शिवसेना ठाकरे गटाला आणखी एक मोठा धक्का बसला आहे. आदित्य ठाकरे यांचे निकटवर्तीय मानले जाणारे मुंबईचे माजी नगरसेवक अमेय घोले यांनी शिवसेनेच्या ठाकरे गटाला जय महाराष्ट्र दिला आहे.आज रात्री मुख्यमंत्री एकनाथ शिंदे यांच्या उपस्थितीत ते शिवसेनेच्या शिंदे गटात प्रवेश करणार आहेत. काही महिन्यांपूर्वी अमेय घोले यांनी युवासेना कोअर कमिटीचा राजीनामा दिला होता.
एकनाथ शिंदे यांच्या नेतृत्वाखालील शिवसेनेत बंडखोरी झाल्यानंतर अनेक नगरसेवक, खासदार, आमदार आणि कार्यकर्ते ठाकरे यांची बाजू सोडून शिंदे गटात गेले. काही महिन्यांपूर्वी अमेय घोले याला युवा सेनेच्या कोअर टीम सदस्यांच्या व्हॉट्सअॅप ग्रुपमधून काढून टाकण्यात आले होते. त्यानंतर आदित्य ठाकरे यांचे निकटवर्तीय मानले जाणारे माजी नगरसेवक अमेय घोले हे शिंदे गटाच्या वाटेवर असल्याची चर्चा होती. अखेर आज अमेय घोले यांनी आदित्य ठाकरे यांचा पाठिंबा सोडून शिंदे गटात जाण्याचा निर्णय घेतला आहे.
काय म्हणाले अमेय घोले?
अमेय घोले यांनी आदित्य ठाकरे यांना पत्र लिहिले आहे. त्यात त्यांनी तुमच्यामुळेच राजकारणात आल्याचे म्हटले आहे. युवासेनेच्या माध्यमातून तुम्ही दिलेली प्रत्येक जबाबदारी पार पाडली. गेली 13 वर्षे प्रामाणिकपणे काम केले. वडाळा विधानसभा मतदारसंघात काम करताना श्रद्धा जाधव आणि सूरज चव्हाण यांनी कामात वारंवार अडथळे आले. त्यामुळे काम करणे खूप अवघड होते. याबाबत आपल्याला वेळोवेळी माहितीही देण्यात आली होती. संघटनेतील मतभेद दूर करण्याचा मी खूप प्रयत्न केला. मात्र, यावर तोडगा निघाला नाही. आज जड अंत:करणाने युवासेना सोडत असून कोषाध्यक्ष पदाचा राजीनामा देत आहे.
