मुंबई दि. २२ (अधिराज्य) वाढत्या मानसिक तणाव, कौटुंबिक संघर्ष आणि सामाजिक समस्यांच्या पार्श्वभूमीवर प्रशिक्षित समुपदेशकांची गरज ओळखून संकल्प संस्थेतर्फे सुरू करण्यात आलेल्या पॅरा कौन्सिलिंग कोर्सचा शुभारंभ रविवारी कुर्ला (पूर्व) येथील न्यू इंग्लिश स्कूलमध्ये मोठ्या उत्साहपूर्ण वातावरणात संपन्न झाला.
सदर प्रसंगी माता सावित्रीबाई फुले यांच्या प्रतिमेस पुष्पहार अर्पण करून दीपप्रज्वलनाने कार्यक्रमाची सुरुवात झाली. सविता हेंडवे यांनी आपल्या लाघवी भाषाशैलीत कार्यक्रमाचे प्रास्ताविक सादर करीत असताना आजच्या बदलत्या सामाजिक परिस्थितीत समुपदेशन क्षेत्राचे वाढते महत्त्व अधोरेखित केले. समाजात संवेदनशील, जबाबदार आणि प्रशिक्षित समुपदेशकांची फळी निर्माण करण्याच्या उद्देशाने हा अभ्यासक्रम सुरू करण्यात आल्याचे त्यांनी प्रास्ताविकात नमूद केले.
संकल्प संस्थेचे संस्थापक-अध्यक्ष विनोद हिवाळे यांनी संस्थेच्या सामाजिक कार्याचा आढावा घेताना शिक्षण, आरोग्य, महिला सक्षमीकरण, युवक विकास, व्यसनमुक्ती आणि सामाजिक न्याय क्षेत्रातील उपक्रमांची माहिती देत; समाजात वाढत चाललेल्या मानसिक आणि कौटुंबिक समस्यांवर प्रभावीपणे काम करण्यासाठी प्रशिक्षित मनुष्यबळ निर्माण करणे ही काळाची गरज असल्याचे नमूद केले.
सदर उद्घाटन समारंभाला मुंबई जिल्हा एड्स नियंत्रण संस्थेच्या उपसंचालक ज्ञानेश्वरी सोनावणे, बाल कल्याण समितीचे अध्यक्ष अॅड. महेश घाटगे, अभिनेत्री स्मिता धुमाळ, महाराष्ट्र राज्य नशाबंदी मंडळाच्या सरचिटणीस वर्षाताई विद्या विलास तसेच वर्षा सोनावणे यांची प्रमुख उपस्थिती लाभली. मान्यवरांनी मानसिक आरोग्य, व्यसनमुक्ती आणि बालक-किशोरवयीन प्रश्नांवर काम करण्यासाठी प्रशिक्षित समुपदेशकांची भूमिका महत्त्वाची असल्याचे सांगत संकल्प संस्थेच्या उपक्रमाचे सर्वांनी कौतुक केले.
कार्यक्रमात वर्षाताई विद्या विलास यांनी सादर केलेल्या प्रेरणादायी गीताने उपस्थितांची दाद मिळवली, तर प्रशिक्षणार्थी अशोक दात्रे यांच्या सामाजिक आशयाच्या गीताने कार्यक्रमात वेगळी रंगत निर्माण केली.
सरतेशेवटी सदर कार्यक्रमाच्या यशस्वी आयोजनासाठी विशेष योगदान देणाऱ्या स्नेहा कासारे, प्रवीण रुपवते, रेणुका सिंह, अश्विनी घुमरे, सोनाली कांबळे, सुप्रभा गायकवाड, अविनाश पाटील आणि सूर्यकांत चव्हाण तसेच कार्यक्रमास उपस्थित प्रशिक्षणार्थी, सामाजिक कार्यकर्ते आणि विविध क्षेत्रांतील मान्यवरांचे आभार मानून दीपा गमरे यांनी कार्यक्रमाची सांगता केली.
