पुणे मेट्रो लाइन 1 आणि 2वरील प्रवासी संख्या दिवसेंदिवस वाढत चालली आहे. येत्या काही महिन्यांमध्ये तिसरी मेट्रो मार्गिका सुरू झाली की ही संख्या 50 टक्क्यांनी वाढण्याची शक्यता आहे. सर्व प्रवाशांना सहजपणे सामावून घेण्यासाठी महा मेट्रोने ट्रेनच्या डब्यांची संख्या वाढवण्याचा निर्णय घेतला आहे. पुढील काही महिन्यांमध्ये पुण्यात मेट्रोने प्रवास करणं आणखी सुखकर होणार आहे.
पहिल्या दोन मार्गांचा विस्तार
हिंजवडी ते शिवाजीनगर मेट्रो लाइन 3 वरून मेट्रो 1 आणि 2ने प्रवास करता येता येणार आहे. दोन्ही मेट्रोसाठी इंटरचेंज तयार केले असून पुण्यात प्रवास तिन्ही मेट्रोने प्रवास करू शकतात. हिंजवडी आयटी पार्कमध्ये दररोज लाखो कर्मचारी शहरातून आणि शहराबाहेरून कामानिमित्त जातात. मेट्रो 3 सुरू होताच हे सर्व कर्मचारी मेट्रोचा वापर करतील. त्यामुळे पहिल्या दोन मेट्रोवरील भार ही वाढणार आहे. त्यामुळे मार्गिका 1 आणि 2 वर आता तीनऐवजी सहा डब्यांची मेट्रो धावणार आहे.
मार्च 2022 ते सप्टेंबर 2024पर्यंत टप्प्या-टप्प्याने मेट्रो लाइन 1 आणि मेट्रो लाइन 2 सुरू करण्यात आली. मेट्रो 1 पिंपरी-चिंचवड महानगरपालिका ते स्वारगेट जोडते, आणि मेट्रो 2 वनाझ ते रामवाडी जोडते. संपूर्ण पुणे शहरातून या मेट्रो जात असून एकूण 33.28 किमी लांब मार्ग आहेत. यापैकी बहुतेक मार्ग उन्नत असून उर्वरित 5 किलोमीटर भाग भूमिगत आहे. हिंजवडी ते शिवाजीनगर मेट्रोमुळे यामध्ये 23 किलोमीटरची भर पडणार आहे. जुलै महिन्यात मेट्रोचा पहिला टप्पा सुरू होणार आहे. प्रवाशांसाठी 12 स्थानकं खुली करण्यात येतील, राजीव गांधी इन्फोटेक पार्कला थेट शहराच्या मध्यवर्ती भागाशी जोडण्यात येणार आहे. तसेच, उपलब्ध इंटरचेंजमुळे पिंपरीच-चिंचवड, स्वारगेट आणि रामवाडीसह अनेत ठिकाणी जोडणार आहे.
6 लाख प्रवासी हाताळण्यासाठी सक्षम
“मार्च 2026मध्ये मेट्रो लाइन 1 आणि 2ची एकूण प्रवासी संख्या 1,87,299वर पोहोचली. गेल्या चार वर्षांपासून दोन्ही मार्गांवर तीन डब्यांच्या मेट्रोचा वापर केला जात आहे. सध्याच्या प्रवासी संख्येसाठी हे डबे पुरेसे आहेते. पण मेट्रो लाइन 3 पूर्ण क्षमतेने सुरू झाल्यानंतर दररोज ही संख्या 2,75,000 ते 3 लाखांपर्यंत पोहचण्याची शक्यता आहे. यासाठी सहा डब्यांच्या मेट्रोची खरेदी आता सुरू होणार आहे,” अशी माहिती महामेट्रोचे संचालक श्रावण हार्डिकर यांनी इंडियन एक्सप्रेसशी बोलताना दिली आहे. पुणे मेट्रोला दररोज 6,00,000 प्रवासी हाताळण्यासाठी सक्षम करण्याचं त्यांचं उद्दिष्ट आहे.
दोन्ही मार्गिकांचा विस्तार
सध्या पूर्व ते पश्चिम जोडणाऱ्या लाइन 2 (वनाझ ते रामवाडी)वर तीन डब्यांच्या 18 मेट्रो धावतात. तसेच, पुणे उत्तर-दक्षिण जोडणाऱ्या लाइन 1 वर (पिंपरी-चिंचवड महानगरपालिके ते स्वारगेट)तीन डब्यांच्या 16 मेट्रो धावतात. प्रवासी संख्येनुसार, लाइन2वर 15 मेट्रो तर लाइन 1वर 12 मेट्रो वाढवण्याची गरज आहे. सहा डब्यांच्या मेट्रोसाठी वनाझ आणि रेंज हिलमधील मेट्रोच्या डेपोचाही विस्तार करण्यात येणार आहे.
दरम्यान, पुण्यात मेट्रो 1 आणि 2चा विस्तार सुरू असून बांधकाम वेगाने सुरू आहे. लाइन 1वर पीसीएमसी ते निगडी असा 4.4 किमी लांब विस्तार आणि स्वारगेट ते कात्रजपर्यंत 5.46 किमी विस्तार होईल. शिवाय मेट्रो लाइन 2वर वनाझ ते चांदणी चौक 1.12 किलोमीटर मार्ग तर रामवाडी ते वाघोली 11.63 किमी विस्तार सुरू होणार आहे.
