शिक्षक हक्क कायद्यानुसार खासगी शाळांमधील २५ टक्के राखीव जागांवरील प्रवेश प्रक्रियेअंतर्गत राज्यातील आठ हजार ५०२ शाळांमधील तब्बल एक लाख तीन हजार ७०८ जागांसाठी विद्यार्थ्यांचे ऑनलाइन अर्ज भरण्याची प्रक्रिया मंगळवारपासून (ता.१४) सुरू होत आहे. पालकांना ‘https://student.maharashtra.gov.in/adm_portal’ या लिंकवर विद्यार्थ्यांचे अर्ज भरता येणार आहेत. या अंतर्गत बालकांचा ऑनलाइन प्रवेश अर्ज भरण्यासाठी २७ जानेवारीपर्यंत मुदत देण्यात आली आहे.
बालकांचा मोफत व सक्तीच्या शिक्षणाचा अधिकार अधिनियम २००९ कलम १२ (सी) (१) नुसार दुर्बल व वंचित घटकांतील बालकांना स्वयं अर्थसहाय्यित शाळा, विना अनुदानित शाळा, पोलिस कल्याणकारी शाळा (विनाअनुदानित) आणि महापालिका (स्वयं अर्थसहाय्यित शाळा) यामध्ये प्रवेशासाठी २५ टक्के जागा राखीव आहेत. या राखीव जागांवरील प्रवेशासाठी प्राथमिक शिक्षण संचालनालयातर्फे ऑनलाइन प्रवेश प्रक्रिया राबविण्यात येते. त्यानुसार, शैक्षणिक वर्ष २०२५-२६ करिता बालकांच्या प्रवेशासाठी ऑनलाइन अर्ज भरण्याची प्रक्रिया मंगळवारपासून सुरू होत असल्याची माहिती राज्याचे प्राथमिक शिक्षण संचालक शरद गोसावी यांनी सांगितले.
ऑनलाइन अर्ज सादर करण्याची प्रक्रिया पूर्ण झाल्यानंतर ऑनलाइन सोडत काढण्यासाठी तारीख निश्चित केली जाईल. शैक्षणिक वर्ष २०२५-२६ याकरिता एकाच टप्प्यात सोडत काढली जाईल. तसेच शाळेत उपलब्ध जागांएवढी एक प्रतीक्षा यादी तयार केली जाईल. सोडतीत निवड झालेल्या विद्यार्थ्यांना प्रवेशासाठी पुरेसा कालावधी देण्यात येईल. त्यानंतर टप्प्या-टप्प्याने प्रतीक्षा यादीतील विद्यार्थ्यांच्या प्रवेशासाठी संधी दिली जाईल, असे शिक्षण विभागाने स्पष्ट केले आहे.
पालकांसाठी सूचना
आर्थिक वर्षात वार्षिक उत्पन्न एक लाख रुपयांपेक्षा कमी असावे
२५ टक्के प्रवेश प्रक्रियेकरिता विचारपूर्वक १० शाळांची निवड करावी
अर्ज भरताना शाळेपासून ते घरापर्यंतचे हवाई अंतर गुगल मॅपने निश्चित करावे
प्रवेश प्रक्रियेबाबत काही समस्या असल्यास आरटीई पोर्टलवर दिलेल्या मदत केंद्रांशी संपर्क साधावा
पालकांनी ऑनलाइन अर्ज करताना अचूक माहिती भरावी
पुणे जिल्ह्यात पावासाचा धुमाकूळ; कुठे, काय परिस्थिती?
प्रवेशासाठी आवश्यक कागदपत्रे
निवासी पुरावा
जन्म तारखेचा पुरावा
जातीचा दाखला
आर्थिकदृष्ट्या दुर्बल संवर्गातील प्रवेशाकरिता वार्षिक उत्पन्नाचा दाखला आणि अन्य
खोटी माहिती भरल्यास प्रवेश होणार रद्द
विद्यार्थ्यांनी खोटी, चुकीची माहिती भरून प्रवेश निश्चित केला आणि ही बाब प्रशासनाच्या निदर्शनास आल्यास खोटी, चुकीची माहिती भरून दिशाभूल केल्याप्रकरणी आरटीई २५ टक्के राखीव जागांवरील प्रवेश कोणत्याही टप्प्यावर रद्द करण्यात येईल, असा इशारा प्राथमिक शिक्षण संचालक शरद गोसावी यांनी दिला आहे.
