शिवसेना (उद्धव बाळासाहेब ठाकरे) पक्षातील काही खासदार फुटून वेगळा गट स्थापन करण्याच्या चर्चा रंगत असतानाच उद्धव ठाकरे गटाने मोठी आणि महत्त्वाची राजकीय चाल खेळली आहे. संभाव्य फुटीच्या वृत्तांना पार्श्वभूमी असताना शिवसेना (उद्धव बाळासाहेब ठाकरे) पक्षाने लोकसभा अध्यक्षांकडे अधिकृत निवेदन सादर करत संसदेतील पक्षाच्या मान्यतेबाबत स्पष्ट भूमिका मांडली आहे. विशेष म्हणजे, काही खासदार एकनाथ शिंदे यांच्या नेतृत्वाखालील शिवसेनेत जाणार असल्याच्या चर्चांना वेग आला असतानाच मध्यरात्री हे पत्र जारी करण्यात आले. त्यामुळे या पत्राकडे केवळ प्रशासकीय पत्रव्यवहार म्हणून नव्हे, तर संभाव्य राजकीय घडामोडींना दिलेले उत्तर म्हणून पाहिले जात आहे.
नेमकी काय आहे मागणी?
शिवसेना (उद्धव बाळासाहेब ठाकरे) पक्षाने लोकसभा अध्यक्षांकडे केलेल्या निवेदनात संसदेत शिवसेना (उद्धव बाळासाहेब ठाकरे) हाच एकमेव अधिकृत राजकीय पक्ष म्हणून कायम मान्यता मिळावी, अशी मागणी केली आहे. त्याचबरोबर पक्षातून फुटून जाणाऱ्या किंवा वेगळा गट स्थापन करण्याचा दावा करणाऱ्या कोणत्याही गटाला स्वतंत्र ओळख, अधिकृत दर्जा, संसदीय सुविधा अथवा विशेषाधिकार देऊ नयेत, अशी स्पष्ट भूमिका पत्रात मांडण्यात आली आहे.
पक्षाने असेही नमूद केले आहे की, भविष्यात जर कोणत्याही गटाकडून स्वतंत्र मान्यतेची किंवा वेगळ्या गटाच्या दर्जाची मागणी करण्यात आली, तर त्यावर निर्णय घेण्यापूर्वी शिवसेना (उद्धव बाळासाहेब ठाकरे) पक्षाला आपली बाजू मांडण्याची पूर्ण संधी दिली जावी.
दहाव्या अनुसूचीचा उल्लेख
या पत्रातील आणखी एक महत्त्वाचा मुद्दा म्हणजे संविधानातील दहाव्या अनुसूचीचा (Anti-Defection Law) उल्लेख. पक्षाने स्पष्ट केले आहे की, पक्षांतरबंदी कायद्यांतर्गत उपलब्ध असलेल्या सर्व घटनात्मक आणि कायदेशीर तरतुदींचा वापर करण्याचा अधिकार त्यांनी राखून ठेवला आहे.
याचा अर्थ, जर पक्षाच्या निवडून आलेल्या खासदारांनी पक्षविरोधी भूमिका घेतली किंवा वेगळा गट निर्माण करण्याचा प्रयत्न केला, तर त्यांच्याविरोधात पक्षांतरबंदी कायद्याअंतर्गत कारवाईची शक्यता नाकारता येणार नाही.
अरविंद सावंत यांनी पाठवले पत्र
हे निवेदन शिवसेना (उद्धव बाळासाहेब ठाकरे) संसदीय पक्षाचे नेते आणि दक्षिण मुंबईचे खासदार अरविंद सावंत यांनी लोकसभा अध्यक्षांकडे पाठवले आहे.
राजकीय वर्तुळात सुरू असलेल्या चर्चांनुसार, उद्धव ठाकरे गटातील काही खासदार वेगळी भूमिका घेण्याच्या तयारीत असल्याचे वृत्त समोर येत आहे. या पार्श्वभूमीवर पक्षाने आगाऊ भूमिका घेत लोकसभा अध्यक्षांना अधिकृतपणे आपली बाजू कळवली आहे.
राजकीय संदेश काय?
राजकीय विश्लेषकांच्या मते, हे पत्र केवळ संसदीय प्रक्रियेचा भाग नसून पक्षातील संभाव्य बंडखोरी रोखण्याचा आणि पक्षाची अधिकृत भूमिका नोंदवून ठेवण्याचा प्रयत्न आहे. यामुळे भविष्यात कोणताही गट स्वतंत्र मान्यतेचा दावा करत असल्यास उद्धव ठाकरे गटाला घटनात्मक आणि कायदेशीर लढाईत आधार मिळू शकतो.
दरम्यान, खासदारांच्या संभाव्य फुटीबाबतच्या चर्चांमुळे महाराष्ट्रातील राजकारण पुन्हा एकदा तापले असून, पुढील काही दिवसांत या प्रकरणात कोणते राजकीय निर्णय घेतले जातात याकडे सर्वांचे लक्ष लागले आहे. विशेषतः लोकसभा अध्यक्षांची भूमिका आणि संबंधित खासदारांची पुढील पावले महाराष्ट्राच्या राजकारणाला नवे वळण देऊ शकतात.
‘टायगर अभी जिंदा है’ उद्धव ठाकरेच मैदानात, गेम फिरणार? दिल्लीत घेणार पत्रकार परिषद
मागील काही दिवसांपासून ठाकरे गटाचे खासदार फुटणार अशी दबक्या आवाजात चर्चा सुरू होती. पण, अशातच ठाकरे गटाचे ६ खासदार नॉट रिचेबल असल्याचं समोर आलं. काही खासदार हे दिल्लीला पोहोचले असल्याचं समोर आलं आहे. त्यामुळे आता खासदारांना वाचवण्यासाठी उद्धव ठाकरे मैदानात उतरले आहे. उद्धव ठाकरे दिल्लीकडे रवाना होणार असल्याची माहिती समोर आली आहे.
मिळालेल्या माहितीनुसार, उद्धव ठाकरे हे दिल्लीत पोहोचणार आहे. बुधवारी सकाळी 10 वाजता उद्धव ठाकरे यांची नवी दिल्ली पत्रकार परिषद होणार आहे. खासदार संजय राऊत यांच्या निवासस्थानी ही पत्रकार परिषद होणार आहे. ठाकरेंच्या पक्षाच्या दिल्लीत उपस्थित असलेल्या सर्व खासदारांच्या उपस्थितीत ही पत्रकार परिषद होणार आहे. आता या पत्रकार परिषदेला कोणकोणते खासदार उपस्थित राहणार हे पाहणं महत्वाचं ठरणार आहे.
ठाकरे गटांचे कोणते खासदार दिल्लीत पोहोचले?
खासदार संजय जाधव (बंडू) – दिल्ली
खासदार संजय देशमुख – दिल्ली
खासदार संजय दिना पाटील – दिल्ली
खासदार भाऊसाहेब वाघचौरे – दिल्ली
एकनाथ शिंदेही दिल्लीला रवाना
दरम्यान, ठाकरे गटाचे ६ खासदार हे शिंदे गटाच्या गळाला लागले असल्याचं समोर आलं आहे. ठाकरेंच्या शिवसेनेचे दोन खासदार खाजगी विमानाने दिल्लीला रवाना झाले आहे. त्यांच्या पाठोपाठ एकनाथ शिंदे हे दिल्लीला नवी मुंबई विमानतळावरून रवाना झाले आहे. रात्री उशिरा एकनाथ शिंदे हे दिल्लीत पोहोचतील. त्यानंतर पुढील घडामोडींना वेग येईल.
