पंतप्रधान नरेंद्र मोदी आज विदेशातून भारतात येतील आणि पुन्हा परवा दुसऱ्या दौऱ्याला जाण्याची शक्यता आहे. केंद्रीय मंत्रिमंडळाचा विस्तार उद्या म्हणजे मंगळवारी (30 जून) होण्याची शक्यता सांगितली जात आहे. त्यामुळे उद्याच्या एकच दिवस असल्याने उद्याच मंत्रिमंडळाचा विस्तार होण्याची शक्यता आहे. या विस्तारात शिवसेनामध्ये आलेले खासदार, तृणमूलचे फुटीर खासदार, आपचे खासदार यापैकी काहींना संधी तसेच आधीच्या काही मंत्र्यांना डच्चू मिळून नवीन चेहऱ्याना संधी मिळण्याची शक्यता वर्तवण्यात येत आहे. शिवसेनेकडे यावेळी एक कॅबिनेट मंत्रीपद येणार अशी सूत्रांची माहिती आहे. त्यासाठी शिवसेनेचे खासदार श्रीकांत शिंदे यांचे नाव चर्चेत आहे.
केंद्रीय मंत्रिमंडळाच्या संभाव्य विस्तारात श्रीकांत शिंदे यांना कॅबिनेट मंत्रीपद मिळण्याची शक्यता आहे. तर राज्यमंत्री पदासाठी प्रतापराव जाधव यांच्याऐवजी संजय जाधव यांच्या नावाची चर्चा सुरु असल्याची माहिती शिंदेंच्या शिवसेनेतील वरिष्ठ सूत्रांनी एबीपी माझाला दिली आहे. ‘ऑपरेशन टायगर’च्या यशानंतर केंद्रीय मंत्रिमंडळात शिवसेनेला एक कॅबिनेट मंत्रीपद मिळण्याची शक्यता आहे. कॅबिनेट मंत्रीपदासाठी शिंदेंच्या शिवसेनेकडून एकनाथ शिंदे यांचे पुत्र आणि कल्याणचे खासदार डॉ. श्रीकांत शिंदे यांच्या नावाची चर्चा असल्याची सूत्रांची माहिती आहे. तर एक राज्यमंत्रीपद ठाकरेंच्या शिवसेनेतून फुटलेल्या सहा खासदारांपैकी एकाला मिळण्याची शक्यता आहे. या मंत्रिपदासाठी परभणीचे खासदार संजय उर्फ ‘बंडू’ जाधव यांचे नाव आघाडीवर आहे. संजय जाधव सलग तिसऱ्यांदा परभणीचे खासदार म्हणून निवडणून आले आहेत.
यांच्या कामकाजाबद्दल केंद्रात नाराज-
सध्याचे आयुष खात्याचा स्वतंत्र प्रभार असलेले मंत्री प्रतापराव जाधव यांच्याऐवजी संजय जाधवांना संधी मिळण्याची शक्यता आहे. प्रतापराव जाधव यांच्याकडे आयुष खात्याच्या स्वतंत्र प्रभाराबरोबरच आरोग्य खात्याच्या राज्यमंत्री पदाची जबाबदारी आहे. प्रतापराव जाधव यांच्या कामकाजाबद्दल केंद्रात नाराज असल्याची सूत्रांची माहिती आहे. त्यामुळे संभाव्य मंत्रिमंडळ विस्तारात प्रतापराव जाधव यांचे मंत्रीपद जाणार की राहणार?, याबद्दल प्रचंड चर्चा सुरु आहे.
भाजपच्या केंद्रीय नेतृत्वाचीही पसंती-
पक्ष संघटनेच्या दृष्टीने राज्यमंत्रीपद विदर्भात ठेवायचे की मराठवाड्यात?, यावरून शिंदेंच्या शिवसेनेमध्ये चर्चा सुरु आहे. ठाकरेंच्या शिवसेनेमधून शिंदेंच्या शिवसेनेत आलेल्या खासदारांमध्ये संजय जाधव जेष्ठ खासदार आहेत. संजय जाधव यांच्या माध्यमातून मराठवाड्यात पक्ष संघटन आणखी मजबूत करण्याचा शिवसेनेचा मानस आहे. मात्र, शिंदे गटाच्या सर्व खासदारांमध्ये सर्वात ज्येष्ठ असलेल्या प्रतापराव जाधव यांना वगळायचं की नाही? यावरून शिंदे यांच्या शिवसेनेत चर्चा सुरू असल्याचं सांगण्यात येत आहे. कॅबिनेट मंत्रिपदासाठी डॉ. श्रीकांत शिंदे यांचं नाव अंतिम झाल्याची सूत्रांची माहिती आहे. श्रीकांत शिंदे यांच्या नावाला भाजपच्या केंद्रीय नेतृत्वाचीही पसंती आहे.
तिरुपती बालाजीचं दर्शन-
पुढच्या काही दिवसात केंद्रीय कॅबिनेटचा विस्तार होणार असल्याची चर्चा आहे. त्याआधी खासदार श्रीकांत शिंदे आणि ओमराजे निंबाळकरांनी तिरुपती बालाजीचं दर्शन घेतलं. दोघांनीही चार किलोमीटर पायी चालत दर्शन घेतलंय. त्यामुळे या दोघांची नावं चर्चेत आहेत. ठाकरेंचे 6 बंडखोर शिवसेनेत सामील झाल्यानं शिवसेनेच्या खासदारांची संख्या 13 वर गेलीय. यामुळे खासदारांची सर्वाधिक संख्या असणारा शिवसेना हा महाराष्ट्रातील सर्वात मोठा पक्ष ठरला आहे. त्यामुळे केंद्रात वाढलेलं वजन वाढल्यानं शिवसेनेच्या पदरातही अधिकचं मंत्रिपद पडण्याची शक्यता आहे. शिवसेनेला एक कॅबिनेट मंत्रीपद आणि एक राज्यमंत्रीपद मिळण्याची शक्यता वर्तवली जात आहे.
