कोथरूड : भुसारी कॉलनी–बावधन परिसरात कार्यरत असलेल्या हास्यकलब व योगा ग्रुपच्या सदस्यांची भेट घेऊन भाजप उमेदवारांनी प्रभाग क्रमांक १० मध्ये प्रचाराला गती दिली आहे. या वेळी नागरिकांशी थेट संवाद साधत विकासकामांचा आढावा घेण्यात आला तसेच पुढील काळातील प्राधान्यक्रम स्पष्ट करण्यात आले.
हास्यकलब व योगा ग्रुपच्या माध्यमातून परिसरातील नागरिक शारीरिक व मानसिक आरोग्यासाठी नियमितपणे एकत्र येतात. या भेटीत उमेदवारांनी या उपक्रमांचे कौतुक करत, आरोग्य, स्वच्छता, उद्याने, पादचारी मार्ग, ज्येष्ठ नागरिकांसाठी सुविधा आणि महिलांच्या सुरक्षेसाठी ठोस उपाययोजनांची माहिती दिली. नागरिकांनीही पाणीपुरवठा, वाहतूक, कचरा व्यवस्थापन आणि सार्वजनिक सुविधांबाबत आपल्या अपेक्षा मांडल्या.
या प्रचार भेटीत भाजप उमेदवार किरण दगडे पाटील, रुपाली सचिन पवार, अल्पना गणेश वरपे आणि दिलीप वेडेपाटील यांनी सक्रिय सहभाग घेतला. त्यांनी घरोघरी संपर्क साधत नागरिकांशी संवाद वाढवला आणि पक्षाच्या विकासात्मक धोरणांची माहिती दिली.
प्रभाग १० मध्ये सर्वसमावेशक विकास, नागरिकांचा सहभाग आणि पारदर्शक कारभार यावर भर देण्यात येईल, असा विश्वास उमेदवारांनी व्यक्त केला. या भेटीमुळे परिसरात सकारात्मक वातावरण निर्माण झाले असून आगामी निवडणुकीसाठी भाजपच्या प्रचाराला बळ मिळाल्याचे चित्र आहे.
