दापोली दि. ११ (रामदास धो. गमरे) रत्नागिरी जिल्ह्यातील दापोली तालुक्यातील विश्रांती नगर (विसापूर) येथे बौद्धजन पंचायत समितीच्या शाखा क्रमांक २१ चे उद्घाटन नुकतेच मिलिंद सकपाळ यांच्या अध्यक्षतेखाली मोठ्या उत्साहात पार पडले.
बौद्धजन पंचायत समिती ही मातृसंस्था २५ मे १९४१ रोजी खार (पश्चिम) येथे दिवंगत गणपत कासारे (लाटवणकर) यांच्या निवासस्थानी डॉ. बाबासाहेब आंबेडकर यांच्या सहमतीने स्थापन झाली, त्यावेळी लावलेले हे रोपटे आज वटवृक्षात रुपांतर झाले असून सभापती आदरणीय आनंदराज आंबेडकर यांच्या नेतृत्वाखाली महाराष्ट्रातील विविध जिल्हे, तालुके तसेच गोवा राज्यातही शाखा विस्ताराचे कार्य सुरू आहे.
विश्रांती नगर (विसापूर) येथे स्थापन झालेल्या शाखा क्र. २१ च्या उद्घाटन सोहळ्याचे प्रमुख अतिथी म्हणून मिरा-भाईंदर गट क्र. ३३ चे गट प्रतिनिधी तसेच पंचायत समितीच्या अर्थ समितीचे चिटणीस विलास तानु जाधव उपस्थित होते. त्यांच्या शुभहस्ते शाखेचे उद्घाटन झाले. सदर प्रसंगी राजेश गजानन पवार आपल्या पहाडी आवाजात अत्यंत लाघवी भाषाशैलीत कार्यक्रमाचे सूत्रसंचालन केले तसेच बौद्धाचार्य सुभाष गौरू तांबे यांनी आपल्या सुमधुर व मंगल वाणीने धार्मिक पठण विधी पार पाडला.
सदर कार्यक्रमास बौद्धजन पंचायत समितीके दापोली तालुका अध्यक्ष दिलीप कासारे, चिटणीस श्रीधर जाधव, दिलीप हाटे तसेच मंडणगड येथील विजय खैरे यांची प्रमुख उपस्थिती होती. यावेळी विलास जाधव यांनी प्रस्ताविक सादर करताना बौद्धजन पंचायत समितीच्या स्थापनेपासून ते आजपर्यंतच्या कार्याचा आढावा घेत सभापती आनंदराज आंबेडकर यांच्या मार्गदर्शनाखाली राबविल्या जाणाऱ्या सामाजिक उपक्रमांची माहिती दिली. उपस्थित मान्यवरांनीही मार्गदर्शन करत नव्या शाखेला शुभेच्छा दिल्या.
सदर शाखा क्रमांक २१ च्या अध्यक्षपदी दिपक दशरथ पवार, उपाध्यक्षपदी संजय विश्वनाथ सकपाळ, चिटणीसपदी सतीश भागुराम सकपाळ, उपचिटणीसपदी सचिन सिताराम सकपाळ, खजिनदारपदी संतोष गंगाधर सकपाळ, संदेशवाहकपदी स्वप्निल मिलिंद सकपाळ तसेच
आम्रपाली महिला संघाच्या अध्यक्षापदी सौ. दर्शनी रविंद्र पवार, उपाध्यक्षापदी सौ. निता नथुराम सकपाळ, चिटणीसपदी दिपिका अक्षय मर्चंडे, उपचिटणीसपदी सौ. संचिता संदेश सकपाळ, खजिनदारपदी सौ. जान्हवी संदीप पवार, संदेशवाहकपदी सौ. कांचनी हिरामण सकपाळ या नवनिर्वाचीत कार्यकारिणीची घोषणा करून त्या सर्व पदाधिकाऱ्यांना प्रमाणपत्रे, ओळखपत्रे तसेच शॉल व पुष्पगुच्छ देऊन सन्मानित करण्यात आले.
अध्यक्षीय भाषणात आयु. मिलिंद सकपाळ यांनी “समाजहिताचे कार्य पंचायत समितीच्या घटनेनुसार प्रामाणिकपणे करण्याचा निर्धार” व्यक्त केला.
फटाक्यांच्या आतषबाजीत व हर्षोल्हासात झालेल्या या कार्यक्रमाला स्थानिक कार्यकर्ते व ग्रामस्थांचीही मोठी उपस्थिती लाभली होती. सरतेशेवटी राजेश पवार यांनी सदर कार्यक्रम यशस्वीपणे पार पाडण्यासाठी अथक परिश्रम घेणाऱ्या सर्वांचे व उपस्थितांचे आभार मानून कार्यक्रमाची सांगता केली.
