तिसऱ्या महायुद्धाचे संकेत पश्चिम आशियामध्ये पुन्हा मिळायला सुरुवात झाली आहे. अमेरिकेनं 90 मिनिटांत इराणची अशी अवस्था केली आहे की संपूर्ण जगाची झोप उडाली. हजारो बॉम्ब एकाच वेळी अनेक ठिकाणांवर सोडले. एका बाजूला अमेरिका आणि दुसऱ्या बाजूला इराण यांच्यात अत्यंत क्रूर आणि भीषण युद्ध सुरू झाले आहे. जागतिक अर्थव्यवस्थेची नाडी समजला जाणारा होर्मुज इराणने बंद केल्यानंतर संतापलेल्या अमेरिकेने इराणवर हल्ला केला.
अमेरिकेने अवघ्या ९० मिनिटांत इराणचे प्रमुख लष्करी आणि मिसाइल तळ बॉम्बने उडवून दिले. तेहरानसह अनेक देशांत एकाच वेळी झालेल्या या स्फोटांमुळे संपूर्ण जगाची झोप उडाली आहे. इराणने याला अमेरिकेविरुद्धची अस्तित्वाची लढाई असल्याचं म्हटलं आहे.
९० मिनिटांचा थरार
अमेरिकन सेंट्रल कमांडकडून मिळालेल्या माहितीनुसार, भारतीय वेळेनुसार पहाटे साडेतीन वाजता अमेरिकेच्या लढाऊ विमानांनी इराणच्या ग्रेटर टुंब बेटावर हल्ला चढवला. इराणची किनारपट्टी संरक्षण यंत्रणा आणि क्रूझ मिसाइलचे मोठे साठे होते, जे केवळ ९० मिनिटांच्या आत बॉम्ब टाकून पूर्णपणे उद्ध्वस्त केले. एवढ्यावरच न थांबता या हल्ल्यानंतर बरोबर ९ तास उलटत नाहीत तोच अमेरिकेने इराणवर दुसरा मोठा एअरस्ट्राईक केला.
इराणच्या खर्ग बेटाकडे जाणाऱ्या एका अजस्र तेल टँकरला अमेरिकेने वारंवार इशारा दिला होता. मात्र, तो न थांबल्याने अमेरिकन सैन्याने थेट हेलफायर मिसाइल डागलं आणि टँकर समुद्रातच निकामी केला. या सगळ्याचा परिणाम असा झाला की तेल आणि गॅस पुरवठा पूर्णपणे सध्या ठप्प झाला आहे.
तेहरानमध्ये मध्यरात्री बॉम्बवर्षाव
इराणच्या मेहर न्यूज एजन्सीने दिलेल्या वृत्तानुसार, अमेरिकेने इराणची राजधानी तेहरानसह अहवाज शहर आणि ‘बंदर अब्बास’ या प्रमुख बंदरावर सलग ५ व्या दिवशी रात्री भीषण बॉम्बवर्षाव केला. इराणच्या सरकारी प्रसारमाध्यमांनी दावा केला आहे की, अहवाज शहरातील एका बाल कर्करोग (कॅन्सर) रुग्णालयाजवळच अमेरिकेचा बॉम्ब पडला, ज्यामुळे लहान मुलांचे हे संपूर्ण रुग्णालय तातडीने रिकामे करावे लागले.
अमेरिकेचे कुवेत, बहरीनमधील तळ उडवले!
अमेरिकेच्या या महाभयंकर हल्ल्यानंतर पिसाळलेल्या इराणच्या इस्लामिक रिव्होल्यूशनरी गार्ड कोअरने (IRGC) थेट अमेरिकेच्या मित्रराष्ट्रांवर हल्ले सुरू केले आहेत. इराणने कुवेत, बहरीन आणि जॉर्डनमधील अमेरिकन लष्करी तळांवर एकाच वेळी क्षेपणास्त्रे डागली. कुवेतने दावा केला आहे की, त्यांनी इराणकडून आलेले २१ ड्रोन आणि ४ मिसाइल्स हवेतच नष्ट केले. यात मोठ्या प्रमाणावर मालमत्तेचे नुकसान झाले आहे. जॉर्डननेही आपल्या हवाई हद्दीत घुसलेली इराणची क्षेपणास्त्रे पाडली असून संपूर्ण भागात हाय अलर्ट जारी केला आहे.
डोनाल्ड ट्रम्प यांचा मोठा दावा!
या महाविनाशाच्या काळात अमेरिकेचे अध्यक्ष डोनाल्ड ट्रम्प यांनी अत्यंत सूचक वक्तव्य केले आहे. ट्रम्प म्हणाले, “इराण आता पूर्णपणे कोलमडला असून तो आमच्याशी तडजोड (करार) करण्यासाठी प्रचंड बेताब आहे.” इराणने एका अमेरिकन नागरिकाला कैदेतून सोडून तसे संकेत दिल्याचेही ट्रम्प यांनी म्हटले आहे. मात्र, जमिनीवर सुरू असलेल्या युद्धाने जागतिक ऊर्जा पुरवठा धोक्यात आल्यामुळे आंतरराष्ट्रीय बाजारात कच्च्या तेलाच्या किमती भडकण्याची भीती निर्माण झाली आहे.
