पुणे महानगरपालिकेवर भारतीय भाजपची बहुमताने सत्ता आहे. तर विरोधी बाकांवर मुख्यत्वे राष्ट्रवादी काँग्रेस पक्ष (NCP), काँग्रेस (INC), आणि इतर पक्ष आहेत. मात्र आता पुण्यात महायुतीत वादाची ठिणगी पडली आहे.राष्ट्रवादी काँग्रेस अजित पवार गटाच्या दोन नगरसेवकांचा निधी शून्य केल्याने हा वाद निर्माण झाला आहे. राष्ट्रवादीच्या नेत्यांनी पुणे महानगरपालिका आयुक्तांची भेट घेतली असून पालिकेतच ठिय्या आंदोलनाला सुरुवात केली आहे.
राज्याचे कॅबिनेट मंत्री तथा भाजपा नेते चंद्रकांत पाटील यांच्या विभागाच्या कामांचे ऑडिट करण्यात यावे, असा प्रस्ताव राष्ट्रवादीचे नगरसेवक अमोल बालवडकर यांनी महापालिकेत दिला होता. विशेष म्हणजे या प्रस्तावावर सुनील टिंगरे यांनी अनुमोदक म्हणून स्वाक्षरी केली होती. त्यामुळे भाजपने राष्ट्रवादीच्या दोन्ही नगरसेवकांचा विकासनिधि पूर्णपणे कापून शून्य केला आहे. त्यांच्या विभागातील एकाही कामाला प्रशासकीय मान्यता किंवा निधीचे वर्गीकरण न मिळाल्याने राष्ट्रवादीचे दोन्ही नगरसेवक आक्रमक झाले आहेत. भाजपने सुडबुद्धीने कारवाई केल्याचा आरोप केला जात आहे. याप्रकरणी आता राष्ट्रवादीच्या नगरसेवकांनी महापालिका आयुक्तांची भेट घेतली असून पालिका इमारतीतील डॉ. बाबासाहेब आंबेडकर पुतळ्याजवळ संविधानाची प्रत हातात घेऊन ठिय्या आंदोलनाला सुरूवात केली आहे.
माध्यमांशी संवाद साधताना राष्ट्रवादी काँग्रेसचे नेते तथा पुणे महानगरपालिकेतील विरोधी पक्षनेता अॅड. निलेश निकम यांनी सांगितले की, आज आमच्या राष्ट्रवादी काँग्रेस पक्षाच्या शिष्टमंडळाने आयुक्तांची भेट घेतली आहे. आयुक्तांना आम्ही वस्तुस्थिती सांगून ज्या-ज्या प्रभागामधला निधी भाजपने पाश्ववी बहुमताच्या जोरावर रद्द करण्याचा निर्णय घेतला आहे, त्या ठरावाची अंमलबजावणी करू नये, तसेच हा ठराव निरस्त करण्याकरता आयुक्तांनी राज्य सरकारकडे सुमोटो पाठवावा, अशी विनंती आम्ही केलेली आहे.
आमचं शिष्टमंडळ त्याकरता ठिय्या आंदोलनाला बसलं आहे. आम्ही आयुक्तांना दिलेल्या पत्रात असेही नमूद केले आहे की, एवढे वर्षे या महापालिकेत राष्ट्रवादी काँग्रेस, काँग्रेस किंवा इतर मिश्र पक्षाचं सरकार असतानाही एखाद्याला दिलेला निधी, केवळ सभासद आपलं ऐकत नाही किंवा आपल्याविरोधात विरोधी कारवाया करतो म्हणून त्याला दिलेला निधी काढण्याचं पाप याआधी महापालिकेत काढण्यात आलं नव्हतं, अशी टीका निलेश निकम यांनी केली.
