राजस्थान सरकारने मुख्याध्यापकांच्या परवानगीशिवाय बाहेरच्या व्यक्तींच्या सरकारी शाळांमध्ये प्रवेशावर निर्बंध घातले आहेत. लेखी परवानगीशिवाय शाळांच्या आवारामध्ये छायाचित्रे काढणे, चित्रीकरण करण्यास बंदी घातली आहे. कॉक्रोच जनता पक्षाने (सीजेपी) राज्यातील शाळांची पाहणी करण्याचे जाहीर केल्यानंतर, सरकारने हा निर्णय घेतला आहे.
राजस्थानातील सरकारी शाळांच्या दुरवस्थेचे व्हिडिओ सोशल मीडियावर व्हायरल झाले आहेत. अनेक ठिकाणी शिक्षकांची कमतरता असून, मूलभूत सुविधांचीही वानवा आहे. व्हिडिओ व्हायरल झाल्यानंतर कॉक्रोच जनता पक्षाचे सहसंयोजक आशुतोष रांका यांनी दुरवस्था झालेल्या शाळांना भेटी देणार असल्याचे रविवारी सकाळी सोशल मीडियावर जाहीर केले होते. त्यानंतर, राज्य सरकारने रविवारी सायंकाळी आदेश काढत खासगी व्यक्तींच्या शाळांमधील प्रवेशांवर बंदी घातली आहे. रांका यांनी म्हटले की ‘मला जयपूर, अजमेर, बारमेर, कोटा अशा शहरांमधून शाळांच्या पाहणीसाठी विनंती करण्यात आली आहे. पुढील काही दिवसांमध्ये मी या शाळांना भेट देणार आहे.’ त्यानंतर काही तासांमध्येच माध्यमिक शिक्षण संचालक ललितकुमार यांनी पत्रक काढत खासगी व्यक्तींच्या प्रवेशावर निर्बंध आणले आहेत.
या आदेशानुसार बाहेरून येणाऱ्या व्यक्ती वर्ग, प्रयोगशाळा, ग्रंथालये, वसतिगृहे, मैदाने, स्वच्छतागृहे किंवा शिक्षक-मुख्याध्यापकांशिवाय विद्यार्थी काही गोष्टी करत असतील, अशा कोणत्याही ठिकाणी जाऊ शकणार नाहीत. तसेच, लेखी परवानगीशिवाय व्हिडिओ किंवा छायाचित्रे काढण्यास मनाई आहे. शिक्षणमंत्री मदन दिलावर यांनी या आदेशाचे समर्थन केले आहे.
