पुणे, प्रतिनिधी : एम.ई.एस. गरवारे कॉलेज ऑफ कॉमर्स, पुणे येथील टी.वाय. बी.कॉम.ची विद्यार्थिनी मुळशीची सुवर्ण कन्या आंतरराष्ट्रीय खेळाडू सानिया पप्पू कंधारे हिची भारतीय सैन्याच्या राष्ट्रीय कॅडेट कोअर (Army NCC) अंतर्गत आयोजित करण्यात आलेल्या AFMC (Armed Forces Medical College), पुणे येथील प्रतिष्ठित Hospital Attachment National Camp साठी निवड झाली होती.
आंतरराष्ट्रीय खेळाडू सानिया कंधारे हि गरवारे कॉलेजच्या इतिहासात या राष्ट्रीय शिबिरासाठी निवड होणारी पहिली विद्यार्थिनी ठरली आहे. तसेच ती 2 महाराष्ट्र बॉईज बटालियनमध्ये Senior Wing (SW) Senior म्हणून जबाबदारीही सांभाळली आहे.
या राष्ट्रीय शिबिरात 2 महाराष्ट्र बॉईज बटालियन, 2 महाराष्ट्र गर्ल्स बटालियन, 36 महाराष्ट्र बटालियन, 59 महाराष्ट्र बटालियन तसेच इतर विविध बटालियनमधील कॅडेट्स सहभागी झाले होते. पुणे, सोलापूर, पंढरपूर, जुन्नर, शिरूर, लातूर आदी महाराष्ट्रातील विविध भागांतून विद्यार्थी-विद्यार्थिनी या शिबिरासाठी सहभागी झाले होते. संपूर्ण महाराष्ट्रातून या शिबिरासाठी एकूण 52 कॅडेट्सची निवड करण्यात आली होती. त्यामध्ये 26 मुली आणि 26 मुलांचा समावेश होता.
या शिबिरादरम्यान 2 महाराष्ट्र गर्ल्स बटालियनच्या CTO मयुरी जगताप मॅडम तसेच 36 महाराष्ट्र बटालियनचे PI स्टाफ हरपिंदर सिंह सर यांनी सर्व कॅडेट्सना मोलाचे मार्गदर्शन, उत्तम सहकार्य आणि काळजीपूर्वक साथ दिली. त्यांच्या प्रोत्साहनामुळे शिबिरातील अनुभव अधिक समृद्ध आणि प्रेरणादायी ठरल्याची भावना कॅडेट्सनी व्यक्त केली.
गरवारे कॉलेजच्या विद्यार्थिनीने राष्ट्रीय स्तरावर मिळविलेल्या या यशामुळे महाविद्यालय, NCC युनिट आणि पालकांकडून तिचे अभिनंदन होत असून, तिच्या या यशामुळे इतर विद्यार्थ्यांनाही राष्ट्रीय स्तरावर कामगिरी करण्याची प्रेरणा मिळणार आहे.
सानियांनी सागितले की, या AFMC हॉस्पिटल अटॅचमेंट कॅम्पमध्ये मला खूप काही शिकायला मिळाले. डॉक्टरांकडून रुग्णांशी कसे बोलावे, त्यांची काळजी कशी घ्यावी, हॉस्पिटलमधील शिस्त, स्वच्छता आणि वेळेचे महत्त्व समजले. विविध विभागांमध्ये डॉक्टर आणि वैद्यकीय कर्मचाऱ्यांचे काम जवळून पाहण्याची संधी मिळाली.या कॅम्पमुळे प्रथमोपचार (First Aid), आपत्कालीन परिस्थितीत कसे वागावे, टीमवर्क, जबाबदारी आणि सेवाभाव यांचे महत्त्व अधिक चांगल्या प्रकारे समजले. डॉक्टरांचे समर्पण, संयम आणि रुग्णसेवेची भावना पाहून मला खूप प्रेरणा मिळाली.
हा कॅम्प माझ्यासाठी केवळ प्रशिक्षण नव्हता, तर आयुष्यभर उपयोगी पडणारा अनुभव आणि शिकण्याची एक मोठी संधी होती.
