मुंबई दि. ११ (विकास लहाने) समाजात व्यसनमुक्तीबाबत जनजागृती करणारे संवेदनशील आणि सक्षम पॅरा समुपदेशक घडविण्याच्या उद्देशाने शनिवारी दि. ११ जुलै २०२६ रोजी संकल्प संस्थेतर्फे आयोजित ‘पॅरा कौन्सिलिंग कोर्स’ अंतर्गत महाराष्ट्र नशाबंदी मंडळ, ओल्ड कस्टम हाऊस, मुंबई येथे शैक्षणिक भेट देण्यात आली. या भेटीत प्रशिक्षणार्थ्यांना व्यसन प्रतिबंध, समुपदेशन आणि पुनर्वसन प्रक्रियेचे प्रत्यक्ष प्रशिक्षण व मार्गदर्शन मिळाले.
संकल्प संस्थेचे संस्थापक तथा अध्यक्ष विनोद हिवाळे यांच्या नेतृत्वाखाली आणि महाराष्ट्र नशाबंदी मंडळाच्या सचिव वर्षाताई विद्या विलास यांच्या विशेष सहकार्याने ही शैक्षणिक भेट पार पडली. सदर कार्यक्रमाचे नियोजन सविता हेंडवे, दीपा गमरे आणि वनिता सावंत यांनी केले, तर सूत्रसंचालन चेतना सावंत यांनी केले.
प्रमुख व्याख्याते समुपदेशक मनीषा बागुल यांनी ‘समुपदेशनाची भूमिका : व्यसन प्रतिबंध, हस्तक्षेप व पुनर्वसन’ या विषयावर मार्गदर्शन करताना समुपदेशन ही व्यक्तीमध्ये सकारात्मक परिवर्तन घडविणारी वैज्ञानिक प्रक्रिया असल्याचे सांगितले. प्रभावी संवाद, सक्रिय ऐकणे, सहानुभूती, गोपनीयता, व्यावसायिक नैतिकता, कुटुंबाची भूमिका तसेच पुनर्वसन आणि पुनर्व्यसन रोखण्यासाठी आवश्यक उपाययोजनांवर त्यांनी उदाहरणांसह सविस्तर भाष्य केले. केस स्टडीच्या माध्यमातून प्रत्यक्ष समुपदेशन प्रक्रियेची माहितीही प्रशिक्षणार्थ्यांना देण्यात आली.
सदर प्रसंगी बास्को डिसोजा यांनी मद्य, तंबाखू, अमली पदार्थ आणि औषधांच्या गैरवापरामुळे होणारे शारीरिक, मानसिक, कौटुंबिक व सामाजिक दुष्परिणाम स्पष्ट केले. व्यसनमुक्त समाज उभारण्यासाठी जनजागृती, समुपदेशन आणि कुटुंबाच्या सहभागाचे महत्त्व त्यांनी अधोरेखित केले. शैक्षणिक भेटीदरम्यान प्रशिक्षणार्थ्यांनी महाराष्ट्र नशाबंदी मंडळाच्या कार्यपद्धतीचा प्रत्यक्ष अभ्यास केला. व्यसनमुक्ती अभियान, समुपदेशन सेवा, पुनर्वसन प्रक्रिया आणि व्यसन प्रतिबंधासाठी राबविण्यात येणाऱ्या विविध उपक्रमांची माहिती घेतल्याने प्रशिक्षणार्थ्यांच्या ज्ञानात मोलाची भर पडली.
अध्यक्षीय भाषणात संकल्प संस्थेचे अध्यक्ष विनोद हिवाळे यांनी “पॅरा कौन्सिलिंग कोर्समध्ये केवळ सैद्धांतिक ज्ञानावर भर न देता प्रत्यक्ष क्षेत्रभेटी, तज्ज्ञांचे मार्गदर्शन आणि अनुभवाधारित शिक्षणाला प्राधान्य दिले जाते. अशा उपक्रमांमुळे समाजासाठी कार्यक्षम, संवेदनशील आणि समाजाभिमुख पॅरा समुपदेशक घडविण्याचे संस्थेचे उद्दिष्ट अधिक प्रभावीपणे साध्य होत आहे.” असे नमूद केले.
सदर कार्यक्रमाच्या यशस्वी आयोजनासाठी रुपेश गोरे, सूर्यकांत चव्हाण, रेणुका सिंग, अश्विनी गमरे आणि सुप्रभा गायकवाड यांनी अथक परिश्रम घेतले त्यासाठी त्या सर्वांचे आणि प्रशिक्षणार्थी यांचे कौतुक करून त्यांना पुढील वाटचालीसाठी शुभेच्छा देऊन सदर कार्यक्रमाची सांगता करण्यात आली.
