ज्येष्ठ नेते आणि राज्यसभेचे खासदार शरद पवार यांची संसदीय कारकिर्द आज ६० व्या वर्षात पदार्पण करत आहे. या काळात शरद पवारांनी देशाच्या आणि राज्याच्या राजकारणातले चढउतार पाहिले. त्यानिमित्ताने राज्याच्या उपमुख्यमंत्री आणि शरद पवारांच्या सून सुनेत्रा पवार यांनी त्यांच्यासाठी खास पोस्ट लिहिली आहे.
‘आदरणीय शरद पवार साहेबांच्या सार्वजनिक व संसदीय जीवनाला आज साठ वर्षांचा ऐतिहासिक टप्पा पूर्ण होत आहे. १९६७ मध्ये सुरू झालेला त्यांचा जनसेवेचा प्रवास आजही तितक्याच ऊर्जेने आणि निष्ठेने पुढे जात आहे. महाराष्ट्र विधानसभेपासून ते संसद भवनापर्यंत विविध जबाबदाऱ्या समर्थपणे सांभाळत त्यांनी लोकप्रतिनिधी म्हणून सातत्याने जनतेचा विश्वास संपादन केला आहे. या दीर्घ वाटचालीत त्यांच्यासोबत खंबीरपणे उभे राहिलेले कार्यकर्ते, सहकारी आणि सर्वात महत्त्वाची म्हणजे जनतेची साथ, हीच त्यांच्या यशाची खरी ताकद आहे. पवार साहेबांचे मार्गदर्शन आणि प्रेरणा आगामी काळातही सर्वांना नवी ऊर्जा देत राहो, हीच सदिच्छा’, असं सुनेत्रा पवार म्हणाल्या.
