राज्यभरात नगर पंचायत आणि नगर परिषदांच्या निवडणुकांची धामधुम सुरु असून आज प्रचाराचा शेवटचा दिवस असताना काही नगर परिषदांच्या निवडणुका या पुढे ढकलण्यात आल्याची माहिती समोर आली आहे. अचानक निवडणूक आयोगाकडून हा आदेश आल्याने सध्या प्रचार शिगेला असताना अचानक मोठा ट्विस्ट आला आहे. या नगरपरिषद आणि नगर पंचायतींचे निवडणुकींचे स्वतंत्र वेळात्रकही जाहीर करण्यात आले आहे.
19 नगर परिषदांच्या निवडणुका पुढे ढकलल्या
महाराष्ट्रातील अनेक जिल्ह्यांमधील काही नगर परिषद आणि नगर पंचायतींच्या निडणुका या पुढे ढकलण्यात आल्या आहेत. यामध्ये बारामती, महाबळेश्वर, फलटण, पंढरपूर यांचा समावेश आहे. एकूण 19 नगर पंचायत आणि नगर परिषदांच्या निवडणुका पुढे ढकलण्यात आल्या आहेत. या नगर पंचायत आणि नगर परिषदांमध्ये आता 20 डिसेंबरला मतदान होईल आणि 21 डिसेंबरला मतमोजणी होणार असल्याची माहिती समोर आली आहे.
लातूर आणि सोलापुरात ‘या’ ठिकाणी निवडणूक पुढे ढकलली
लातूर जिल्ह्यातील रेणापूर नगर पंचायत निवडणूक पुढे ढकलली आहे. न्यायालयीन प्रक्रियेमुळे ही निवडणूक पुढे ढकलण्यात आल्याची माहिती आहे. सोलापूर जिल्ह्यातील मंगळवेढा नगर परिषदेची निवडणूक ही न्यायालयीन प्रक्रियेमुळ स्थगित झाली आहे.
धुळे जिल्ह्यात पिंपळनेरमध्ये भाजप उमेदवाराचं निधन
धुळे जिल्ह्यातील पिंपळनेर नगर परिषद निवडणुकीला स्थगिती देण्यात आली आहे. इथे भाजप उमेदवाराचं निधन झालं आहे. त्यामुळे निवडणुकीला स्थगिती देण्यात आली आहे.
अहिल्यानगर आणि धाराशिवमध्ये काय?
अहिल्यानगर जिल्ह्यातील कोपरगाव, देवळाली, नेवासा, पाथर्डी या ठिकाणी न्यायालयील कारणाने नगराध्यक्षपदाची निवडणूक पुढे ढकलण्यात आली आहे. धाराशिवमध्ये न्यायालयीन अपील दाखल असल्याने तीन जागांसाठी निवडणुकांना स्थगिती देण्यात आली आहे.
अकोला, गोंदिया आणि बीडमध्येही काही ठिकाणी निवडणुका पुढे
अकोला जिल्ह्यातील बाळापूरमध्ये नगराध्यक्षपदाच्या उमेदवाराबाबत न्यायालयीन याचिका प्रलंबित असल्याने निवडणुकीला स्थगिती देण्यात आली आहे. बीड नगर परिषदेच्या वॉर्ड क्रमांक 3 ‘ब’ येथे न्यायालयीन प्रक्रियेमुळे स्थगिती देण्यात आली आहे. गोंदियात नगर परिषद हद्दीतील 3 प्रभागातील निवडणूक पुढे ढकलण्यात आली आहे.
नांदेडमध्ये काय परिस्थिती?
नांदेड जिल्ह्यातील मुखेड, धर्माबाद येथे न्यायालयीन प्रक्रियेमुळे पूर्ण नगर परिषदांच्या निवडणुका स्थगित करण्यात आली आहे. तर भोकर आणि लोहामध्ये प्रत्येकी एक जागेची निवडणूक पुढे ढकलण्यात आली आहे.
अमरावती आणि जालना जिल्ह्यात ‘या’ ठिकाणी निवडणुका स्थगित
अमरावती जिल्ह्यातील अंजनगाव सुर्जीनगर परिषदेची निवडणूक स्थगित करण्यात आली आहे. जालना जिल्ह्यातील भोकदन नगर परिषदेच्या दोन प्रभागातील निवडणूक स्थगित करण्यात आली आहे. न्यायालयीन प्रक्रियेमुळे इते निवडणूक स्थगित करण्यात आली आहे.
