्या तिकिटासाठी फिल्डिंग सुरू केली आहे. पुणे शहरातील अन्य पक्षांच्या तुलनेत भाजपकडे इच्छुकांची संख्या विक्रमी असली तरी सुद्धा प्रत्यक्षात निवडणुकीची रणनीती आणि विजयी गणिते जुळवण्यासाठी आवश्यक असलेले बाहुबली चेहरे अन्य पक्षांच्या तुलनेत खूपच कमी असल्याची जाणीव भारतीय जनता पक्षाच्या शीर्षस्थ नेत्यांना झाली आहे. त्यात ज्या भागात भाजपची ताकद कमी आहे. त्यामुळेच पुणे शहर पदाधिकाऱ्यांचा सूर बाजूला सारून राज्य पातळीवरून मोठा निर्णय घेण्यात आला असून ज्या भागात अन्य पक्षातून मोठ्या प्रमाणात भाजपमध्ये इनकमिंग होणार आहे. पुणे शहरात भारतीय जनता पक्षाच्या वतीने सत्ता उपभोगली असली तरी सुद्धा पक्ष वाढीच्या मर्यादा लक्षात घेऊन शहरालगत नव्याने समाविष्ट झालेल्या आणि उपनगर म्हणून प्रसिद्ध असलेल्या भागातील बाहुबली नेत्यांसाठी भारतीय जनता पक्षाने दरवाजे खुले केले आहेत. त्यासाठी राष्ट्रवादी काँग्रेस अजित पवार गट, राष्ट्रवादी काँग्रेस शरदचंद्र पवार पक्ष , काँग्रेस आणि शिवसेना ठाकरे गटातील काही माजी नगरसेवकांचा आज मुंबईत भाजपमध्ये प्रवेश होणार आहे.
22 माजी नगरसेवकांच्या हाती ‘कमळ’
राष्ट्रवादी काँग्रेस शरदचंद्र पवार पक्षाचे वडगाव शेरी विधानसभेचे आमदार बापू पठारे यांचे चिरंजीव सुरेंद्र, माजी नगरसेवक विकास दांगट, माजी नगरसेवक बाळा धनकवडे, माजी नगरसेविका सायली वांजळे, माजी नगरसेविका रोहिणी चिमटे, राष्ट्रवादी काँग्रेसचे शहर उपाध्यक्ष नारायण गलांडे यांच्यासह काँग्रेस, राष्ट्रवादी काँग्रेससह इतर पक्षातील २२ माजी नगरसेवक, पदाधिकाऱ्यांचा आज भारतीय जनता पक्षात प्रवेश होणार आहे.
प्रदेशाध्यक्ष रवींद्र चव्हाण यांच्या उपस्थितीत मुंबईतील भाजप कार्यालयात सकाळी साडेदहा वाजता हा प्रवेश होणार असून, पुण्यातील भाजपचे नेतेही या वेळी उपस्थित राहणार आहेत.
खडकवासला, कोथरूड, हडपसर, वडगाव शेरी, पर्वती; तसेच शिवाजीनगर विधानसभा मतदारसंघांतील सुमारे २२ माजी नगरसेवकांसह इतर पक्षांतील प्रमुख पदाधिकार्यांचा पक्ष प्रवेश मुंबईतील छोटेखानी कार्यक्रमात होणार आहे.
महापालिका निवडणुकीत जिंकण्याची खात्री वाटत असल्याने इतर पक्षातील नेते भाजपमध्ये जाण्यासाठी इच्छुक आहेत. त्यासाठी केंद्रीय मंत्री मुरलीधर मोहोळ, उच्च व तंत्र शिक्षणमंत्री चंद्रकांत पाटील यांच्या घरी इच्छुकांच्या रांगा लागल्या आहेत. मोहोळ यांनी यापूर्वी इच्छुकांना भेटण्यास शक्यतो टाळले होते. मात्र, शुक्रवारी त्यांनी सर्वांना वेळ दिली होती. त्यामुळे जंगली महाराज रस्त्यावरील त्यांच्या कार्यालयात शुक्रवारी दिवसभर मोठ्या प्रमाणात गर्दी होती.
धक्कादायक नावे?
पुणे शहरातील दोन्ही राष्ट्रवादी काँग्रेसमधील काही धक्कादायक नावे पक्ष प्रवेशात आहेत. त्यांचा थेट प्रवेश केल्यानंतरच ही नावे जाहीर होतील. त्यातील काही नेत्यांचा प्रवेश आज, शनिवारी होणार आहे, तर येत्या आठवडाभरात आणखी काही प्रवेश घेतले जातील, असे सांगण्यात येत आहे. धनकवडी येथील माजी नगरसेवक बाळा धनकवडे यांनी भाजपमध्ये प्रवेश करणार असल्याचे यापूर्वीच स्पष्ट केले आहे.
सुरेंद्र पठारेंचा प्रवेश का ?
विधानसभेला भाजपमध्ये असणारे बापू पठारे यांनी उमेदवारी मागितली होती. महायुतीत ही जागा राष्ट्रवादी काँग्रेसला सुटल्याने पठारे यांनी शरदचंद्र पवार यांच्या राष्ट्रवादी काँग्रेसमध्ये प्रवेश करीत विधानसभा लढवली आणि ते विजयी झाले होते. पठारे पिता-पुत्रांनी त्या वेळी तत्कालीन उपमुख्यमंत्री देवेंद्र फडणवीस यांची परवानगी घेऊन भाजपचा राजीनामा दिला होता. लोकसभा निवडणुकीत त्यांनी केंद्रीय राज्यमंत्री मुरलीधर मोहोळ यांचा जोरदार प्रचार केला होता; तसेच त्यांच्या प्रभागातून त्यांना मताधिक्यही देण्यात आले होते. त्यामुळे पठारे कुटुंबाची भाजपशी जवळीक कायम होती. त्यानुसार सुरेंद्र पठारे यांनी भाजपची आपली जुनी नाळ अधिक घट्ट करीत प्रवेशाचा मार्ग स्वीकारल्याचे निकटवर्तीय सांगतात. मुख्यमंत्री फडणवीस यांच्या सूचनेनुसार सुरेंद्र यांचा प्रवेश होत असल्याचे सांगण्यात येत आहे. आमदार पठारे हे राष्ट्रवादी काँग्रेसमध्येच राहणार असल्याचेही स्पष्ट झाले आहे.
