माजी लष्करप्रमुख जनरल (निवृत्त) एम. एम. नरवणे यांच्या Four Stars of Destiny या आत्मचरित्राच्या प्रकाशनावरून सुरू झालेला वाद मंगळवारी आणखी तीव्र झाला. या पार्श्वभूमीवर जनरल नरवणे यांनी पेंग्विन रँडम हाऊस इंडिया या प्रकाशकाचे स्पष्टीकरण सोशल मीडियावर शेअर करत पुस्तक अद्याप प्रकाशित झालेले नसल्याची भूमिका पुन्हा स्पष्ट केली.या मुद्द्यावर भाजप आणि काँग्रेसमध्ये आरोप-प्रत्यारोप सुरूच आहेत. भाजप प्रवक्ते प्रदीप भंडारी यांनी राहुल गांधींवर निशाणा साधत त्यांच्या भूमिकेत विसंगती असल्याचा आरोप केला. राहुल गांधी म्हणतात की ते माजी लष्करप्रमुखांवर विश्वास ठेवतात, पण आता स्वतः नरवणे यांनीच प्रकाशकाचे स्पष्टीकरण शेअर करत पुस्तक अप्रकाशित असल्याचे सांगितले आहे, असे भंडारी म्हणाले.
भंडारी यांनी पुढे प्रश्न उपस्थित केला की, या वादामुळे देशात संभ्रम निर्माण झाल्यानंतर राहुल गांधी आता राष्ट्राची माफी मागणार का?
संसद आणि देशाची दिशाभूल
भाजपचे राष्ट्रीय प्रवक्ते शहजाद पूनावाला यांनीही राहुल गांधींवर जोरदार टीका केली. त्यांनी राहुल गांधींवर संसद आणि जनतेची दिशाभूल केल्याचा आरोप करत त्यांना “राष्ट्रीय लाज” असल्याचे म्हटले.
एक्स वरील पोस्टमध्ये पूनावाला यांनी स्पष्ट केले की, राहुल गांधींनी दाखवलेली पोस्ट ही केवळ प्री-ऑर्डरसाठीची होती. “मग प्रश्न असा आहे की राहुल गांधींकडे हे पुस्तक आले कसे? कॉपीराइट कायदा किंवा ऑफिसियल सिक्रेट्स अॅक्टचे उल्लंघन झाले का? संरक्षणमंत्री राजनाथ सिंह यांच्यावर आरोप करताना राहुल गांधींनी देशाची दिशाभूल केली का? याच आधारे संसदेत गोंधळ घातला का?” असे प्रश्न त्यांनी उपस्थित केले.
पुस्तक प्रकाशित झालेलेच नाही
पेंग्विन रँडम हाऊस इंडियाने पुन्हा एकदा स्पष्ट केले की, Four Stars of Destiny हे पुस्तक कोणत्याही स्वरूपात प्रकाशित झालेले नाही. “एखादे पुस्तक तेव्हाच प्रकाशित मानले जाते, जेव्हा ते सर्व रिटेल चॅनेल्सवर खरेदीसाठी उपलब्ध असते,” असे प्रकाशकाने सांगितले.
काँग्रेस खासदार राहुल गांधी यांनी यापूर्वी प्रकाशकाच्या भूमिकेवर प्रश्नचिन्ह उपस्थित केले होते. त्यांनी 2023 मधील जनरल नरवणे यांच्या एका सोशल मीडिया पोस्टचा उल्लेख केला होता, ज्यात “माझे पुस्तक आता उपलब्ध आहे” असे नमूद होते. या पोस्टच्या आधारे राहुल गांधी यांनी पुस्तकाच्या प्रकाशनाबाबत विसंगती असल्याचा आरोप केला होता.
मात्र पेंग्विनने स्पष्ट केले की संबंधित पोस्टमध्ये केवळ प्री-ऑर्डर लिंक होती आणि ते पुस्तक दोन दिवसांतच मागे घेण्यात आले. त्यानंतर ते कोणत्याही ई-कॉमर्स प्लॅटफॉर्मवर उपलब्ध नाही.
अनधिकृत प्रतींवर कायदेशीर कारवाईचा इशारा
याआधी पेंग्विन इंडियाने अधिकृत निवेदनात सांगितले होते की, या आत्मचरित्राचे प्रकाशन हक्क केवळ त्यांच्याकडे आहेत आणि पुस्तक प्रकाशितच झालेले नाही. छापील, डिजिटल, पीडीएफ किंवा इतर कोणत्याही स्वरूपात उपलब्ध असलेली कोणतीही प्रत ही कॉपीराइट उल्लंघन ठरेल, असा इशाराही प्रकाशकाने दिला आहे. अशा प्रकरणांमध्ये कायदेशीर कारवाई करण्यात येईल, असेही त्यांनी स्पष्ट केले.
लोकसभेत पुस्तक दाखवल्यानंतर वादाला तोंड फुटले
लोकसभेत राहुल गांधी यांनी Four Stars of Destiny ची प्रत दाखवल्यानंतर हा वाद उफाळून आला. भाजपच्या वरिष्ठ नेत्यांनी यावर तीव्र आक्षेप घेतला असून, अप्रकाशित पुस्तकाचा संदर्भ संसदेत देणे चुकीचे असल्याचा त्यांचा युक्तिवाद आहे.
