बारामती लोकसभा मतदारसंघात मंगळवारी काही ठिकाणे वगळता मतदान शांततेत पार पडले. दरम्यान मतदानाची प्रक्रिया संपताच रात्रीच्या सुमारास पुण्यातील वारजे परिसरात तिघांनी हवेत गोळीबार केल्याची घटना घडली. यामुळे परिसरात एकच खळबळ उडाली.
पोलिसांकडून आणि घटनास्थळावरुन मिळालेल्या माहितीनूसार मंगळवारी रात्री वारजे परिसरात दुचाकीवरुन तिघेजण आले. या तिघांनी पिस्तुलातून हवेत गोळीबार केला. गोळीबारच्या आवाजाने परिसरात काही क्षणात घबराट पसरली.
संशयित आरोपींनी हवेत गोळीबार का केला याचे कारण अद्याप समजू शकलेले नाही असे पोलिसांनी सांगितले. दरम्यान गोळीबार करणारे संशयित आरोपी हे कात्रजच्या दिशेने पसार झाले. संशयित आरोपींचा शोध घेण्याचे काम सुरू आहे अशी माहिती पोलिसांनी दिली.
