गुहागर दि. १० (रामदास धो. गमरे) बौद्धजन सहकारी संघ तालुका गुहागर, जिल्हा रत्नागिरी या संघाचे माजी चिटणीस व विद्यमान विश्वस्त, बौद्धजन सहकारी संघ शाखा क्र. २६ चे जेष्ठ सल्लागार, गंधकुटी बुद्धविहाराचे अग्रगण्य व कृतीशील कार्यकर्ते, चिखली गावचे सुपुत्र श्रीपत गोपाळ गमरे यांचे वयाच्या ७५ व्या वर्षी अल्पशा आजाराने दुःखद निधन झाले.
चिखली गावचे सुपुत्र असलेले गमरे यांनी आपल्या कार्यकाळात बौद्धजन सहकारी संघाच्या कार्यात मोलाची भर घातली. संघाच्या उतरत्या काळात पुढे आलेल्या तरुण पिढीत त्यांनी संघाचे चिटणीस म्हणून धडाडीने काम करत संघाच्या कार्याला नवी उभारी दिली. त्यांच्या कार्यामुळे संघाच्या कामाचा आलेख उंचावला आणि संघटनेला नवसंजीवनी मिळाली.
कालकथित श्रीपत गोपाळ गमरे हे सोज्वळ, मनमिळाऊ स्वभावाचे, हसतमुख, बुद्धिजीवी व आदर्श असे व्यक्तिमत्त्व होते, सामाजिक कार्यात त्यांचा सक्रिय सहभाग असल्याने त्यांचा समाजात मोठा मान होता त्यामुळे त्यांच्या जाण्याने समाजात तसेच बौद्धजन सहकारी संघ गाव व मुंबई मध्ये हळहळ व्यक्त केली जात आहे. कालकथित श्रीपत गोपाळ गमरे यांची अंत्ययात्रा संध्याकाळी चिखली गावातून निघणार आहे अशी माहिती संघाच्या वतीने देण्यात आली आहे.
