जेलीफिशच्या विषारी दंशाची गंभीर दुखापत आणि तब्बल ११ शस्त्रक्रियांच्या असह्य वेदनांवर मात करत, अवघ्या १४ तास ३१ मिनिटांत ५४ किलोमीटर लांबीची अत्यंत आव्हानात्मक ‘इंग्लिश खाडी’ पोहून पार करण्याचा ऐतिहासिक पराक्रम पुण्याच्या २१ वर्षीय जलतरणपटू गीता दिपाली महेश मालुसरे हिने केला आहे. तिच्या या अद्वितीय आणि जागतिक स्तरावरील दैदिप्यमान कामगिरीचे कौतुक करण्यासाठी कर्वेनगर येथील प्रसिद्ध मोरया मित्र मंडळाच्या वतीने तिचा सत्कार सोहळा आयोजित करण्यात आला होता.
या विशेष सत्कार सोहळ्याचे आयोजन मोरया मित्र मंडळाचे संस्थापक केदार वसंत मारणे यांच्या वतीने करण्यात आले होते.
याप्रसंगी इतिहास संशोधक मंडळ सदस्य मंगेश नवघणे, शिवाजी तात्या मोरे, गणेश गायकवाड आणि महेशजी मालुसरे या मान्यवरांची प्रमुख उपस्थिती होती. मान्यवरांच्या हस्ते गीता मालुसरे हिचा छत्रपती श्री शिवाजी महाराज यांचे पुस्तक आणि श्रीफळ देऊन गौरव करण्यात आला.
संकटांवर मात करत रचला इतिहासः
कु.गीताने वयाच्या अवघ्या १३ व्या वर्षी मुंबईच्या समुद्रात ३२ किलोमीटरचे अंतर ६ तास २६ मिनिटांत पार करून सर्वांचे लक्ष वेधले होते. मात्र, नोव्हेंबर २०२२ मध्ये रत्नागिरी येथील एका सागरी स्पर्धेदरम्यान जेलीफिशच्या विषारी दंशामुळे तिच्या हाताला गंभीर दुखापत झाली होती. डॉक्टरांनी हात निकामी होण्याची भीती व्यक्त केली होती. तब्बल ११ शस्त्रक्रिया आणि कोरोना काळातील सरावातील खंड अशा सर्वच संकटांवर कमालीच्या आत्मविश्वासाने मात करत गीताने ‘मर्मेड ऑफ इंडिया’ ही पदवी सार्थ ठरवली आणि इंग्लिश खाडीवर भारताचा तिरंगा फडकवला.
यावेळी बोलताना आयोजक केदार वसंत मारणे म्हणाले, “गीताने मिळवलेले यश हे केवळ पुण्याचे किंवा महाराष्ट्राचे नाही, तर संपूर्ण देशाचा गौरव वाढवणारे आहे. अत्यंत कठीण परिस्थितीतून आणि शारीरिक वेदनांमधून जात तिने दाखवलेली जिद्द ही आजच्या तरुण पिढीसाठी आणि प्रत्येक खेळाडूसाठी अत्यंत प्रेरणादायी आहे. तिच्या पाठीशी खंबीरपणे उभे राहणे हे आपले कर्तव्य असून, भविष्यातील तिच्या पुढील वाटचालीस मोरया मित्र मंडळातर्फे सर्वतोपरी सहकार्य आणि हार्दिक शुभेच्छा!”
या सोहळ्याला कर्वेनगर परिसरातील नागरिक, क्रीडाप्रेमी आणि मंडळाचे कार्यकर्ते मोठ्या संख्येने उपस्थित होते. सर्वांनी गीताच्या या ऐतिहासिक कामगिरीचे कौतुक केले.
