पुणे महापालिकेच्या विविध विभागांत नोकरी देण्याचे आमिष दाखवून शिपाई व त्याच्या साथीदारांनी उमेदवाराला बनावट नियुक्तीपत्र देऊन त्याच्याकडून ४५ लाख रुपये उकळल्याचा प्रकार उघडकीस आला. या प्रकरणी जेजुरी देवस्थानचे विश्वस्त राजेंद्र बबन खेडेकरसह महापालिकेच्या शिक्षण विभागातील शिपाई शिवानंद बाळासाहेब पाटील, नमिता गोवर्धन बनसोडे आणि इतर साथीदारांविरोधात शिवाजीनगर पोलिस ठाण्यात गुन्हा दाखल करण्यात आला. याबाबत, पुणे महापालिकेच्या सामान्य प्रशासन विभागाच्या अधीक्षकांनी तक्रार दिली आहे. हा प्रकार मे २०२२ ते मे २०२५ या कालावधीत महापालिकेच्या परिसरासह इतर ठिकाणी घडल्याचे तक्रारीत नमूद आहे.
पोलिसांनी दिलेल्या माहितीनुसार, आरोपींनी पुणे महापालिकेत कायमस्वरूपी नोकरी लावून देण्याचे आश्वासन देऊन अनेक बेरोजगार युवक-युवतींकडून मोठ्या प्रमाणात पैसे उकळून बनावट नियुक्ती पत्र दिल्याच्या तक्रारी महापालिका प्रशासनाकडे प्राप्त झाल्या होत्या.
पालिकेच्या सामान्य प्रशासन विभागाने या तक्रारींची पडताळणी केली असता, पाटण येथील एका तरुणाची भवन विभागात कनिष्ठ अभियंता पदावर नियुक्ती केल्याचे बनावट पत्र आणि त्याची टिळक रस्ता क्षेत्रीय कार्यालयात नेमणूक केल्याचा खोटा आदेश आढळून आला. या तरुणाने पुणे महापालिकेला नोटीस पाठविली आहे. त्यामध्ये या पदावर नोकरी लावण्यासाठी आरोपी शिवानंद पाटील, राजेंद्र खेडेकर, नमिता बनसोडे व आणखी एकाने वेळोवेळी ४५ लाख रुपये घेऊन नियुक्ती पत्र दिल्याचे नमूद आहे.
या नियुक्तीपत्रावर उपायुक्त व प्रशासकीय अधिकाऱ्यांच्या खोट्या स्वाक्षऱ्या, बनावट शिक्के, महापालिकेचे चिन्ह व वॉटरमार्कचा गैरवापर करून बनावट नियुक्तीपत्र दिल्याचे प्रशासनाच्या पडताळणीत समोर आले. आरोपींनी अनेकांना नियुक्तीचे आश्वासन देऊन त्यांच्याकडून रोख व धनादेश स्वरूपात रक्कम स्वीकारली असून, या प्रकरणात आणखी काही जणांचा सहभाग असल्याची शक्यता पोलिसांकडून व्यक्त केली जात आहे. या अनुषंगाने संबंधितांचे आर्थिक व्यवहार, कागदपत्रे आणि पुराव्यांची तपासणी शिवाजीनगर पोलिसांकडून सुरू आहे.
डॉ. राजेंद्र खेडकर यांनी आरोप फेटाळले
या प्रकरणात नाव आलेले जेजुरी देवस्थानचे विश्वस्त डॉ. राजेंद्र खेडेकर यांनी दिलेल्या निवेदनात आपल्यावरील आरोप फेटाळले आहेत. आपण स्वतः या प्रकरणातील तक्रारदार असून, अनेक पीडितांना पैसे परत मिळवून देण्यासाठी पाठपुरावा केला असल्याचा दावा त्यांनी केला आहे. महापालिकेची नियुक्तीपत्रे, बदली आदेश, ओळखपत्रे, सेवा पुस्तिका, स्वाक्षऱ्या किंवा कोणत्याही आर्थिक व्यवहारांशी आपला प्रत्यक्ष अथवा अप्रत्यक्ष संबंध नसल्याचे त्यांनी स्पष्ट केले. संपूर्ण आर्थिक व्यवहार, बँक खाते, कॉल रेकॉर्ड व डिजिटल पुराव्यांची निष्पक्ष चौकशी करून खरे दोषी समोर आणावेत आणि बदनामी करणाऱ्यांवरही कठोर कारवाई करावी, अशी मागणी त्यांनी निवेदनातून केली आहे.
