पुणे शहराचे पश्चिमद्वार म्हणजे चांदणी चौक! प्रशासकीय स्तरावर झालेल्या काही किरकोळ चुकांमुळे आज या भागातील नागरिकांना वाहतूक कोंडीला सामोरे जावे लागत आहे. या भागातील वाहतूक कोंडी सोडवण्यासाठी करोडो रुपयांचे प्रकल्प या भागांमध्ये सुरू झाले पूर्णत्वास आले तरीसुद्धा या भागातील वाहतूक कोंडी सुटण्याची शक्यता नसतानाच स्थानिक नगरसेविका महिला बाल कल्याण समिती अध्यक्षा अल्पनाताई वरपे यांनी विकास आराखड्याचा अभ्यास पूर्ण आढावा घेऊन संपूर्ण पौड रस्त्याला पर्यायी असलेल्या कोथरूड जुनी हद्द शांतीबन चौक ते उर्वरित कोथरूड नवीन हद्द डावी भुसारी कॉलनी (हायवे सर्विस रोड पर्यंत) जाणारा डीपी रोड रुंद करण्याची मागणी थेट आयुक्तांकडे केली आहे.
पुणे महापालिकेच्या विकास आराखड्यामध्ये मुख्य पौड रस्त्याला (पुणे-कोलाड हम रस्ता) समांतर हा शांतीबन चौक ते कोथरूड नवीन हद्द डावी भुसारी कॉलनी रस्ता खुला झाल्यापासून काही दिवसातच वाहनांची संख्या प्रचंड वाढली आहे. आज या ठिकाणी स्थानिक नागरिकांना आणि वाहन चालकांना रोजच प्रचंड वाहतूक कोंडीच्या समस्येला सामोरे जावे लागत आहे. परंतु सद्य स्थितीत सदर रस्ता हा केवळ १५ मीटर रुंदीचा असल्याने जुन्या हद्दीलगत (बॉटल नेक) अरुंद झाला आहे.
पुणे महापालिकेमध्ये ‘कोथरूड’चा समावेश करताना 1986 साली मुख्य बावळण मार्गापर्यंतच्या वाहतुकीचा विचार करून पौड रस्ता 42 मीटर व डी पी रस्ता 36 मीटर दाखवण्यात आला असला तरी सुद्धा समाविष्ट नवीन 23 गावांचा विकास आराखडा बनवताना मात्र हेच रस्ते कमी रुंदीचे दाखवल्यामुळे आज या भागातील नागरिकांना वाहतूक कोंडीचा दररोज त्रास सहन करावा लागत आहे. कोथरूड परिसरातील वाढती लोकसंख्या लक्षात घेता सदरील 15 मीटर रस्त्याची रुंदी वाढवून 36 मीटर करणे ही काळाची गरज आहे. सध्या या भागामध्ये नव्याने पुनर्विकासाचे प्रकल्प सुरू असल्याने रस्ता रुंदीकरण हीच योग्य वेळ असून तात्काळ यावर कार्यवाही करावी अशी मागणी महापालिका आयुक्त भेटीवेळी करण्यात आली आहे.
या पत्राद्वारे आगामी काळातील मोठ्या प्रकल्पांकडे आणि निर्माण वाहतुकीच्या ताणाचाही उल्लेख :-
मेट्रो प्रकल्प व उड्डाणपूल:-
कोथरूडमध्ये आगामी काळात पौड रस्त्यावरील ‘वनाझ ते चांदणी चौक’ मेट्रो स्टेशन आणि उड्डाणपुलाचे काम सुरू होणार आहे. या मोठ्या विकासकामांच्या काळात मुख्य रस्त्यावरील वाहतूक मोठ्या प्रमाणावर वळवली जाईल, ज्याचा थेट आणि प्रचंड ताण या १५ मीटरच्या डीपी रस्त्यावर येणार आहे. (प्रत्यक्षात या रस्त्याची रुंदी 36 मीटर ही काळाची गरज आहे)
भविष्यातील गरज:- सद्यस्थितीतील वाहतूक कोंडी आणि भविष्यातील मेट्रो व उड्डाणपुलाच्या कामाची व्याप्ती व सदर परिसरातील लोकसंख्या लक्षात घेता, हा रस्ता १५ मीटर असणे कोणत्याही दृष्टीने पुरेसे नाही. अशा परिस्थितीत, भविष्यातील वाहतुकीचे नियोजन आणि नागरिकांची गैरसोय टाळण्यासाठी शांतीबन चौक गणेश मंदिर ते डावी भुसारी कॉलनी येथील हायवे सर्विस रस्त्या पर्यंतचा हा संपूर्ण डीपी रस्ता ३६ मीटरचा करण्यात यावा.
पुणे महापालिकेच्या प्रशासकीय स्तरावर कोथरूड नवीन हद्द व जुनी हद्द विकास आराखडा तयार करताना झालेली ही 36 मीटर 15 मीटर चूक तात्काळ दुरुस्त करण्याची गरज आहे. प्रशासनाने या विषयाचे गांभीर्य ओळखून सदर रस्ता ३६ मीटर रुंद करण्याच्या प्रस्तावावर तातडीने सकारात्मक निर्णय घ्यावा आणि आवश्यक ती पुढील कार्यवाही सुरू करावी अशी लेखी मागणी महिला बाल कल्याण समिती अध्यक्षा अल्पनाताई वरपे यांनी केली आहे.
