देशातील 130 वर्षे जुन्या औद्योगिक घराण्यात गेल्या 8 वर्षांपासून वाटण्या थांबल्या आहेत. बाजार नियामक सेबीने हस्तक्षेप करून कुटुंबाला सेटलमेंटची कागदपत्रे उघड करण्यास सांगितले तेव्हा उद्योग समूहाने सेबीविरुद्ध कायदेशीर लढाई लढण्याचा निर्णय घेतला. शेअर बाजाराला दिलेल्या माहितीत समूहाच्या 4 कंपन्यांनी सेबीच्या आदेशाविरोधात लवकरच न्यायालयात धाव घेणार असल्याचे सांगितले. अखेर या उद्योग समूहाच्या विभाजनावर वर्षानुवर्षे वाद का सुरू आहेत आणि आता यात सेबीची भूमिका काय आहे? समजून घेऊ
किर्लोस्करच्या देशभरात अनेक मोठ्या कंपन्या आहेत. आता किर्लोस्कर समूहाच्या चार कंपन्या सेबीच्या पत्राला कायदेशीर आव्हान देण्याची तयारी करत आहेत. 11 सप्टेंबर 2009 रोजी किर्लोस्कर कुटुंबातील सदस्यांनी स्वाक्षरी केलेले कौटुंबिक करार दस्तऐवज उघड करण्यास सेबीने सांगितले होते. त्यामुळे हे प्रकरण तापले आहे.
किर्लोस्कर फेरस इंडस्ट्रीज लिमिटेड, किर्लोस्कर इंडस्ट्रीज लिमिटेड, किर्लोस्कर न्यूमॅटिक कंपनी लिमिटेड आणि किर्लोस्कर ऑइल इंजिन्स लिमिटेड या चार समूह कंपन्यांनी स्टॉक एक्स्चेंजला सांगितले आहे की ते कौटुंबिक सेटलमेंट डॉक्युमेंट (DFS) द्वारे बांधील नाहीत किंवा त्यांचा त्यांच्यावर कोणताही परिणाम होत नाही.
कंपन्यांच्या म्हणण्यानुसार, सिक्युरिटीज अँड एक्स्चेंज बोर्ड ऑफ इंडिया (SEBI) ने 30 डिसेंबर 2024 रोजी लिहिलेल्या पत्रात किर्लोस्कर कुटुंबातील सदस्यांमधील कौटुंबिक व्यवहार SEBI अंतर्गत त्यांच्या वैयक्तिक क्षमतेनुसार विचारात घेण्याचा सल्ला दिला आहे.
कोणती कंपनी कोणाची आहे?
किर्लोस्कर ब्रदर्स लिमिटेडचे अध्यक्ष आणि व्यवस्थापकीय संचालक संजय किर्लोस्कर आणि अतुल किर्लोस्कर आणि राहुल किर्लोस्कर यांच्यात जवळपास 130 वर्षे जुन्या किर्लोस्कर समूहाच्या मालमत्तेवरील नियंत्रणावरून 2016 पासून वाद सुरू आहे. राहुल किर्लोस्कर हे किर्लोस्कर न्यूमॅटिक कंपनी लिमिटेड (KPCL चे कार्यकारी अध्यक्ष आहेत तर अतुल किर्लोस्कर किर्लोस्कर ऑइल इंजिन्स लिमिटेड (KOEL) चे कार्यकारी अध्यक्ष आहेत.
कुटुंबात वाद काय?
किर्लोस्कर कुटुंबातील दावेदार संजय किर्लोस्कर यांच्या नेतृत्वाखालील कंपनी किर्लोस्कर ब्रदर्स लिमिटेडने त्यांचे भाऊ राहुल आणि अतुल किर्लोस्कर त्यांचा वारसा हिसकावून जनतेची दिशाभूल करण्याचा प्रयत्न करत असल्याचा आरोप केला आहे.
सुमारे 1.56 लाख कोटी रुपयांचे बाजार भांडवल असलेल्या किर्लोस्कर समूहाचे देशात आणि परदेशात सुमारे 14 कारखाने आहेत. भावांसोबत झालेल्या वादामुळे कंपनीचा लोगोही बदलल्याचे संजय सांगतात.
