देशातील प्रमुख रिअल इस्टेट मार्केटमधून खळबळजनक माहिती समोर आली आहे. पुणे, मुंबईसह, देशभरातील प्रमुख शहरांत घरांच्या विक्रीत घट झाली आहे.रिअल इस्टेट सल्लागार संस्था ‘प्रॉपटायगर’च्या अहवालानुसार, एप्रिल ते जून २०२६ या तिमाहीत देशातील आठ प्रमुख शहरांमध्ये घरांची विक्री ६ टक्क्यांनी घटून ९१,७२९ युनिट्सवर आली.
गेल्या वर्षी याच कालावधीत ९७,६७४ घरांची विक्री झाली होती. जागतिक पातळीवरील अनिश्चितता, वाढत्या घरांच्या किमती आणि खरेदीदारांनी घेतलेली सावध भूमिका यामुळे मागणीवर परिणाम झाल्याचे अहवालात नमूद करण्यात आले आहे.
मुंबई महानगर क्षेत्रात (MMR) घरांची विक्री ७ टक्क्यांनी घटली. एप्रिल-जून तिमाहीत MMR मध्ये २४,११२ घरांची विक्री झाली, तर मागील वर्षी याच कालावधीत हा आकडा २५,९३९ होता. दिल्ली-एनसीआरमध्येही ७ टक्क्यांची घट झाली असून, विक्री १०,०५१ वरून ९,३५२ युनिट्सवर आली. पुणे रिअल इस्टेट बाजारपेठेलाही मोठा फटका बसला आहे. शहरात घरांच्या विक्रीत तब्बल २१ टक्क्यांची घट नोंदवण्यात आली. एप्रिल-जून २०२५ मध्ये १५,९६२ घरांची विक्री झाली होती. यंदा हा आकडा १२,६४२ युनिट्सवर आला आहे. प्रमुख शहरांमध्ये पुण्यातील ही सर्वाधिक घसरण ठरली आहे.
बेंगळुरूमध्ये विक्री ९ टक्क्यांनी कमी होऊन १५,६२८ वरून १४,१८६ युनिट्सवर आली. अहमदाबादमध्ये तब्बल २० टक्क्यांची घट झाली असून, विक्री ९,४५१ वरून ७,५४१ युनिट्सवर आली. कोलकात्यातही ९ टक्क्यांची घट नोंदवण्यात आली असून, विक्री ३,८४७ वरून ३,५१७ युनिट्सवर आली आहे.दरम्यान, चेन्नई आणि हैदराबाद या दोन शहरांमध्ये मात्र घरांच्या विक्रीत वाढ झाली. पश्चिम आशियातील संघर्ष आणि रोजगाराच्या क्षेत्रावर AI तंत्रज्ञानाच्या संभाव्य परिणामांबाबतची चिंता यामुळे ग्राहकांनी घर खरेदीचा निर्णय पुढे ढकलल्याचे ‘प्रॉपटायगर’ने म्हटले आहे.
प्रॉपटायगरच्या मते, दुसऱ्या तिमाहीतील आकडेवारी ही भारतीय निवासी मालमत्ता बाजारपेठ कमकुवत होत असल्याचे नव्हे, तर बाजार अधिक परिपक्व होत असल्याचे संकेत देते. वाढत्या किमतींच्या पार्श्वभूमीवर ग्राहक आता घर खरेदीपूर्वी अधिक काळजीपूर्वक निर्णय घेत असल्याचे चित्र आहे.
