पुणे महापालिकेच्या नुकत्याच पार पडलेल्या सार्वत्रिक निवडणुकामध्ये यत्र तत्र सर्वत्र भारतीय जनता पक्ष विजय झाल्याची चर्चा असली तरी सुद्धा पूर्व पुणे म्हणून प्रसिद्ध असलेल्या वडगाव शेरी हडपसर व दक्षिण पुणे कॅन्टोन्मेंट परिसरामध्ये भारतीय जनता पक्षाला बसलेल्या फटक्यामुळे भारतीय जनता पक्षाच्या वतीने या भागातील आपली ताकद अबाधित ठेवण्यासाठी या परिसरातील निष्ठावान त्यागी समर्पित आणि सातत्यपूर्ण कार्य करणाऱ्या कार्यकर्त्यांना संधी देण्यासाठी स्वीकृत सदस्यत्वाचा विचार केला जाण्याची शक्यता नाकारता येत नाही. पुणे महापालिकेमध्ये 10 सदस्यांची स्वीकृत सदस्य म्हणून नियुक्ती केली जाणार आहे यापैकी सर्वाधिक सात सदस्य भारतीय जनता पक्षाकडून तर राष्ट्रवादी काँग्रेस पक्ष (दोन्ही) व अखिल भारतीय काँग्रेस पक्षाच्या वाट्याला प्रत्येकी एक अशा एकूण तीन जागा मिळणार आहेत. राष्ट्रवादी काँग्रेस पक्षाच्या वाट्याला आलेल्या दोन जागांपैकी एक जागा शरद पवार गट यांना दिली जाण्याची शक्यता आहे. काँग्रेस पक्षाच्या वाट्याला आलेल्या एका जागेसाठी जोरदार लॉबिंग झाले आहे.
सर्वसाधारणपणे आजपर्यंत पुणे शहरामध्ये स्वीकृत सदस्य नियुक्ती करताना पक्षाला ज्या भागांमध्ये फटका बसला आहे त्या भागात स्वीकृत सदस्यत्वाची संधी देत पुन्हा पक्षाच्या वाटचालीला उभारी देण्यासाठी केला जात असतो. परंतु मागील काही वर्षापासून राज्यस्तरावरील नेत्यांचा निष्ठावंत कार्यकर्ता या पदावर विराजमान झालेला पुणेकरांनी पाहिला आहे त्यामुळे स्वीकृत सदस्यांच्या यादीमध्ये धक्कादायक नावे येण्याची शक्यता नाकरता येत नाही. भारतीय जनता पक्षाच्या वतीने संपूर्ण पुणे शहरात ‘तुमची आमची भाजपा सर्वांची!’ म्हणत सर्वत्र भारतीय जनता पक्ष यश मिळवण्यात यशस्वी झाला आहे. परंतु पूर्व पुणे भागातील विरोधकांना मिळालेले यश लक्षात घेता पुणे शहरातील किमान दोन प्रभाग समितीवर विरोधकांचे प्राबल्य निर्माण झाले आहे. पुणे शहरातील काही निवडक प्रभाग समिती विरोधकांच्या ताब्यात जाण्याची शक्यता निर्माण झाली आहे. विशेष म्हणजे पूर्व पुणे भागातील भारतीय जनता पक्षाच्या बालेकिल्लाला धक्का देण्यामध्ये विरोधक यशस्वी झाल्याचे चित्र निर्माण झाले आहे.
सहाय्यक आयुक्त कार्यालयानुसार निर्माण झालेली पक्षीय बलाबलाची गणिते पुढील प्रमाणे –
येरवडा कळस धानोरी (3 – 9)
वडगावशेरी मतदार संघामध्ये पुन्हा एकदा विरोधक काँग्रेस आणि राष्ट्रवादी काँग्रेस पक्षाच्या वतीने नऊ जागी यश मिळवले आहे. भारतीय जनता पक्षाचे केवळ तीन नगरसेवक या क्षेत्रीय कार्यालयामध्ये विजयी झाले आहेत. वडगाव शेरी मतदारसंघातील विरोधकांची ताकद कमी करण्यासाठी भारतीय जनता पक्षाच्या वतीने रणनीती आखण्यात आली तरीसुद्धा या सहाय्यक आयुक्त कार्यालयामध्ये या रणनीतीला काही मर्यादा आल्या आहेत. या प्रभाग समितीमध्ये भारतीय जनता पक्षाच्या वतीने स्वीकृत सदस्यत्वाची संधी देण्याची शक्यता निर्माण झाली आहे.
नगररोड – वडगाव शेरी (12-0)
पुणे महापालिकेच्या या क्षेत्रीय कार्यालयामध्ये परिपूर्ण भाजपा अशी विक्रमी सदस्य संख्या मिळवण्यामध्ये भारतीय जनता पक्षाला यश आले आहे. भारतीय जनता पक्षाचे विरोधात एकही नगरसेवक नसल्याने एक हाती कारभार टाळण्यासाठी विरोधकांच्या वतीने या परिसरामध्ये स्वीकृत सदस्यत्व देण्याची शक्यता आहे. राष्ट्रवादी अजित पवार किंवा काँग्रेस पक्षाच्या वतीने या भागातील निष्ठावान कार्यकर्त्याला संधी निर्माण झाली आहे.
छत्रपती शिवाजीनगर घोले रोड (5- 3)
पुणे शहरात भारतीय जनता पक्षाच्या बालेकिल्ला समजला जाणाऱ्या शिवाजीनगर मतदार संघातील अत्यंत अटीतटीच्या लढतीमध्ये अखेरच्या क्षणी रणनीती यशस्वी करत भारतीय जनता पक्षाने आपले प्राबल्य सिद्ध केले आहे. या भागातील लढती सर्वत्र चर्चेत असताना अत्यंत चुरशीच्या परिस्थितीमध्ये पराभव स्वीकारलेल्या बाळासाहेब बोडके यांना पुन्हा संधी मिळण्याची शक्यता नाकारता येत नाही.
औंध बाणेर (6- 2)
पुणे महापालिकेच्या या क्षेत्रीय कार्यालयामध्ये सत्ताधारी भारतीय जनता पक्षाला आव्हान देत तीन माजी नगरसेवकांनी पक्षाला आव्हान देण्याचं बंड पुकारून पक्षांतर केल्याने सुरुवातीला या क्षेत्रीय कार्यालयातील दोन्ही प्रभागांमध्ये भारतीय जनता पक्षाला फटका बसण्याची शक्यता निर्माण झाली होती; परंतु भारतीय जनता पक्षाने या प्रभाग समितीमध्ये लक्षणीय यश मिळवले आहे. महाराष्ट्रात गाजलेली अतितटीची लढत भारतीय जनता पक्षाला गमवावी लागल्याने या भागातील निष्ठवान कार्यकर्त्याला (लहू बालवडकर) पुन्हा संधी देण्याची शक्यता निर्माण झाली आहे.
कोथरूड बावधन (9- 3)
भारतीय जनता पक्षाचे पुण्यातील शक्ती केंद्र म्हणून कोथरूड ची ओळख आहे. या भागातूनच दोन खासदार आणि एक आमदार अशी तगडी फौज असतानाही नगर रोड क्षेत्रीय कार्यालयाप्रमाणे पक्षाला यश मिळवणे शक्य झाले नाही. भारतीय जनता पक्षाचे या भागामध्ये प्राबल्य अबाधित आहे परंतु मर्जीतील उमेदवार न दिल्याने नेत्यांची नाराजी या प्रभागात निर्माण झाल्याने तीन जागांचा फटका पक्षाला सहन करावा लागला आहे. या मतदारसंघांमध्ये यापूर्वीच दोन खासदार (एक केंद्रीय राज्यमंत्री) एक आमदार अशा संधी दिल्या असल्यामुळे स्वीकृत सदस्य मिळण्याची शक्यता कमी आहे; परंतु धक्कादायक रीतीने निष्ठावान कार्यकर्ता संधी पासून दुरावल्याने 2 चेहरे या यादीमध्ये धक्कादायकपणे येण्याची शक्यता नाकारता येत नाही.
ढोले पाटील रोड (4- 4)
पुणे शहरातील काँग्रेस पक्षाची ताकद म्हणून ज्या प्रभाग समितीचा कायमूल्य केला जातो त्या प्रभाग समितीमध्ये भारतीय जनता पक्षाच्या तोडीस तोड विरोधकांनी कामगिरी करून भारतीय जनता पक्षाची गणिते बिघडवण्याचे काम केले आहे. त्यातच या भागामध्येच विरोधी पक्षनेता पद जाण्याची शक्यता लक्षात घेऊन भारतीय जनता पक्षाच्या वतीने पुणे कॅन्टोन्मेंट या मतदारसंघांमध्ये काँग्रेसने लक्षणीय वाढ केल्याने पक्षीय ताकद वाढवण्यासाठी भारतीय जनता पक्षाच्या वतीनेही निष्ठावनांना संधी मिळण्याची शक्यता आहे.
हडपसर मुंडवा (8- 4)
पुणे शहरातील या मतदारसंघावर आपले प्राबल्य राखण्यासाठी भारतीय जनता पक्षाच्या वतीने विविध प्रवेश आणि घराण्यातील उमेदवारी अशी गणिते आखत प्राबल्य राखण्यात यश मिळवले आहे. विरोधकांच्या वतीने सुद्धा या परिसरामध्ये योग्य नियोजन करण्यात आलेले आपली बलस्थाने टिकवण्यात यश मिळाले आहे. संभाव्य पुणे शहरातील गणिते लक्षात घेऊन पूर्व पुण्यातील पक्षाची ताकद वाढवण्यासाठी भारतीय जनता पक्षाच्या वतीने या भागात स्वीकृत सदस्यत्व दिलेले शक्यता आहे.
वानवडी रामटेकडी (4- 8)
भारतीय जनता पक्षाला या क्षेत्रीय कार्यालयामध्ये अनपेक्षित फटका बसल्यामुळे प्रभाग समिती एक प्रमाणे पूर्व पुण्यातील विरोधकांच्या ताब्यात असलेले दुसरे क्षेत्रीय कार्यालय म्हणून ओळख निर्माण होणार आहे. या भागात भारतीय जनता पक्षाचे प्राबल्य वाढवण्यासाठी प्रयत्न केले असले तरी सुद्धा त्याला यश मिळाले नाही. विविध प्रकारचे प्रवेश विधान परिषद आमदार यांची रणनीती या सर्व गोष्टींपेक्षा विरोधकांच्या रणनीतीला या भागांमध्ये यश मिळाल्याचे जाणवत आहे. या भागात भारतीय जनता पक्षाची ताकद वाढवण्यासाठी स्वीकृत सदस्यत्वाचा प्राधान्यक्रमाने विचार केला जाईल. पुणे लोकसभेचा संभाव्य उमेदवार याच भागातून येण्याची शक्यता लक्षात घेऊन भारतीय जनता पक्षाच्या वतीने धोरणात्मक निर्णय घेतला जाण्याची शक्यता आहे.
बिबवेवाडी क्षेत्रीय कार्यालय (10-2)
भारतीय जनता पक्षाच्या रणनीतीनुसार या प्रभाग समितीमध्ये भारतीय जनता पक्षाला अपेक्षित यश मिळाले आहे. या भागातील सर्व चेहऱ्यांना महापालिकेमध्ये संधी देण्यात यश आल्यामुळे या भागातून स्वीकृत सदस्यत्व देण्यासाठी जास्त विचार केला जाणार नाही. केंद्रीय राज्यमंत्री पद याच भागात असल्याने भारतीय जनता पक्षाच्या वतीने स्वीकृत सदस्यत्व दिले जाणार नसले तरी सुद्धा पुणे महापालिकेतील महत्त्वाची पदे या भागात जाण्याची शक्यता मात्र आहे.
भवानी पेठ क्षेत्रीय कार्यालय (9- 3)
पुणे महापालिकेचे सत्ता केंद्र म्हणून भवानी पेठ क्षेत्रीय कार्यालयाचा ओरा निर्माण झाला असला तरीसुद्धा अपेक्षित विरोधक या महापालिकेमध्ये विजयी न झाल्याने एकतर्फी झालेल्या या क्षेत्रीय कार्यालयामध्ये दिग्गज उमेदवारी असल्याने या भागातून पुन्हा स्वीकृत सदस्यत्वाचा विचार होण्याची शक्यता कमी आहे. मुळात एका खास विरोधकांसाठी सोयीस्कर अशी प्रभाग रचना सत्ताधारी भाजपच्या वतीने करण्यात आल्याने या क्षेत्रीय कार्यालया मधून स्वीकृत सदस्यांची शक्यता फार कमी आहे.
कसबा विश्रामबाग क्षेत्रीय कार्यालय (10- 2)
पुणे शहरातील भारतीय जनता पक्षाचा बालेकिल्ला वर्षानुवर्ष भारतीय जनता पक्षाचे नगरसेवक निवडून देणारा भाग म्हणून कसबा विश्राम भाग परिसराची ओळख आहे. पुण्यातील सर्वाधिक घराण्यामध्ये उमेदवारी दिलेला भाग म्हणून या भागाची ओळख निर्माण झाली आहे. वारसांची सोय या तत्त्वानुसार भारतीय जनता पक्षाने उमेदवारी देत लक्षणीय मते पदरात पाडून घेतली असली तरी सुद्धा या भागातील पिढ्यानपिढ्या काम करणाऱ्या निष्ठावनांना संधी देण्यासाठी स्वीकृत सदस्यत्व देण्याची शक्यता आहे. संपूर्ण पुणे शहरातील सर्वाधिक मताधिक्य मिळवून राघवेंद्र बापू मानकर यांनी इतिहास निर्माण केला असला तरी सुद्धा या भागात नव्या गणितांमुळे निर्माण झालेल्या सत्ता केंद्राचं ‘त्रांगड’ स्वीकृतच्या संधीचा गळा घोटण्याची शक्यता आहे.
वारजे कर्वेनगर क्षेत्रीय कार्यालय (11-1)
पुणे महापालिकेच्या इतिहासात प्रथमच परिपूर्ण सदस्य संख्या मिळवण्यामध्ये यश आलेला भाग म्हणून वारजे कर्वेनगर क्षेत्रीय कार्यालयाकडे पाहिले जाणार आहे. यापूर्वी फक्त एकाच प्रभागात प्राबल्य असलेल्या भारतीय जनता पक्षाने हळूहळू वाटचाल करत संपूर्ण क्षेत्रीय कार्यालयामध्ये आपली ताकद वाढवण्यास सुरुवात केली. मागील निवडणुकीमध्ये दोन प्रभागांमध्ये (7) भारतीय जनता पक्षाला यश मिळाले होते; यावेळी मात्र भारतीय जनता पक्षाच्या वतीने विद्यमान विरोधकांनाच भाजपवाशी करून या प्रभागामध्ये रणनीती आखली त्यामुळे अनपेक्षितपणे पराभव स्वीकारावी लागलेली एक जागा वगळता भारतीय जनता पक्षाला प्रचंड यश मिळाले आहे.
सिंहगड रोड क्षेत्रीय कार्यालय (10-2)
पुणे शहरातील भारतीय जनता पक्षाची ताकद अबाधित करण्यात आणि तुमची आमची भाजपा सर्वांची! म्हणत बिनविरोध दोन जागा विजयी करण्यात भारतीय जनता पक्षाला यश आले. उर्वरित अत्यंत प्रतिष्ठेच्या लढतीमध्ये राष्ट्रवादी काँग्रेस पक्ष तुतारीचे दोन उमेदवार या प्रभागामध्ये विजयी झाल्याने आगामी विधानसभेच्या गणितांचा विचार करून या भागातील निष्ठावनांना स्वीकृत सदस्य देण्याची शक्यता नाकारता येत नाही.
धनकवडी सहकारनगर क्षेत्रीय कार्यालय (11-2)
पुणे शहरातील दिग्गज लोकांना एकत्र गोवण्याचा प्रयत्न केलेला एकमेव पाच सदस्यांचा प्रभाग म्हणून या क्षेत्रीय कार्यालयातील प्रभागाचा उल्लेख केला जातो. पुणे शहरातील लढतीचे लक्ष साध्य करण्यासाठी भारतीय जनता पक्षाच्या वतीने प्रचाराचा शुभारंभ सुद्धा याच भागातून करण्यात आला होता. मुळात या अतितटीच्या लढतीमध्ये भारतीय जनता पक्षाच्या रणनीतीला यश येऊन या क्षेत्रीय कार्यालयामध्ये प्राबल्य निर्माण झाले आहे. विरोधकांच्या गणितामध्ये अगदी सुरुवातीच्या क्षणीच समझोता करून पक्षासाठी आपली निष्ठा कायम ठेवणाऱ्या विशाल तांबे यांना स्वीकृत सदस्यत्व मिळण्याची शक्यता नाकारता येत नाही.
कोंढवा-येवलेवाडी क्षेत्रीय कार्यालय(7-1)
पुणे महापालिकेचे नव्याने समाविष्ट झालेल्या भागाची प्रभाग समिती म्हणून या प्रभाग समितीकडे कायमच पाहिले जाणार आहे. या नव्याने निर्माण झालेल्या भागामध्ये सुद्धा भारतीय जनता पक्षाने आपले प्राबल्य राखण्यात यश मिळवले आहे. मुळात हडपसर विधानसभा मतदारसंघातील विधानपरिषद आमदार यांचा प्रभाग म्हणून या प्रभाग समितीकडे पाहिले जाणार आहे. शेजारील दोन प्रभाग समितीमध्ये पक्षाची लक्षणीय कामगिरी साध्य न झाल्याने या प्रभागाची कृत सदस्यत्वाचा विचार करण्याची शक्यता ही कमी आहे.
