पुणे महापालिकेत भाजप सत्तेत येऊन १०० दिवस होत असताना सर्वसामान्य पुणेकर नागरिकांच्या प्रश्नाला बगल देऊन केवळ व्यक्तिगत हितासाठी भ्रष्टाचाराला प्राधान्य दिले जाते आहे. संपूर्ण शहरभर विजयाचा उन्माद असल्याने सध्या पुणे महापालिकेतील कारभार दिशाहीन असून, प्रशासकीय कार्य पद्धतीतील पारदर्शकता केवळ बोलण्यापुरती मर्यादित आहे. मागील तीन महिन्यात पुणे महापालिकेतील सत्ताधाऱ्यांच्या या दिशाहीन कारभाराला प्रशासनाची साथ मिळत असल्याने सर्वसामान्य पुणेकरांचे अतोनात नुकसान होत आहे, अशी टीका काँग्रेसने पत्रकार परिषदेत केली. शहराध्यक्ष अरविंद शिंदे आणि गटनेते ॲड. रामचंद्र उर्फ चंदूशेठ कदम यांनी पत्रकार परिषदेत त्यांची भूमिका मांडली.
शहराध्यक्ष अरविंद शिंदे म्हणाले, ‘भाजपने निवडणुकीपूर्वी दिलेली आश्वासने अद्याप कागदावरच आहेत. ५०० चौरस फुटांपर्यंतच्या घरांना करसवलत आणि महिलांच्या नावावरील मालमत्तांना दिलासा देण्याचे आश्वासन पूर्ण न झाल्याने नागरिकांमध्ये नाराजी आहे. भाजपच्या राज्य व केंद्रस्तरावर निर्णय घेऊन पुणे महापालिकेतील कार्यभार पाहण्यासाठी नेमलेल्या पदाधिकाऱ्यांमध्ये समन्वय नाही, त्यांच्यात नित्य क्रमाने केवळ वाद होत आहेत. त्यामुळे संपूर्ण पुणे शहरातील अनेक महत्त्वाची कामे रखडली आहेत.
पुणे महापालिका काँग्रेस पक्षाचे गटनेते रामचंद्र कदम म्हणाले, ‘वाहतूक कोंडी आणि अनियमित पाणीपुरवठा, पीएमपीमधील भरती, पदोन्नती प्रक्रियेतील गडबड, चुकीच्या होर्डिंग परवानग्या, कचरा व्यवस्थापन प्रकल्पांमध्ये अनियमितता आहे. सध्या पुणे महापालिकेत महापौर स्थायी समिती अध्यक्ष सभागृह नेते या तीन स्तरावर आपापसात स्पर्धा सुरू आहे. या तीन स्तरावरील निर्णय प्रक्रियामुळे सध्या प्रशासनामध्ये प्रचंड गोंधळ असून प्रशासकीय पातळीवर तीन सत्ता केंद्रातून प्रशासकीय आदेश दिले जात असल्याने प्रचंड गोंधळाचे वातावरण आहे. पुणे महापालिकेतील सत्ताधारी भाजपला तिहेरी स्पर्धात्मक सत्ता केंद्रांवर अंकुश ठेवता आला नाही, उलट कचरा प्रकल्पांचे चुकीचे प्रस्ताव समोर आणत आहेत.
पुणे महापालिकेतील भारतीय जनता पक्षाचा सध्याचा कारभार हा ‘श्रेष्ठ’ कोण या स्पर्धेत गुंतलेला आहे. पुणे शहरात राज्यमंत्री माधुरीताई मिसाळ कॅबिनेट मंत्री नामदार चंद्रकांत दादा पाटील आणि केंद्रीय राज्यमंत्री मुरलीधर मोहोळ अशी तीन नियंत्रण केंद्रे असून त्यांच्या मार्फत दिल्या जाणाऱ्या सूचनांमुळे सध्या प्रशासकीय व प्रकल्पीय कामांचा बोजवारा उडाला असल्याचा आरोपही सर्वसामान्य नागरिक करत असल्याचे यावेळी सांगण्यात आले.
