पुणे महापालिकेच्या सार्वत्रिक निवडणुका नंतर शहरात स्वीकृत सदस्यत्वाची चर्चा सुरू झाली; सर्वच पक्षातील असंख्य इच्छुकांमधून 10 स्वीकृत नगरसेवकांची नावे जाहीर झाल्यानंतर कागदपत्रांची प्रक्रिया पूर्ण करून आज निवड होणार आहे. मात्र, पुणे महापालिकेच्या वतीने केवळ आठ जणांनाच नगरसेवक होण्याची संधी आहे. कारण दोन जणांचे कागदपत्रे अर्धवट असल्याची माहिती सूत्रांच्या हवाल्याने मिळाली आहे. संबंधित उमेदवारांचा अर्ज बाद होणार असल्याची चर्चा महापालिका वर्तुळात असली तरीसुद्धा आज दुपारी होणाऱ्या सर्वसाधारण सभेमध्ये कोणता निर्णय होतो याकडे सर्वांचे लक्ष लागले आहे. महाापिलका प्रशासनाने याविषयी अधिकृत माहिती मात्र अद्याप दिलेली नाही.
महापालिका निवडणुकीमध्ये विजयी झालेल्या नगरसेवकांच्या संख्येनुसार आज महापालिकेत स्वीकृत नगरसेवक निवडले जाणार आहेत. सर्वाधिक ७ भाजपचे स्वीकृत नगरसेवक निवडले जाणार आहेत. त्या खालोखाल राष्ट्रवादी काँग्रेस कडून २ आणि काँग्रेस कडून १ असे तब्बल दहा जणांना स्वीकृत नगरसेवक म्हणून पुणे महापालिकेच्या सभागृहामध्ये काम करण्याची संधी मिळणार आहे. मुख्यतः भारतीय जनता पक्षाच्या वतीने निवडले गेलेले सातही उमेदवार गांभीर्यपूर्ण विचार करून निवडले असून यापैकी कोणाला कात्री मिळणार आहे? अशी चर्चा सुरू झाली आहे. पुणे शहरातील राष्ट्रवादी काँग्रेस पक्षाकडून दोन सदस्य निवडले गेले त्याबाबत सध्या शहर स्तरावर नाराजीचा सूर असल्याने कदाचित त्यामधील १ सदस्य अपात्र होऊन पुन्हा प्रक्रिया राबवली जाण्याची शक्यता नाकारता येत नाही. या प्रक्रियेमध्ये काँग्रेस पक्षाचा अर्ज बाद झाल्यास पक्षीयराजकारण केल्याचा आरोप होण्याची शक्यता नाकारता येत नाही. या सर्व घडामोडी मुळे आजची सर्वसाधारण सभा प्रचंड चर्चेची होणार असल्याचे संकेत मिळत आहेत.
भाजपकडून प्रियंका शेंडगे, जयप्रकाश पुरोहित, रवी साळवेकर,विश्वास ननावरे, उदय लेले, राजेंद्र काकडे, नीलेश कोंढाळकर यांना संधी देण्यात आली आहे तर राष्ट्रवादी काॅग्रेस कडून दत्तात्रय धनकवडे आणि राकेश कामठे मैदानात आहे. काँग्रेस मधील एकमेव जागेसाठी सुनील शिंदे यांना उमेदवारी देण्यात आले आहे.
या उमेदवारांमधून दोन उमेदवारांची कागदपत्रे अपूर्ण असल्याने ते छाननीत बाद झाले असल्याची चर्चा आहे. त्यामुळे, आज मुख्यसभेत 10 नगरसेवकांची निवड न होता फक्त 8 जणांची स्वीकृत नगरसेवक म्हणून निवड केली जाण्याची शक्यता आहे.
महापालिका आयुक्तांनी या उमेदवारांकडून दाखल करण्यात आलेल्या कागदपत्रांच्या छाननीसाठी एक वेगळी समिती स्थापन केली होती. या समितीकडून करण्यात आलेल्या छाननी दरम्यान दोन जणांची कागदपत्रे अपूर्ण असल्याचे आढळला आहे. त्यामुळे आता हे दोन उमेदवार नेमके कोण याबाबत राजकीय वर्तुळात चर्चा सुरू झाल्या आहेत.
