शिवडी, दि. १२ (रामदास धो. गमरे) : थायलंडमध्ये धम्मप्रचाराच्या कार्यात समर्पित असलेल्या नऊ भंतेजींचे रस्ते अपघातात दुर्दैवी निधन झाल्याची घटना संपूर्ण बौद्ध समाजासाठी अत्यंत वेदनादायी ठरली असून सदर दुःखद घटनेबद्दल जगभरातून शोकभावना व्यक्त होत आहे, त्याच पार्श्वभूमीवर शिवडी विभागातील सामाजिक कार्यकर्ते नाना कदम यांनी समाजातील विविध क्षेत्रातील कार्यकर्त्यांना एकत्र आणून शिवडी क्रॉस रोड, रेल्वे गेट क्र. ६ येथे दिवंगत भंतेजींना सामूहिक आदरांजली अर्पण करण्यासाठी अभिवादन सभेचे आयोजन केले.
सदर प्रसंगी आदर्श बौद्धाचार्य प्रविण तांबे यांनी त्रिशरण, पंचशील व धार्मिक पूजापाठाने करून कार्यक्रमास सुरुवात केली, तद्नंतर कामगार नेते राजाराम जाधव यांनी साश्रूनयनांनी सूत्रसंचालन करीत असताना दिवंगत भंतेजींच्या धम्मसेवेच्या कार्याचा गौरवपूर्ण आढावा घेतला. प्रास्ताविकात त्यांनी या दुःखद घटनेबद्दल तीव्र शोक व्यक्त करत भंतेजींच्या पवित्र स्मृतीस विनम्र अभिवादन केले.
सदर अभिवादन सभेस रविभाऊ गरुड, माजी नगरसेवक सुनील मोरे, बौद्धजन पंचायत समिती, शिवडी विभाग गट क्र. १३ चे कार्याध्यक्ष संतोष जाधव, बौद्धाचार्य भिकाजी जाधव, सर्वोच्च न्यायालयाचे ॲड. यशवंत गंगावणे, सुधीरभाऊ शार्दुल, संजय कसबे, प्रविण तांबे, नलेश गवारे, संतोष लोखंडे, सचिन गायकवाड, अनंत जाधव, पायल खरे तसेच विविध सामाजिक, धार्मिक व आंबेडकरी चळवळीतील कार्यकर्ते मोठ्या संख्येने उपस्थित होते या सर्वांनी दिवंगत भंतेजींच्या जड अंतःकरणाने भावपूर्ण श्रद्धांजली अर्पण केली.
सरतेशेवटी प्रविण तांबे यांनी उपस्थितांचे आभार मानत, दिवंगत भंतेजींनी मानवकल्याण व धम्मप्रसारासाठी दिलेले योगदान सदैव प्रेरणादायी राहील अशी भावना व्यक्त केली व दोन मिनिटे मौन पाळून अभिवादन सभेची सांगता करण्यात आली.
