नसरापूर येथे साडेतीन वर्षाच्या मुलीवरील अत्याचार करून तिचा खून करणारा भीमराव कांबळे याला न्यायालयाने फाशीची शिक्षा सुनावली. विशेष न्यायाधीश एस. आर. साळुंखे यांनी आज हा निकाल दिला. या प्रकरणाचा तपास आणि न्यायालयीन प्रक्रिया वेगाने पूर्ण झाल्याने हा खटला अल्पावधीत निकाली निघाला. गुन्हा घडल्यापासून केवळ दोन महिन्यांत हा खटला निकाली निघाला आहे. एकूण १३७ पानांचा हा निकाल आहे.
कांबळे याला विशेष न्यायालयाने गुरुवारी दोषी ठरविले होते. कांबळे याला मृत्युदंड की जन्मठेपेची शिक्षा होणार याचा निकाल सोमवारी (ता. २९) लागणार होता. त्यानुसार न्यायालयाने आज निकाल दिला. घटनेनंतर पोलिसांनी तातडीने तपासाची सूत्रे हाती घेत आरोपीला अटक केली होती. तपासादरम्यान घटनास्थळावरील पुरावे, तांत्रिक माहिती, सीसीटीव्ही चित्रफिती, साक्षीदारांचे जबाब आणि वैद्यकीय अहवाल यांच्या आधारे आरोपीविरुद्ध भक्कम पुरावे गोळा करण्यात आले होते. पोलिसांनी अल्पावधीत दोषारोपपत्र दाखल करून खटल्याची सुनावणी सुरू केली होती.
सरकार पक्षाच्या म्हणण्यानुसार, आरोपीने नियोजनपूर्वक चिमुकलीचे अपहरण करून तिच्यावर अत्याचार केला आणि पुरावे नष्ट करण्याच्या उद्देशाने तिचा खून केला. दुसरीकडे, बचाव पक्षाने पोलिसांनी सादर केलेले पुरावे परिस्थितीजन्य असल्याचा दावा करत हा गुन्हा ‘दुर्मिळातील दुर्मीळ’ प्रकारात मोडत नसल्याचे न्यायालयात मांडले.
नसरापूरची केस दुर्मिळातील दुर्मीळ आहे. क्रूरपणे हत्या आणि इतर घटक आहेत. वय आणि मानसिक स्थिती आरोपीच्या बाजूची नाही असं निरीक्षण न्यायालयाने नोंदवलं होतं. आरोपीला शिक्षा देण्याचे मुद्दे लक्षात घेतल्याचं न्यायालयाने स्पष्ट केलं होतं.
न्यायाधीशांनी शिक्षेच्या सुनावणीवेळी सांगितलं की, दोन्ही पक्षांचे युक्तिवाद ऐकल्यानंतर न्यायालयाने अंतिम निकाल तयार केला आहे. सर्व सात गुन्हे आरोपीचे सिद्ध झाले आहेत. देशातील यापूर्वीच्या खटल्यातील निकालांचा आधार घेतला आहे. बलात्कार आणि अमानुष खून केल्याप्रकरणी यापूर्वी फाशीची शिक्षा देण्यात आली आहे.
