पुण्यातील विविध प्रश्नासंदर्भात भाजप नेते आणि पुण्याचे पालकमंत्री चंद्रकांत पाटील यांनी आज पत्रकार परिषदेत घेत संवाद साधला. यावेळी त्यांनी पुणे शहरातील टेकड्यांवरील अतिक्रमणाबबात भाष्य केलं. शहरातील टेकड्यांवर अतिक्रमण, खोदकाम सुरू असल्याने त्यांच्या सुरक्षेचा प्रश्‍न ऐरणीवर आला आहे. यावर चंद्रकांत पाटील यांनी यावर भूमिका स्पष्ट केली. ते म्हणाले, टेकड्यांची सुरक्षा करणे ही महापालिकेच्या क्षेत्रीय अधिकाऱ्यांची जबाबदारी आहे. अतिक्रमण होणार असेल तर त्यांनाच जबाबदार धरले जाईल, असा इशारा त्यांनी यावेळी दिला. त्यामुळे आता महापालिका प्रशासनाकडून काय कारवाई होणार? याकडे लक्ष लागले आहे. महापालिकेने अडीचशे कोटी रुपये खर्च करून वेताळ टेकडी फोडून रस्ता करण्याचा घाट घातला आहे. याला नागरिकांनी विरोध सुरू केला आहे. तर भाजपसह इतर राजकीय पक्षांनीही या प्रकल्पास विरोध केला आहे. यानंतर आज झालेल्या बैठकीत या विषयावर चर्चा झाली.
यावेळी पाटील म्हणाले, ”गेल्या सव्वा वर्षापासून महापालिकेवर प्रशासक असल्याने व लोकप्रतिनिधी नसल्याने क्षेत्रीय कार्यालयांच्या कामावर चर्चा झाली नाही. त्यामुळेच ही बैठक घेतली. स्वच्छता, मलःनिसारण, पावसाळी गटारांची स्वच्छता, नाले सफाई यासह इतर विषयांवर चर्चा झाली. टेकड्यांवर अतिक्रमण झाले तर त्याबाबत क्षेत्रीय अधिकारीच जबाबदार असतील”, असा इशाराही त्यांनी दिला.
”चार लाख नागरिक राहत असलेल्या क्षेत्रीय कार्यालयाच्या हद्दीतील टेकड्यांवर अतिक्रमण होत असेल तर त्यांना तेवढंही लक्षात नाही का? असा जाब विचारला जाईल. टेकड्या सुरक्षीत राहिल्या पाहिजेत ही जबाबदारी या अधिकाऱ्यांचीच आहे. आमच्या पक्षाचा नेता, आमदार, मंत्री असला तरीही त्याचे अतिक्रमण पाडले पाहिजे. टेकड्यांवर अतिक्रमण झाले तर अधिकाऱ्यांनी मदत मागवून घेऊन कारवाई करण्याचे आदेश दिले आहेत”, असं ते म्हणाले.
बालभारती पौड फाटा प्रकल्पाला पर्यावरण प्रेमी नागरिकांचा विरोध आहे. भाजपच्या माजी आमदार मेधा कुलकर्णी यांनीही नागरिकांना पाठिंबा देत हा प्रकल्प होऊ देणार नाही असे स्पष्ट केले. यावर बोलताना पाटील म्हणाले, ”प्रशासन हे त्यांच्या नियोजनानुसार काम करतं. त्यामुळे पर्यावरणवादी नागरिकांशी संवाद साधणार आहे. लोकशाहीत ‘हम करे सो कायदा’ चालत नाही, असं ते म्हणाले. दरम्यान, फ्लेक्स लावले, फटाके फोडले तर मी कार्यक्रमाला येणार नाही असे सांगतो. तरीही कार्यकर्ते फ्लेक्स लावतात. महापालिकेने असे अनधिकृत फ्लेक्स माझा फोटो असला तरी काढून तो टाकावे. तर कार्यकर्त्यांनी अधिकृत ठिकाणीच फ्लेक्स लावावेत, असंही ते म्हणाले.
