कुर्ला दि. २८ (विकास लहाने) संकल्प संस्था आयोजित १९ आठवड्यांच्या सामाजिक कार्यकर्ता प्रशिक्षण वर्गाची सांगता व प्रमाणपत्र वितरण सोहळा रविवार, दिनांक २२ फेब्रुवारी २०२६ रोजी नेहरू नगर, कुर्ला (पूर्व) येथील पंतवालावलकर स्कूल येथे उत्साहात व यशस्वीरीत्या पार पडला.
सामाजिक क्षेत्रात कार्यरत तसेच समाजकार्याची आवड असलेल्या इच्छुकांसाठी राबविण्यात आलेल्या या प्रशिक्षण वर्गामध्ये समाजकार्याची संकल्पना, त्याचे महत्त्व, नेतृत्वगुण, संवादकौशल्य, गटकार्य, प्रचार-प्रसिद्धी माध्यमे, समाजकार्यकर्त्यांची भूमिका तसेच विविध सामाजिक समस्या अशा एकूण ५२ विषयांवर ३५ तज्ज्ञ मार्गदर्शकांकडून सखोल मार्गदर्शन करण्यात आले.
प्रशिक्षणाचा भाग म्हणून चार शनिवारी विविध सामाजिक संस्था, संघटना व शासकीय कार्यालयांना शैक्षणिक भेटी देण्यात आल्या. याशिवाय दोन दिवसीय निवासी शिबिराचे आयोजन करून व्यक्तिमत्त्व विकास, स्वयं-परिचय व गटगत उपक्रमांवर विशेष सत्रे घेण्यात आली.
कार्यक्रमाची सुरुवात दीपप्रज्वलनाने तसेच डॉ. बाबासाहेब आंबेडकर व क्रांतीज्योती सावित्रीबाई फुले यांच्या प्रतिमेस पुष्पहार अर्पण करून करण्यात आली. त्यानंतर स्वागतगीत सादर करण्यात आले.
या कार्यक्रमास प्रमुख पाहुण्या म्हणून गायत्री सज्जन (वरिष्ठ वैद्यकीय समाज विकास अधिकारी, के. जे. सोमय्या हॉस्पिटल) उपस्थित होत्या. विशेष अतिथी म्हणून युगंधरा कोळी (अभिनेत्री, मॉडेल व रील स्टार), गौरी राव (अखिल चित्रपट महामंडळ सदस्या, अभिनेत्री व शास्त्रीय कथ्थक नृत्यांगना) तसेच मा. सूरज भोईर (अध्यक्ष – मैत्री संस्था) यांची उपस्थिती लाभली.
स्वागताध्यक्ष म्हणून विनोद हिवाळे (संस्थापक/अध्यक्ष – संकल्प संस्था) तर मान्यवर म्हणून सत्येंद्र सामंत (सचिव – महाराष्ट्र विद्या विकास मंडळ, कुर्ला) उपस्थित होते. कार्यक्रमाचे समन्वयक सविता हेंडवे, दीपा गमरे व वनिता सावंत यांनी संयोजनाची जबाबदारी पार पाडली.
प्रतिभा पाटलीपुत्र यांनी उपस्थित मान्यवरांचा परिचय करून दिला, तर प्रदीप रणदिवे यांनी प्रस्तावना मांडली. कार्यक्रमाचे सूत्रसंचालन अविनाश पाटील व रेश्मा जगताप यांनी प्रभावीपणे केले. प्रशिक्षणादरम्यानचे अनुभव, आलेल्या अडचणी व भविष्यातील सामाजिक वाटचाल याबाबत प्रशिक्षणार्थींनी मनोगत व्यक्त केले.
प्रमुख पाहुण्यांच्या हस्ते १९ आठवड्यांचे प्रशिक्षण यशस्वीरीत्या पूर्ण केलेल्या सर्व प्रशिक्षणार्थींना प्रमाणपत्रे प्रदान करण्यात आली. तसेच निवासी शिबिरातील गटगत स्पर्धांमध्ये उत्कृष्ट कामगिरी करणाऱ्या प्रशिक्षणार्थींना सन्मानचिन्हे देऊन गौरविण्यात आले.
स्वागताध्यक्ष विनोद हिवाळे यांनी सामाजिक कार्यकर्त्यांची भूमिका, जबाबदारी व भविष्यातील सामाजिक योगदान याविषयी मार्गदर्शन केले. प्रमुख पाहुण्यांनीही प्रशिक्षणार्थींना पुढील वाटचालीसाठी प्रेरणादायी शुभेच्छा दिल्या. “या प्रशिक्षणामुळे समाजाला जबाबदार, संवेदनशील व सजग सामाजिक कार्यकर्ते लाभतील” असा विश्वास मान्यवरांनी व्यक्त केला.
आयोजकांच्या वतीने पुढील वर्षी सामाजिक कार्यकर्ता प्रशिक्षण वर्गाची सहावी बॅच सुरू करण्याचा संकल्प व्यक्त करण्यात आला. प्रशिक्षणार्थींनी आरोग्य, शिक्षण, महिला-बालकल्याण, व्यसनमुक्ती व संविधान जागृती या क्षेत्रांत सक्रिय कार्य करण्याचा निर्धार केला.
कार्यक्रमाचे आभार प्रदर्शन प्रवीण रूपवते यांनी केले. नियोजनासाठी अश्विनी घुमरे, अमित कराळे, कल्पेश वाकुडे, संजया भास्करे व फोजिया अन्सारी यांनी विशेष परिश्रम घेतले. डॉ. संतोष कांबळे, स्नेहा कासारे, अविनाश पाटील, सोनाली कांबळे व रेणुका सिंग यांचे सहकार्य लाभले. राष्ट्रगीताने कार्यक्रमाची सांगता करण्यात आली.
