कोथरूड : प्रभाग क्रमांक १० मधील डी.पी. रस्त्यालगत सुरू असलेल्या विविध विकासकामांना गती मिळाल्याने स्थानिक नागरिकांनी समाधान व्यक्त केले आहे. या पार्श्वभूमीवर शांतीबन, मैत्रेय बाग, इंद्रायणी, चिंतामणी, साई गणेश, डावी भुसारी कॉलनीतील दत्त मंदिर परिसर, सृष्टी, गुरुगणेशनगर, गुलमोहर आदी सोसायट्यांना नुकत्याच भेटी देण्यात आल्या. या भेटीदरम्यान किरण दगडेपाटील, रुपाली सचिन पवार, अल्पना गणेश वरपे आणि दिलीप वेडेपाटील यांनी स्थानिक नागरिकांशी थेट संवाद साधत परिसरातील विकासकामांचा सविस्तर आढावा घेतला.
आशिष गार्डन परिसरात रस्ता रुंदीकरणाचे काम पूर्ण झाल्यामुळे वाहतूक कोंडी मोठ्या प्रमाणात कमी झाली आहे. त्यामुळे दैनंदिन प्रवास अधिक सुरळीत झाला असून नागरिकांनी याबद्दल समाधान व्यक्त केले. तसेच एकलव्य कॉलेजकडे जाणारा नवीन डी.पी. रस्ता सुरू झाल्याने परिसरातील दळणवळण अधिक सोयीचे झाले असल्याचे नागरिकांनी सांगितले. मात्र, या नव्या रस्त्यामुळे शांतीबन चौकात काही प्रमाणात वाहतूक समस्या वाढल्याचेही निदर्शनास आणून देण्यात आले. शांतीबन चौकात सध्या असलेले PMPML सर्व्हिस व पार्किंग सेंटर नव्याने उपलब्ध झालेल्या जागेत स्थलांतरित करण्याच यावेळी आश्वासन देण्यात आले आहे. त्याठिकाणी आकर्षक व नागरिकांसाठी उपयुक्त असे गार्डन विकसित करण्याचा मानस असल्याची माहिती देण्यात आली.
भेटीदरम्यान पाणीपुरवठा, रस्ते, वाहतूक व्यवस्था, स्वच्छता तसेच इतर नागरी सुविधांबाबत सविस्तर चर्चा करण्यात आली. नागरिकांनी मांडलेल्या समस्या आणि सूचनांचा गांभीर्याने विचार करून त्या टप्प्याटप्प्याने सोडवण्यात येतील, अशी ग्वाही संबंधित उमेदवारांनी दिली. या सकारात्मक संवादामुळे प्रभागातील विकासाबाबत नागरिकांमध्ये आशावादाचे वातावरण निर्माण झाले आहे.
