पुणे महापालिकेच्या निवडणुका थाटामाथात पार पडल्या अनेकांच्या अंगावर गुलाल पडले अनेकांच्या निराशा झाल्या; परंतु या सर्व गदाराळामध्ये समुदायाचे प्रतिनिधित्व म्हणून आरक्षित असलेल्या जागेवर न्यायालयीन प्रलंबित असलेल्या कुणबी समुदायाने अतिक्रमण केल्याने मूळ ओबीसींचे प्रतिनिधित्व सभागृहात कमी झाले असून त्यांच्या अन्याय हक्कांचा आवाज दबण्याची शक्यता नाकारता येत नाही. या परिस्थितीच्या विरोधात आज पुणे शहरातील मूळ ओबीसी संघटनांमार्फत दिशा ठरवण्यासाठी आज दुपारी बारा वाजता पत्रकार परिषद आयोजित करण्यात आली आहे.
ओबीसींच्या न्याय हक्कावर गदा येणार नाही अशी वल्गना सर्वच राजकीय पक्ष करत असताना ऐन निवडणुकीच्या काळामध्ये सर्रास सर्व पक्षांनी ओबीसी उमेदवारांना आरक्षित असलेल्या जागी समाजात प्राबल्य असलेल्या मराठा समाजातील पोटजात कुणबी यांनाच प्राधान्य दिल्याने संपूर्ण शहरातील ओबीसी समुदायाचे सभागृहातील प्रतिनिधित्व धोक्यात आले आहे. एकीकडे ओबीसींच्या हक्क रक्षणासाठी समुदायाची दिशाभूल करायची आणि दुसरीकडे सत्तेची गणिते जुळवताना पुन्हा आपलेच बांधव सभागृहात पाठवण्यासाठी ओबीसी जागेवरून संधी देऊन दुहेरी संधी साधण्याचा प्रयत्न सर्वच राजकीय पक्षांनी कार्य केला आहे.
पुणे शहरात मुळ ओबीसीसाठी आरक्षित असलेल्या जागांवर कुणबीच्या दाखल्याऺवर घुसखोरी करून मुळ ओबीसींच्या 45 पैकी 27 जागा लाटल्या आहेत. यामुळे मायक्रो ओबीसींच्या मुळ 350 जाती आणि भटक्या विमुक्तांच्या 62 जाती अशा एकूण 400 पेक्षा जास्त जातींच्या आरक्षणावर गदा आली आणि संविधानाने हक्काचे दिलेले आरक्षण कुणबीच्या नावाखाली काढलेल्या उमेदवारांनी लाटले. भारतीय संविधानाने लोकशाहीच्या सभागृहामध्ये सर्व समुदायाचे प्रतिनिधित्व असावे या हेतूने सर्व समुदायासाठी आरक्षणाची रचना केली असली तरी सुद्धा सत्तेची लाालसा असलेल्या उच्च समुदायाकडून ओबीसींच्या हक्कावर आणलेली गदा भविष्यात खूप मोठा धोका निर्माण करू शकते यासाठी ओबीसी समाजाच्या वतीने दिशा ठरवण्यासाठी आज पत्रकार परिषदेचे आयोजन करण्यात आले आहे.
पुणे महापालिकेच्या निवडणुकीत निवडुण आलेल्या उमेदवारांच्या यादिवर नजर टाकली असता सर्वाधिक उमेदवार एका ठराविक समाजाचे निवडुन आलेले आहेत. शहरातील भटके विमुक्त आणि मायक्रो ओबीसी वर्षानुवर्षे सत्तेपासून वंचित राहात आहेत. 
पुणे शहरातील सत्ताधारी असलेल्या भारतीय जनता पक्षाकडून विजयी झालेल्या उमेदवारांमध्ये 17 उमेदवारांची कुणबी प्रमाणपत्रावर निवड झाली आहे तर राष्ट्रवादी काँग्रेस पक्षाच्या वतीने नऊ उमेदवार कुणबी प्रमाणपत्रावर विजयी होऊन ओबीसींच्या कोट्यातून सभागृहात पोहोचले आहेत. विशेष म्हणजे विजयी झाल्यानंतर अनेकांच्या जल्लोषामध्ये पुन्हा ‘एक मराठा लाख मराठा’ अशा घोषणा देण्यात आल्या. सत्तेची गणिते जुळवण्यासाठी सर्वच पक्षांकडून ओबीसीवर अतिक्रमण होत असल्याने भविष्यात ओबीसी समुदायाचा आवाज सभागृहात कसा पोहोचणार ही खरी अडचण निर्माण झाली आहे.
